លោក ម៉ាក្រុង អំពាវនាវឱ្យបញ្ឈប់ការធ្វើបាតុកម្ម នានាក្នុងរយៈពេលប៉ុន្មានថ្ងៃខាងមុខនេះ
ប៉ារីស៖ ប្រធានាធិបតីបារាំង លោក អេម៉ានុយអែល ម៉ាក្រុង បានឧ្យដឹងថា រដ្ឋាភិបាលស្នើកុំឱ្យមានការធ្វើបាតុកម្ម នៅទូទាំងប្រទេសក្នុងរយៈពេលប៉ុន្មានថ្ងៃខាងមុខនេះ ជាពិសេសនៅថ្ងៃសៅរ៍។
ថ្លែងបន្ទាប់ពីកិច្ចប្រជុំក្រុមប្រឹក្សា សន្តិសុខ លោក ម៉ាក្រុង បានឧ្យដឹងថា រដ្ឋាភិបាលមានបំណងហាមឃាត់ សំណើសុំរៀបចំការជួបជុំនានាពីសំណាក់បុគ្គលដែល «គ្មានសិទ្ធិស្របច្បាប់ក្នុងការធ្វើបែបនេះ»។ លោកបានបន្ថែមថា ចំពោះការដើរក្បួនរបស់សហជីព ដែលបានជូនដំណឹងជាផ្លូវការទៅកាន់អាជ្ញាធរមូលដ្ឋាន នឹងមានការស្នើផ្លូវដើរជំនួស ដើម្បីការពារតំបន់កណ្តាលទីក្រុង។
បណ្តាញទូរទស្សន៍បារាំង BFM TV បានរាយការណ៍ថា អាជ្ញាធរប្រចាំខេត្ត Rhone បានហាមឃាត់រាល់ការធ្វើ បាតុកម្មទាំងអស់នៅក្នុងទីក្រុង Lyon សម្រាប់ថ្ងៃសៅរ៍។
BFM TV ក៏បានរាយការណ៍ផងដែរថា នៅទីក្រុង Marseille អាជ្ញាធរប្រចាំខេត្ត Bouches-du-Rhone បានប្រកាសហាមឃាត់ជាបណ្តោះអាសន្ននូវរាល់ការធ្វើបាតុកម្មទាំងអស់នៅទូទាំងខេត្តនោះ សម្រាប់ថ្ងៃសៅរ៍ ដោយមិនគិតថាការជួបជុំទាំងនោះត្រូវបានជូនដំណឹងដល់អាជ្ញាធរជាផ្លូវការឬអត់នោះទេ។
វិធានការហាមឃាត់ការចេញក្រៅនៅពេលយប់ នៅក្នុងខេត្តនេះ ក៏ត្រូវបានកែសម្រួលផងដែរ ដោយកំណត់ចាប់ពីម៉ោង ១១ យប់ រហូតដល់ម៉ោង ៥ ព្រឹក សម្រាប់យប់ថ្ងៃសៅរ៍ឈានចូលថ្ងៃអាទិត្យ និងយប់ថ្ងៃអាទិត្យឈានចូលថ្ងៃចន្ទ។ វិធានការនេះនឹងអនុវត្តចំពោះទាំងមនុស្សពេញវ័យ និងអនីតិជន ចាប់ពីយប់ថ្ងៃសៅរ៍តទៅ។
របាយការណ៍ដដែលបានបញ្ជាក់ថា រាល់សេវាដឹកជញ្ជូនសាធារណៈនៅទូទាំងតំបន់ទីក្រុង Marseille នឹងត្រូវផ្អាកដំណើរការ ចាប់ពីម៉ោង ៥ ព្រឹក ថ្ងៃសៅរ៍ រហូតដល់ម៉ោង ៥ ព្រឹក ថ្ងៃអាទិត្យ៕
ប្រែសម្រួល ឈូក បូរ៉ា
