ក្រសួងយុត្តិធម៌អាមេរិក ព្យាយាមប្តឹងអតីតប្រធាន FBI លោក James Comey ជាលើកទីបី ជុំវិញការចោទប្រកាន់ ពីបទលេចធ្លាយព័ត៌មាន សម្ងាត់ការពារជាតិ
វ៉ាស៊ីនតោន៖ យោងតាមឯកសារតុលាការដែលត្រូវបានទម្លាយជាសាធារណៈកាលពីថ្ងៃចន្ទ ក្រសួងយុត្តិធម៌សហរដ្ឋអាមេរិក (DOJ) ក្រោមរដ្ឋបាលលោក Donald Trump កំពុងព្យាយាមបើកសវនាការកាត់ទោសអតីត ប្រធានការិយាល័យស៊ើបអង្កេតសហព័ន្ធ (FBI) លោក James Comey ជាលើកទីបី ដោយករណីចុងក្រោយនេះបានចោទប្រកាន់លោកពីបទចែកចាយព័ត៌មានសម្ងាត់ពាក់ព័ន្ធនឹងសន្តិសុខជាតិកាលពីឆ្នាំ ២០១៦។
ការចោទប្រកាន់នេះត្រូវបានលាតត្រដាងនៅក្នុងឯកសារតុលាការមួយ ដែលត្រូវបានគេស្គាល់ថាជា «បណ្តឹងព្រហ្មទណ្ឌដោយរដ្ឋអាជ្ញា (Criminal Information)»។ ក្រសួងយុត្តិធម៌បានបញ្ជាក់ថា ខ្លួនបានដាក់ពាក្យបណ្តឹងនេះឡើង ក្នុងគោលបំណងបង្កក ឬទប់ស្កាត់អាជ្ញាយុកាល (Statute of limitations) រយៈពេល ១០ ឆ្នាំនៃបទល្មើសនេះ កុំឱ្យផុតកំណត់កាលពីដើមខែតុលាកន្លងទៅ នេះបើយោងតាមការចេញផ្សាយពីសារព័ត៌មាន Rueters ថ្ងៃទី២៧ ខែតុលា ឆ្នាំ២០២៦ ។
ឯកសារដែលបានដាក់ជូនតុលាការសហព័ន្ធនៅរដ្ឋធានីវ៉ាស៊ីនតោន បានចោទប្រកាន់លោក Comey ពីបទបញ្ជូន និងឃុបឃិតបញ្ជូនព័ត៌មាន សម្ងាត់ពាក់ព័ន្ធនឹងវិស័យការពារជាតិ។ ក្នុងនោះ បណ្តឹងបានអះអាងថា លោកបានចែករំលែកព័ត៌មានសម្ងាត់ (Classified information) ទៅកាន់អ្នកសារព័ត៌មានម្នាក់របស់កាសែត The New York Times កាលពីខែតុលា ឆ្នាំ ២០១៦។
ជុំវិញចំណាត់ការនេះ លោក Patrick Fitzgerald មេធាវីការពារក្តីរបស់លោក Comey បានថ្លែងនៅក្នុងសេចក្តីថ្លែងការណ៍មួយថា ឯកសារបណ្តឹងនេះ «មានចេតនាចោទប្រកាន់លោក Comey ពីបទឧក្រិដ្ឋដែលលោកមិនបានប្រព្រឹត្តនោះឡើយ»។ បណ្តឹងព្រហ្មទណ្ឌនេះ ត្រូវបានដាក់ជូនតុលាការតាំងពីថ្ងៃទី ៥ ខែតុលាមកម្ល៉េះ ប៉ុន្តែទើបតែត្រូវបានបើកបង្ហាញជាសាធារណៈ (Unsealed) កាលពីថ្ងៃចន្ទ តាមការស្នើសុំរបស់ក្រុមមេធាវីរបស់លោក Comey ផ្ទាល់។
នៅក្នុងវីដេអូខ្លីមួយដែលបង្ហោះនៅលើបណ្តាញសង្គម Instagram លោក Comey បានបញ្ជាក់ថា «ពួកគេបានត្រឡប់មកម្តងទៀតហើយ» ដោយសំដៅលើក្រសួងយុត្តិធម៌ ប៉ុន្តែលោកមិនបានលម្អិតពីអង្គហេតុបន្ថែមនោះឡើយ។ លោកបានសង្កត់ធ្ងន់ថា «ខ្ញុំនៅតែជាមនុស្សស្អាតស្អំ និងគ្មានទោសពៃរ៍ដដែល»។
ជាមួយគ្នានេះ ក្រុមមេធាវីរបស់លោក Comey បានដាក់ពាក្យស្នើសុំទៅកាន់ចៅក្រមរួចជាស្រេច ដើម្បីច្រានចោលសំណុំរឿងនេះ ដោយលើកហេតុផលថា ចំណាត់ការផ្លូវច្បាប់នេះធ្វើឡើង មិនត្រឹមត្រូវតាមនីតិវិធីច្បាប់នោះឡើយ។
សំណុំរឿងថ្មីនេះបានបន្ថែមបន្ទុកលើសមរភូមិផ្លូវច្បាប់ដែលលោក Comey កំពុងប្រឈមមុខ ខណៈដែលក្រសួងយុត្តិធម៌ធ្លាប់បានចោទប្រកាន់រូបលោករួចមកហើយចំនួនពីរករណី៖
- សំណុំរឿងផ្តល់សក្ខីកម្មមិនពិត៖ ចោទប្រកាន់ពីបទកុហកសភាទាក់ទងនឹងការលេចធ្លាយព័ត៌មានទៅកាន់ប្រព័ន្ធផ្សព្វផ្សាយ (សំណុំរឿងនេះត្រូវបានចៅក្រមសម្រេចច្រានចោលរួចហើយ)។
- សំណុំរឿងគំរាមកំហែង៖ ចោទប្រកាន់ពីបទគំរាមកំហែងដល់ប្រធានាធិបតី Donald Trump នៅក្នុងការបង្ហោះលើបណ្តាញសង្គម (សំណុំរឿងនេះកំពុងស្ថិតក្នុងដំណើរការនីតិវិធីតុលាការនៅឡើយ)។
ឆ្លើយតបទៅនឹងយុទ្ធសាស្ត្រផ្លូវច្បាប់ក្នុងការទប់ស្កាត់ការផុតកំណត់អាជ្ញាយុកាល អ្នកនាំពាក្យក្រសួងយុត្តិធម៌បានបញ្ជាក់ថា នេះជា «ការអនុវត្តទូទៅដែលត្រូវបានទទួលស្គាល់យ៉ាងទូលំទូលាយនៅក្នុងតុលាការសហព័ន្ធ»។ អ្នកនាំពាក្យរូបនេះបានបន្ថែមថា «នេះគឺជាការស៊ើបអង្កេតព្រហ្មទណ្ឌដែលកំពុងបន្តដំណើរការ ហើយយើងនឹងមិនធ្វើអត្ថាធិប្បាយបន្ថែមលើសពីនេះឡើយ»។
ប្រែសម្រួល៖ គីរី
