អាជ្ញាធរខេត្តកំពង់ចាម ជូនដំណើរ ភ្ញៀវទេសចរ ៥៣នាក់ ត្រឡប់ទៅស្រុកកំណើតវិញ បន្ទាប់ពីក្រសួងសុខាភិបាល ធ្វើតេស្តអវិជ្ជមាន ជំងឺCovid-19

កំពង់ចាម ៖ អាជ្ញាធរខេត្តកំពង់ចាម នៅរសៀលថ្ងៃទី ២៤ ខែមីនាឆ្នាំ ២០២០ បានជូនដំណើរភ្ញៀវទេសចរណ៍ ចំនួន ៥៣នាក់ ត្រឡប់ទៅស្រុកកំណើតវិញ ក្រោយពេលមានការអនុញ្ញាតពីក្រសួង សុខាភិបាល ធ្វើតេស្តអវិជ្ជមាន ជំងឺ Covid-19 ។

ខណ:ពេលជូនដំណើរភ្ញៀវ អភិបាលខេត្តកំពង់ចាម លោក អ៊ុន ចាន់ដា បានមានប្រសាសន៍ថា ការដែលយើងបានមកជូនដំណើរពួកគាត់ពីសណ្ឋាគារ មេគង្គ មកដល់ នាវា ព្រោះក្រសួងសុខាភិបាលប្រទេសកម្ពុជា បានអនុញ្ញាតឱ្យពួកគាត់ត្រឡប់ទៅប្រទេសពួកគាត់ រៀងៗ ខ្លួន វិញ ក្រោយលទ្ធផល ធ្វើតេស្តសុខភាពទាំង ៥៣នាក់ គ្មានមេរោគ Covid-19នោះទេ ក្រោយពី បាន សម្រាក ស្ថិតក្នុងការតាម ដានចំនួន ១៤ ថ្ងៃ បានកន្លងផុត។

ជាមួយគ្នានេះ លោក អភិបាលខេត្ត បាន ឱ្យដឹងដែរថា ប៉ុន្តែអ្នកដំណើរលើនាវា VIKINGCRUISEJOURNEY នេះចំនួន ៤នាក់ផ្សេងទៀត គឺក្រសួងសុខា ភិបាល នៅមិនទាន់មានការអនុញ្ញាតឱ្យចាកចេញបានទេ ដោយស្ថិតក្នុងការតាមដានសុខភាពបន្តទៀត ស្នាក់នៅមន្ទីរពេទ្យបង្អែកខេត្តកំពង់ចាម។

គូររំលឹកដែរថា ក្រុមភ្ញៀវទេសចរ និងអ្នកបម្រើការងារនៅលើនាវា Viking Cruise Journey ចំនួន ៥៧នាក់ត្រូវបញ្ជូនចេញពីនាវា នៅរសៀលថ្ងៃទី១២ ខែមីនា ឆ្នាំ២០២០ ឲ្យមកស្នាក់នៅ ក្នុងសណ្ឋាគារមេគង្គ ដើម្បីតាមដាន និងទុកដាច់ដោយឡែកក្នុងរយៈពេល ១៤ថ្ងៃ បើទោះបីលទ្ធផលតេស្ត ដំបូងរបស់ពួកគេអវិជ្ជមាន COVID-19 ក៏ដោយនោះ។

ការសម្រចវិធានការបែបនោះ ក្រោយពេលដែលជនជាតិអង់គ្លេសចំនួន ៣នាក់ នៅលើនាវាមួយគ្នា ត្រូវបានរកឃើញថា បានឆ្លង COVID-19។