តម្លៃប្រេងឥន្ធនៈនៅអាល្លឺម៉ង់ បន្ដកើនឡើង ទោះបីមានការកាត់បន្ថយពន្ធ លើប្រេងឥន្ធនៈរបស់រដ្ឋាភិបាល
ប៊ែរឡាំង៖ ក្លឹបអ្នកបើកបររថយន្តអាល្លឺម៉ង់ (ADAC) បានរាយការណ៍អំពីការកើនឡើងជាថ្មី នៃតម្លៃប្រេងសាំង និងប្រេងម៉ាស៊ូត ត្រឹមតែប៉ុន្មានថ្ងៃប៉ុណ្ណោះបន្ទាប់ ពីរដ្ឋាភិបាលបានដាក់ចេញនូវវិធានការ កាត់បន្ថយពន្ធលើថាមពល ដើម្បីកាត់បន្ថយផលប៉ះពាល់នៃតម្លៃប្រេង សកលដ៏ខ្ពស់មកលើអ្នកបើកបរ។
យោងតាម ADAC តម្លៃមធ្យមប្រចាំថ្ងៃនៅទូទាំងប្រទេស សម្រាប់ប្រេងសាំងប្រភេទ Super E10 បានកើនឡើងដល់ ២,១៤ អឺរ៉ូ (២,៣៩ ដុល្លារអាមេរិក) ក្នុងមួយលីត្រនៅថ្ងៃអាទិត្យ ដែលកើនឡើង ២,៣ សេនអឺរ៉ូ ឬ២,៦ សេនអាមេរិក បើធៀបនឹងថ្ងៃព្រហស្បតិ៍សប្ដាហ៍មុន ចំណែកតម្លៃប្រេងម៉ាស៊ូតបានកើនឡើង ០,៩ សេនអឺរ៉ូ (១,០ សេនអាមេរិក) ដល់ ២,២៥ អឺរ៉ូ (២,៥២ ដុល្លារ) ក្នុងមួយលីត្រ។
ដើម្បីជួយសម្រាលបន្ទុកដល់អ្នកប្រើប្រាស់ពីការកើនឡើងថ្លៃប្រេងឥន្ធនៈចំពេលមានសង្គ្រាមនៅអ៊ីរ៉ង់ រដ្ឋាភិបាលអាល្លឺម៉ង់ បានដាក់ចេញនូវការកាត់បន្ថយពន្ធលើថាមពលសម្រាប់ប្រេងសាំង និងប្រេងម៉ាស៊ូតរយៈពេល ៣ ខែ ចាប់ពីថ្ងៃទី ១ ខែតុលា ដោយកាត់បន្ថយបន្ទុកពន្ធប្រហែល ១៧ សេនអឺរ៉ូ (១៩ សេនអាមេរិក) ក្នុងមួយលីត្រ រួមទាំងពន្ធលើតម្លៃបន្ថែម (VAT) ផងដែរ។
រដ្ឋាភិបាលបានឱ្យដឹងថា វិធានការនេះត្រូវបានគេរំពឹងថានឹងជួយសម្រាលបន្ទុកហិរញ្ញវត្ថុដល់គ្រួសារ និងអាជីវកម្មនានាបានប្រហែល ២,៥ ពាន់លានអឺរ៉ូ (២,៨ ពាន់លានដុល្លារ)។
ដំបូងឡើយ ការកាត់បន្ថយពន្ធនេះបានធ្វើឱ្យតម្លៃប្រេងឥន្ធនៈធ្លាក់ចុះយ៉ាងខ្លាំង។ ប្រេងសាំងប្រភេទ E10 មានលក់ក្នុងតម្លៃក្រោម ២ អឺរ៉ូ (២,២៤ ដុល្លារ) ក្នុងមួយលីត្រនៅស្ថានីយប្រេងជាច្រើនភ្លាមៗ បន្ទាប់ពីការកាត់បន្ថយពន្ធចូលជាធរមាន ដោយតម្លៃបានធ្លាក់ចុះប្រហែល ១៤,៥ សេនអឺរ៉ូ (១៦ សេនអាមេរិក) ក្នុងមួយលីត្រនៅថ្ងៃដំបូង។ យោងតាមទិន្នន័យរបស់ ADAC តម្លៃប្រេងម៉ាស៊ូត បានធ្លាក់ចុះប្រហែល ១៥,២ សេនអឺរ៉ូ (១៧ សេនអាមេរិក)៕
ប្រែសម្រួល ឈូក បូរ៉ា
