ភ្នំពេញ៖ នាយឧត្តមសេនីយ៍ផុតលេខ Min Aung Hlaing អគ្គមេបញ្ជាការនៃ កងកម្លាំងការពារជាតិមីយ៉ាន់ម៉ា បានចាត់ទុកដំណើរទស្សនកិច្ចផ្លូវការ របស់នាយឧត្តមសេនីយ៍ វង្ស ពិសេន អគ្គមេបញ្ជាការនៃ កងយោធពលខេមរភូមិន្ទទៅកាន់ ទីក្រុងណៃពិដោរនាពេលនេះគឺជាដំណើរទស្សនកិច្ច ជាប្រវត្តិសាស្រ្តដំបូងបង្អស់ក្នុងទំនាក់ទំនងការទូត រវាងប្រទេសកម្ពុជា-មីយ៉ាន់ម៉ា រយៈពេល៦៥ឆ្នាំកន្លងមកនេះ។ នេះបើយោងតាមអគ្គបញ្ជាការដ្ឋាន នៃកងយោធពលខេមរភូមិន្ទ។
ក្នុងជំនួបជាមួយ នាយឧត្តមសេនីយ៍ផុតលេខ Min Aung Hlaing អគ្គមេបញ្ជាការនៃ កងកម្លាំងការពារជាតិមីយ៉ាន់ម៉ា នៅឯទីក្រុងណៃពិដោរកាលពីថ្ងៃទី១៤ ខែមករា ឆ្នាំ២០២០ នាយឧត្តមសេនីយ៍ វង្ស ពិសេន អគ្គមេបញ្ជាការនៃ កងយោធពលខេមរភូមិន្ទបានមានប្រសាសន៍ថា ឆ្នាំ២០២០នេះ គឺជាខួបលើកទី៦៥នៃទំនាក់ទំនងការទូតរវាងប្រទេសកម្ពុជា-មីយ៉ាន់ម៉ា។ ដោយយោងតាមគោលបំណងរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចង់ឱ្យមានការរៀបចំ ប្រារព្ធពិធីរំលឹកខួបលើកទី៦៥នេះ ឱ្យបានពិសេស ហេតុដូច្នេះហើយ ដើម្បីជាសក្ខីភាពក្នុងការពង្រឹងទំនាក់ទំនង កិច្ចសហប្រតិបត្តិការ រវាងប្រទេសទាំងពីរនាយឧត្តមសេនីយ៍ ក៏បានដឹកនាំប្រតិភូមក ទស្សនកិច្ចផ្លូវការនៅប្រទេសមីយ៉ាន់ម៉ា នាពេលនេះ។
នាយឧត្តមសេនីយ៍ វង្ស ពិសេនបានបន្តទៀតថាក្នុងដំណើរទស្សនកិច្ចនេះមានគោលបំណង ចង់ពង្រឹងពង្រីកកិច្ចសហប្រតិបត្តិការក្នុងវិស័យកងទ័ព នៃប្រទេសទាំងពីរឱ្យកាន់តែរឹងមាំ ដោយក្នុងនោះ នាយឧត្តមសេនីយ៍ វង្ស ពិសេន ស្នើឱ្យមានទំនាក់ទំនងកិច្ចសហប្រតិបត្តិការល្អជាមួយគ្នា លើការផ្លាស់ប្តូរព័ត៌មានការងារសន្តិសុខ ការរួមគ្នាបង្ក្រាបបទល្មើសឆ្លងដែន ភេរវកម្ម ការជួញដូរមនុស្ស ការជួញដូរគ្រឿងញៀន ការជួញដូរអាវុធ និងបន្តបន្ថែមការបណ្តុះបណ្តាលធនធានមនុស្ស។
ជាកិច្ចឆ្លើយតប នាយឧត្តមសេនីយ៍ផុតលេខ Min Aung Hlaing បានមានប្រសាសន៍ថា នេះជាប្រវត្តិសាស្ត្រក្នុងរយៈកាល ៦៥ឆ្នាំនេះ ដែលនេះជាលើកទីមួយ អគ្គមេបញ្ជាការនៃ កងយោធពលខេមរភូមិន្ទ មកទស្សនកិច្ច នៅប្រទេសមីយ៉ានម៉ា។ នាយឧត្តមសេនីយ៍ផុតលេខ បានឯកភាពនូវអ្វីដែល នាយឧត្តមសេនីយ៍ វង្ស ពិសេន បានលើកឡើងលើ កិច្ចសហប្រតិបត្តិការ នៃកងទ័ពទាំងពីរ។
ជាមួយគ្នានោះដែរនាយឧត្តមសេនីយ៍ វង្ស ពិសេន ក៏បានបន្តចូលជួបសម្តែងការគួរសមចំពោះលោកស្រី អោង សាន ស៊ូជី ជាទីប្រឹក្សារដ្ឋ និងជារដ្ឋមន្ត្រីការបរទេស នៃប្រទេសមីយ៉ាន់ម៉ា។
ជាបឋម នាយឧត្តមសេនីយ៍ វង្ស ពិសេន បាននាំមកនូវការផ្តាំផ្ញើសួរសុខទុក្ខពី សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចំពោះលោកស្រី អោង សាន ស៊ូជី។
នាយឧត្តមសេនីយ៍បានបញ្ជាក់ថា ដើម្បីឆ្លើយតបតាមគោលគំនិតរបស់សម្តេចតេជោ ហ៊ុន សែន អំពីខួបលើកទី៦៥ នៃទំនាក់ទំនងការទូតកម្ពុជា-មីយ៉ាន់ម៉ា នាយឧត្តមសេនីយ៍ក៏បាន បង្កើតព្រឹត្តិការណ៍ប្រវត្តិសាស្ត្រមួយ គឺទស្សនកិច្ចផ្លូវការ រវាងអគ្គមេបញ្ជាការ កងយោធពលខេមរភូមិន្ទ និងអគ្គមេបញ្ជាការ កងកម្លាំងការពារជាតិមីយ៉ាន់ម៉ា ដើម្បីជាសក្ខីភាពក្នុងការពង្រឹង កិច្ចសហប្រតិបត្តិការរវាងប្រទេសទាំងពីរ។
នាយឧត្តមសេនីយ៍ វង្ស ពិសេនក៏បានសំណូមពរលោកស្រី អោង សាន ស៊ូជី ក្នុងការចូលរួមកិច្ចប្រជុំអាស៊ី អឺរ៉ុប ឆ្នាំ២០២០នេះ តាមការអញ្ជើញរបស់រាជរដ្ឋាភិបាលកម្ពុជា។ ជាកិច្ចឆ្លើយតប លោកស្រី បានយល់ព្រមក្នុងការចូលរួមកិច្ចប្រជុំអាស៊ី អឺរ៉ុប ដែលកម្ពុជានឹងធ្វើជាម្ចាស់ផ្ទះ៕
