ព័ត៌មានជាតិ

ភាគីពាក់ព័ន្ធ នឹងរៀបចំ អបអរសាទរ ទិវាពិភពលោក ប្រយុទ្ធជំងឺអេដស៍ ឆ្នាំ២០១៩



ភ្នំពេញ ៖ អង្គការមូលនិធិថែទាំសុខភាពអ្នកជំងឺអេដស៍ (AHF) រួមជាមួយរាជរដ្ឋាភិបាល និងអង្គការសង្គមស៊ីវិលជុំវិញពិភពលោក នឹងរៀបចំពិធីអបអរសាទរ ទិវាពិភពលោកប្រយុទ្ធនឹងជំងឺអេដស៍ឆ្នាំ២០១៩ នៅថ្ងៃទី១ ខែ ធ្នូ ឆ្នាំ២០១៩ ខាងមុខ ដើម្បីធ្វើការអំពាវនាវសារជាថ្មីដល់ថ្នាក់ដឹកនាំទូទាំងពិភពលោកបន្ត «រក្សាសន្យា» ដល់មនុស្សដែលរងផលប៉ះពាល់ដោយសារមេរោគអេដស៍ និងជំងឺអេដស៍។

ទិវាពិភពលោកប្រយុទ្ធនឹងជំងឺអេដស៍ឆ្នាំ២០១៩ នឹងមាន ប្រទេសចំនួន៤៣ ដែលអង្គការ AHF កំពុងធ្វើប្រតិបត្តិការធ្វើការរៀបចំព្រឹត្តិការណ៍ និងកម្មវិធីផ្សេងៗ ពេញមួយ សប្តាហ៍ ដោយមានការប្រគំតន្ត្រីឥតគិតថ្លៃ ការប្រកួតកីឡា ការសម្តែង និងសកម្មភាពផ្សេងៗ រួមមាន៖ការដើរព្យុះហយាត្រា ការដង្ហែក្បួន ការបង្ហាញម៉ូត និងសកម្មភាពនានានៅតាមទីសាធារណៈផងដែរ។

ទិវាពិភពលោកប្រយុទ្ធ នឹងជំងឺអេដស៍ឆ្នាំ២០១៩ នឹង ប្រារព្ធ ឡេីង នៅ មជ្ឈមណ្ឌលពិព័រណ៍កោះពេជ្រ។ សម្រាប់ព្រឹត្តិការណ៍សំខាន់ប្រចាំឆ្នាំនេះ នឹងមានវត្តមានចូលរួមពីភ្ញៀវកិត្តិយសក្នុងកម្មវិធីសន្និសីទសារព័ត៌មាន «រក្សាសន្យា» ចំពោះមេរោគអេដស៍ និងជំងឺអេដស៍ និងការដើរក្បួន នៅមជ្ឈមណ្ឌលពិព័រណ៍កោះពេជ្រ ការរាំ Flash Mob ការប្រគំតន្រ្តីដោយតារាចម្រៀងល្បី តារាកំប្លែង និងកម្មវិធីប្លែកៗជាច្រើន រួមនឹងការធ្វើតេស្តឈាម រកមេរោគអេដស៍ និងចែកស្រោមអនាម័យដោយឥតគិតថ្លៃផងដែរ។ ការប្រគំតន្រ្តីនេះគឺបើកឲ្យចូលរួមទស្សនាដោយសេរី និងមិនគិតថ្លៃ។

លោកស្រីវេជ្ជ ហួយ ស៊ីខេង ប្រធានគ្រប់គ្រងកម្មវិធីអង្គការ AHF បានឲ្យដឹងថា ទិវាពិភពលោកប្រយុទ្ធនឹងជំងឺអេដស៍ជាការអំពាវនាវដល់ថ្នាក់ដឹកនាំ ពិភពលោកទាំងមូល ឲ្យ បន្តចូលរួមក្នុងយុទ្ធនាការប្រយុទ្ធមេរោគអេដស៍ ព្រោះនៅមានជីវិតមនុស្សរាប់លាននាក់ទៀត ដែលត្រូវការជួយសង្គ្រោះ និងយកចិត្តទុកដាក់ពី បញ្ហាមេរោគអេដស៍ និងជំងឺអេដស៍។ នៅកម្ពុជា ជាមួយការគាំទ្រពីរាជរដ្ឋាភិបាលនិងការងារជាដៃគូជាមួយអង្គការក្រៅរដ្ឋាភិបាល សង្គមស៊ីវិល និងស្ថាប័នពាក់ព័ន្ធនានា បាននិងកំពុងបន្តការងារយ៉ាង ពេញទំហឹងក្នុងការជួយសង្គ្រោះជីវិត ព្យាបាល និងថែទាំដល់អ្នករស់នៅជាមួយមេរោគអេដស៍។

លោក Michael Weinstein ប្រមុខដឹកនាំអង្គការ AHF សកល បានដឹងដែរថា ជាមួយសមិទ្ធផលជោគជ័យ ដែលទទួលបានពីគម្រោងបំពេញបន្ថែមលើកទី៦ របស់មូលនិធិ សកល ក្នុងយុទ្ធនាការប្រយុទ្ធនឹងជំងឺអេដស៍ រោគរបេង និងជំងឺគ្រុនចាញ់ក្នុងខែតុលា គឺកំពុងតែធ្វើការនៅលើយុទ្ធ សាស្ត្រមួយ ដែលត្រឹមត្រូវក្នុងការលុបបំបាត់ និងការពារការរីករាលដាលនៃជំងឺទាំងអស់នោះ។ ប៉ុន្តែប្រទេសទាំងអស់មិនត្រូវឈប់ត្រឹមនេះទេ ជាពិសេសអ្នកដែលមិនទាន់បានចូលរួម ហើយត្រូវធ្វើគ្រប់យ៉ាងដែលអាចធ្វើទៅបាន ដើម្បីជួយគាំទ្រដល់មូលនិធិក្នុងការស្វែងរកជំនួយឲ្យបានគ្រប់ ១៨ពាន់លានដុល្លារ សម្រាប់គម្រោងបន្ទាប់។

លោកបានបន្ថែមថា ជាក់ ស្តែងលុយពិតជាមានសារៈសំខាន់ ប៉ុន្តែការរក្សាសន្យាក្នុងការប្រយុទ្ធនឹងជំងឺអេដស៍ កាន់តែមានសារៈសំខាន់ ដែលត្រូវតែដឹង ពីចំនួនអ្នកជំងឺនៅតាមបណ្តាប្រទេសនីមួយៗ និងទូទាំងពិភពលោកឲ្យបានច្បាស់លាស់ ដើម្បីអាចឲ្យធ្វើការកំណត់គោលដៅ បានត្រឹមត្រូវក្នុងការផ្តល់ការគាំទ្រ។

លោកថា “ការបញ្ចប់មេរោគអេដស៍ពីពិភពលោក គឺអាចទៅរួច ប៉ុន្តែយើងត្រូវការសហការពីសហគមន៍សុខភាពសកល រដ្ឋាភិបាល និងអង្គការសង្គមស៊ីវិល ដើម្បីចូលរួមធ្វើការជាមួយគ្នា ប្រកបដោយភាពឆ្លាតវៃក្នុងការសម្រេចការងារនេះ»។

យោងតាមស្ថិតិចុងក្រោយរបស់អង្គការ UNAIDS មានមនុស្សចំនួន ៣៧.៩លាននាក់នៅជុំវិញពិភពលោក កំពុងរស់នៅជាមួយមេរោគអេដស៍ និងជំងឺអេដស៍ ហើយសម្រាប់ឆ្នាំ២០១៨ មានមនុស្សប្រមាណ ១.៧លាននាក់ បានឆ្លងមេរោគអេដស៍ថ្មី និង ៧៧០,០០០នាក់បានស្លាប់ ដោយសារជំងឺផ្សេងៗ ដែលពាក់ព័ន្ធនឹង ជំងឺអេដស៍។ ក្នុងពេលបច្ចុប្បន្ន ខណៈពេលដែលមនុស្សរាប់លានកំពុងទទួលការព្យាបាលដោយឱសថប្រឆាំងមេរោគអេដស៍ គឺមានមនុស្សរាប់លាននាក់ផ្សេងទៀត កំពុងត្រូវការជួយសង្គ្រោះជាបន្ទាន់ផងដែរ៕



To Top
×