សង្គ្រាមអាមេរិក និងអ៊ីរ៉ង់ ឈានចូលដល់ខែទី៧ ប៉ុន្ដែកាតា បញ្ជាក់ថា ការចរចា និងការផ្លាស់ប្តូរសារកំពុងបន្ត ដើម្បីបញ្ចប់ជម្លោះក្នុងតំបន់
ដូហា៖ ប្រទេសកាតា បានប្រកាសថា ការចរចា និងការផ្លាស់ប្តូរសាររវាងភាគីនានាដែលពាក់ព័ន្ធនឹងជម្លោះក្នុងតំបន់ កំពុងបន្តដំណើរការ តាមរយៈទីក្រុងដូហា និងដៃគូក្នុងតំបន់របស់ខ្លួន។
លោក Ibrahim bin Sultan Al-Hashmi នាយកផ្នែកប្រព័ន្ធផ្សព្វផ្សាយ និងទំនាក់ទំនងនៃក្រសួងការបរទេសកាតា បានថ្លែងនៅក្នុងសន្និសីទ សារព័ត៌មានប្រចាំសប្តាហ៍ថា ទីក្រុងដូហា មិនអាចបង្ហាញព័ត៌មានលម្អិតអំពីការផ្លាស់ប្តូរផ្នែកការទូត ដែលកំពុងបន្តនោះទេ ប៉ុន្តែបានបញ្ជាក់ថា កិច្ចពិភាក្សានានា នៅតែបន្តដំណើរការ។
លោកបានលេីកឡេីងថា «ទំហំនៃជម្លោះនេះ និងផលប៉ះពាល់ដ៏ធ្ងន់ធ្ងរ ដែលពិភពលោកទាំងមូលកំពុងទទួលរង ទាមទារឱ្យយើងខិតខំប្រឹងប្រែងអស់ពីសមត្ថភាព ដើម្បីបញ្ចប់វាជាបន្ទាន់ តាមរយៈដំណោះស្រាយដែលសម្រេចបាននៅតុចរចា»។
លោកបានបន្ថែមថា ការចរចាទាំងនោះបានគិតគូរពីកង្វល់របស់ភាគីនានា ដោយមិនបានបញ្ជាក់លម្អិតនោះទេ។ ការលើកឡើងនេះធ្វើឡើងនៅពេលដែលជម្លោះរវាងសហរដ្ឋអាមេរិក និងអ៊ីរ៉ង់ បានអូសបន្លាយពេលជាង ៧ ខែមកហើយ ដោយមិនទាន់មានសញ្ញានៃការឈានទៅរកដំណោះស្រាយណាមួយនៅឡើយទេ៕
ប្រែសម្រួល ឈូក បូរ៉ា
