លីបង់ថា គណៈប្រតិភូយោធា នឹងជំរុញឱ្យមានការបញ្ឈប់ការ វាយប្រហាររបស់អ៊ីស្រាអែល នៅក្នុងកិច្ចពិភាក្សា នៅសហរដ្ឋអាមេរិក
បរទេស៖ ការិយាល័យប្រធានាធិបតីលីបង់ បានឱ្យដឹងនៅក្នុងការបង្ហោះមួយនៅលើបណ្តាញសង្គម X កាលពីថ្ងៃសៅរ៍ថា គណៈប្រតិភូយោធាលីបង់ នឹងលើកយកសំណើ របស់ទីក្រុងបេរូត (Beirut) ដែលទាមទារឱ្យមានការបញ្ឈប់ការវាយប្រហារ របស់អ៊ីស្រាអែលនៅក្នុងប្រទេសលីបង់ ទៅបង្ហាញនៅក្នុងកិច្ចប្រជុំ ត្រីភាគីមួយនៅទីក្រុង Tampa រដ្ឋ Florida នៅថ្ងៃទី ២០ ខែតុលា។
យោងតាមសារព័ត៌មាន Reuters ចេញផ្សាយនៅថ្ងៃទី១៨ ខែតុលា ឆ្នាំ២០២៦ថា ក្នុងរយៈពេលប៉ុន្មានខែថ្មីៗនេះ ប្រទេសលីបង់ និងអ៊ីស្រាអែល បានធ្វើការចរចាដោយផ្ទាល់ជាច្រើនលើក ក្នុងគោលបំណងបញ្ចប់អរិភាព បន្ទាប់ពីសង្គ្រាមថ្មីមួយបានផ្ទុះឡើងកាលពីថ្ងៃទី ២ ខែមីនា រវាងអ៊ីស្រាអែល និងក្រុមប្រដាប់អាវុធលីបង់ Hezbollah ដែលជាហេតុការណ៍បង្កឡើងដោយជម្លោះក្នុងតំបន់ដ៏ទូលំទូលាយជាងនេះ។
យោងតាមកិច្ចព្រមព្រៀងមួយដែលសម្រេចបានតាមរយៈការចរចារវាងអ៊ីស្រាអែល និងលីបង់ ដែលសម្របសម្រួលដោយសហរដ្ឋអាមេរិក ទីក្រុងបេរូតបានសន្យាថា នឹងដកហូតអាវុធពីក្រុម Hezbollah ដែលចំណាត់ការនេះនឹងនាំឱ្យកងទ័ពអ៊ីស្រាអែលដកខ្លួនចេញពីប្រទេសលីបង់ជាបណ្តើរៗ។
យ៉ាងណាក៏ដោយ ក្រុម Hezbollah បានបដិសេធមិនព្រមដកហូតអាវុធឡើយ ដរាបណាកងកម្លាំងអ៊ីស្រាអែលនៅតែបន្តវត្តមាននៅលើទឹកដីលីបង់ ខណៈដែលអ៊ីស្រាអែលក៏នៅតែបន្តធ្វើការវាយប្រហារលើតំបន់ភាគខាងត្បូងនៃប្រទេសលីបង់ផងដែរ។
