សេតវិមាន ស្នើឱ្យឯកអគ្គរដ្ឋទូតអាមេរិក ប្រចាំប្រទេសក្រិក លាលែងពីតំណែង ចំពេលមានការស៊ើបអង្កេត លើការប្រព្រឹត្តមិនត្រឹមត្រូវ
វ៉ាស៊ីនតោន៖ អ្នកនាំពាក្យសេតវិមាន លោកស្រី Katie Zacharia បានឧ្យដឹងថា រដ្ឋបាលរបស់លោក ត្រាំ បានស្នើឱ្យឯកអគ្គរដ្ឋទូតអាមេរិកប្រចាំប្រទេសក្រិក លោកស្រី Kimberly Guilfoyle លាលែងពីតំណែង ចំពេលមានការចោទប្រកាន់ អំពីការប្រព្រឹត្តមិនត្រឹមត្រូវ។
លោកស្រី Zacharia បានឧ្យដឹងនៅក្នុងសន្និសីទសារព័ត៌មាន លើកដំបូងរបស់លោកស្រីនៅសេតវិមានថា «យើងបានស្នើឱ្យឯកអគ្គរដ្ឋទូតលោកស្រី Guilfoyle លាលែងពីតំណែង។ លោកស្រី គឺជាបុគ្គលដ៏មានតម្លៃសម្រាប់ក្រុមការងារ ហើយយើងសូមជូនពរឱ្យលោកស្រីជួបតែរឿងល្អៗ»។
កាសែត The Wall Street Journal បានរាយការណ៍កាលពីសប្តាហ៍មុនថា លោកស្រី Guilfoyle បានស្នើឱ្យអ្នកបរិច្ចាគថវិកាគាំទ្រលោក ត្រាំ ម្នាក់ បង់វិក្កយបត្រកាត American Express ចំនួន ១០០,០០០ ដុល្លារអាមេរិក រយៈពេលពីរបីថ្ងៃមុនពេលការបើកសវនាការ ដើម្បីអនុម័តតែងតាំងលោកស្រី។
កាសែតនេះក៏បានរាយការណ៍ផងដែរថា គាត់បានធ្វើដំណើរលំហែកាយប្រណីតៗ ដែលចំណាយដោយពាណិជ្ជករក្រិក ដែលជាអ្នកមានទ្រព្យសម្បត្តិស្តុកស្តម្ភ។
បណ្តាញព័ត៌មាន NBC News បានរាយការណ៍ដោយដកស្រង់ សម្តីមនុស្សពីរនាក់ដែលដឹងរឿងនេះថា អធិការទូទៅនៃក្រសួងការបរទេសអាមេរិក កំពុងស៊ើបអង្កេតលើរូបលោកស្រី និងស្ថានទូតអាមេរិកប្រចាំប្រទេសក្រិក៕
ប្រែសម្រួល ឈូក បូរ៉ា
