អារ៉ាប៊ីសាអូឌីត និងក្រុមហ៊ូធី ផ្លាស់ប្ដូរគំរាមកំហែង ខណៈការវាយប្រហារលើទីតាំងប្រេង និងទីក្រុងនានាកាន់តែខ្លាំងឡើង
រីយ៉ាដ៖ អារ៉ាប៊ីសាអូឌីត និងក្រុមហ៊ូធី របស់ប្រទេសយេម៉ែន បានផ្លាស់ប្តូរការគំរាមកំហែង អំពីការវាយប្រហារសងសឹក ដាក់គ្នា ខណៈដែលការវាយប្រហារឆ្លងព្រំដែនលើទីក្រុងធំៗ និងទីតាំងប្រេងនៅតែបន្តកើតមាន។
ការផ្លាស់ប្តូរការគំរាមកំហែង នៅក្នុងកិច្ចប្រជុំគណៈរដ្ឋមន្ត្រី កាលពីថ្ងៃអង្គារ ដែលដឹកនាំ ដោយព្រះអង្គម្ចាស់ Mohammed bin Salman នៅទីក្រុងរីយ៉ាដ អារ៉ាប៊ីសាអូឌីត បានព្រមានថា ក្រុមហ៊ូធី របស់យេម៉ែននឹងត្រូវប្រឈមមុខនឹងផលវិបាក ចំពោះការវាយប្រហារម្តងហើយម្តងទៀត របស់ពួកគេមកលើព្រះរាជាណាចក្រនេះ។
ក្រុមប្រឹក្សារដ្ឋមន្ត្រីអារ៉ាប៊ីសាអូឌីត បានកោតសរសើរដល់សម្ព័ន្ធភាពគាំទ្រ ភាពស្របច្បាប់នៅយេម៉ែន ចំពោះប្រតិបត្តិការយោធា របស់ខ្លួនប្រឆាំងនឹងក្រុមហ៊ូទី និងបានប្តេជ្ញាការពារសេរីភាព នៃការធ្វើនាវាចរណ៍ នៅក្នុងសមុទ្រក្រហម និងច្រកសមុទ្រ Bab al-Mandab។
នៅថ្ងៃដដែលនោះដែរ អ្នកនាំពាក្យយោធា របស់ក្រុមហ៊ូធី លោក Yahya Sarea បានព្រមានថា ការវាយប្រហារណាមួយមកលើរដ្ឋធានី ដែលគ្រប់គ្រងដោយក្រុមហ៊ូទី នឹងបង្កឱ្យមានការឆ្លើយតប ដែលលោកបានពណ៌នាថា «ធ្ងន់ធ្ងរ និងឈឺចាប់» ប្រឆាំងនឹងទីក្រុងរីយ៉ាដ។
ក្រោយមក ក្រុមនេះបានព្រមានអំពីទីតាំងមួយចំនួន នៅក្នុងប្រទេសអារ៉ាប៊ីសាអូឌីត រួមទាំងទីតាំងនានា របស់ក្រុមហ៊ុនប្រេងយក្ស Saudi Aramco និងអាកាសយានដ្ឋានអន្តរជាតិ King Khalid ក្នុងទីក្រុងរីយ៉ាដ ផងដែរ៕
