ភ្នំពេញ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានលើកឡើងថា ការទម្លាយសំឡេងសម្ងាត់ថា ថ្នាក់ដឹកនាំគណបក្សកាន់អំណាចមាន ទំនាក់ទំនងជាមួយថ្នាក់ដឹកនាំអតីតគណបក្សសង្រ្គោះជាតិ គឺជាឧបាយកល បំបែកបំបាក់ផ្ទៃក្នុងបក្សកាន់អំណាច។
លោក សុខ ឥសាន តាមរយៈបណ្តាញតេឡេក្រាមនៅថ្ងៃទី៩ ខែកុម្ភៈ ឆ្នាំ២០២០ថា “ការទម្លាយការសម្ងាត់ថាមានទំនាក់ទំនងជាមួយថ្នាក់ដឹកនាំគណបក្សប្រជាជនកម្ពុជា គឺជាឧបាយកលទុច្ចរិតចង់បំបែកបំបាក់ផ្ទៃក្នុងគណបក្ស ប្រជាជនកម្ពុជាដែលមិនអាចទៅរួច” ។
បើតាមការផ្សព្វផ្សាយវិទ្យុបារាំងអន្តរជាតិ សំឡេងបែកធ្លាយដែលគេស្គាល់ថា ជាសំឡេងរបស់អ្នកតំណាងរាស្ត្រ អតីតគណបក្សប្រឆាំងម្នាក់ បានលើកឡើងថា គណបក្សកាន់អំណាចនិងអតីតគណបក្សប្រឆាំង កំពុងស្វែងរកការចរចាគ្នាមួយ នៅមុនសេចក្តីសម្រេចលើ ការដកប្រព័ន្ធអនុគ្រោះពន្ធគ្រប់ប្រភេទ(EBA)។
ការចរចាគ្នា ធ្វើឡើងរវាងប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ជាមួយលោក សម រង្ស៊ី ដោយមានការចូលរួមពីភាគីអន្តរជាតិផង។
សំឡេងបែកធ្លាយនេះ ត្រូវបានគេស្គាល់ថា ជាសំឡេងរបស់លោក ម៉ែន សុថាវរិន្ទ្រ អតីតអ្នកតំណាងរាស្ត្រអតីតគណបក្សស ង្គ្រោះជាតិ ដែលត្រូវបានទម្លាយដោយបុរស ម្នាក់ឈ្មោះ ជា និច្ច។ តាមរយៈបទសម្ភាសន៍ជាមួយទូរទស្សន៍ព្រះអាទិត្យ លោក ម៉ែន សុថាវរិន្ទ្រ បានទទួលស្គាល់ ថា ជាសំឡេងរបស់លោកពិតប្រាកដមែន។ សំឡេងនេះ ត្រូវបានថតដោយបុរសម្នាក់ឈ្មោះ ជា និច្ច ដែលគេមិនដឹងថា មានតួនាទីអ្វីនៅក្នុងគណបក្សកាន់អំណាច ឬ ក្នុងអតីតគណបក្សប្រឆាំងនោះឡើយ។
តាមការកំណត់EBA នឹងត្រូវគណៈកម្មាធិការសហភាពអឺរ៉ុប សម្រេចដក ឬមិនដកនៅថ្ងៃ១២ កុម្ភៈនេះហើយ ប្រសិនរកឃើញថា កម្ពុជាពិតជារំលោភសិទ្ធិមនុស្ស និងលទ្ធិប្រជាធិបតេយ្យ៕
