ភ្នំពេញ៖ ក្រសួងធនធានទឹក និងឧតុនិយម បានប្រកាសឲ្យដឹងថា នៅតំបន់មួយចំនួន នឹងចុះត្រជាក់ពី១៩អង្សាសេ ចាប់ពីថ្ងៃទី២១-២៧ ខែមករា ឆ្នាំ២០២០ ។
យោងតាមសេចក្តីជូនដំណឹង ស្តីពីស្ថានភាពធាតុអាកាស នៅថ្ងៃ២១ មករា នេះបានឲ្យដឹងថា តាមរយៈការតាមដានស្ថានភាព អាកាសធាតុជាប់ជាបន្តសង្កេតឃើញ ឥទ្ធិពលជ្រលងសម្ពាធខ្ពស់ និងខ្យល់មូសុងឦសានខ្សោយគ្របដណ្តប់លើកម្ពុជា ។
ក្រសួងបន្តថា ស្ថានភាពបែបនេះ ធ្វើឲ្យចាប់ពីថ្ងៃទី២១-២៧ មករា តំបន់ជួរភ្នំដងរែក និងខ្ពង់រាបឦសាន មានសីតុណ្ហភាពអប្បបរមាពី១៩-២២°C ហើយសីតុណ្ហភាពអតិបរមា ពី២៩-៣១°C។
តំបន់វាលទំនាបកណ្តាល មានសីតុណ្ហភាពអប្បបរមាពី២២-២៤°C និងសីតុណ្ហភាពអតិបរមាពី៣២-៣៤°C ។
ចំពោះតំបន់មាត់សមុទ្រមាន សីតុណ្ហភាពអប្បបរមា ពី២២-២៤°C និងសីតុណ្ហភាពអតិបរមា ពី៣១-៣៣°C។
ជាមួយគ្នានោះដែរ ក្រសួងបានឲ្យដឹងថា នៅបណ្តាខេត្តមាត់សមុទ្រ អាចមានភ្លៀងក្នុងកម្រិតតិចតួច ៕
