ភ្នំពេញ៖ បុរសម្នាក់ បានឡើងដើមអម្ពិល បេះផ្លែលក់ បណ្តាលឲ្យធ្លាក់បាក់កស្លាប់ នៅនឹងកន្លែងកើតហេតុ កាលពីរសៀលថ្ងៃទី៧ ខែវិច្ឆិកា ឆ្នាំ២០១៩ ស្ថិតក្នុងភូមិស្វាយពក ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង ។
សមត្ថកិច្ចបានឲ្យដឹងថា សពជនរងគ្រោះមានឈ្មោះ វឿន ចំរើន ភេទប្រុស អាយុ៣៨ឆ្នាំ រស់នៅភូមិ/ឃុំកើតហេតុខាងលើ ។ នៅមុនពេលកើតហេតុ គេបានឃើញជនរងគ្រោះឡើងដើមអម្ពិល ដើម្បីបេះផ្លែយកទៅលក់នៅឯផ្សារ ។ ពេលឡើងដល់ចុងអម្ពិលនោះ សង្ស័យរអិលជើង ធ្លាក់ជនរងគ្រោះដល់ដី បណ្តាលឲ្យបាក់កស្លាប់ ភ្លាមមួយរំពេចតែម្តង ។
ក្រោយកើតហេតុ សមត្ថកិច្ចបានចុះទៅពិនិត្យ មើលសាកសព ដើម្បីធ្វើកោសល្យវិច្ច័យហើយបានបញ្ជាក់ថា ជនរងគ្រោះបានធ្លាក់ពីលើដើមអម្ពិល បាក់កស្លាប់ពិតប្រាកដមែន ។ បន្ទាប់មក ក៏បានប្រគល់សពជនរងគ្រោះ ទៅឲ្យក្រុមគ្រួសារចាត់ចែង ធ្វើពិធីបុណ្យតាមប្រពៃណី ៕
