ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានថ្លែងថា នៅក្នុងយុទ្ធនាការដោះស្រាយ សំណុំរឿងកកស្ទះ នៅតាមសាលាដំបូងរាជធានី-ខេត្ត តុលាការអាចនឹង ដោះលែងអ្នកទោស ចំពោះអ្នកទោសណាអនុវត្តទោសជិតចប់ និងត្រឹមត្រូវ។
ក្នុងកិច្ចប្រជុំផ្សព្វផ្សាយ របាយការណ៍ជាតិការងារ ប្រយុទ្ធប្រឆាំងអំពើជួញដូរមនុស្ស ឆ្នាំ២០១៩ និងលើកទិសដៅ ការងារឆ្នាំ២០២០ របស់គ.ជ.ប.ជនៅថ្ងៃទី២៧ ខែឧសភា ឆ្នាំ២០២០ សម្ដេចក្រឡាហោម ស ខេង បានឲ្យដឹងថា យុទ្ធនាការដោះ ស្រាយសំណុំរឿងកកស្ទះ របស់ក្រសួងយុត្តិធម៌នេះ គឺមានសារៈសំខាន់ និងមានអត្ថន័យយ៉ាងជ្រាលជ្រៅ ដល់កិត្យានុភាពរបស់កម្ពុជា។
សម្ដេចបន្ថែមថា សម្រាប់យុទ្ធនាការនេះ ក៏បានចូលរួម ដោះស្រាយបញ្ហាជាច្រើន ដល់រាជរដ្ឋាភិបាល រួមមាន ភាពចង្អៀតណែនក្នុងពន្ធនាគារ និងជួយកាត់បន្ថយការ ចំណាយថវិកា ក្នុងការផ្គត់ផ្គង់អ្នកជាប់ទោស រួមទាំង បញ្ហាសិទ្ធិមនុស្ស ផងដែរ។
សម្ដេចក្រឡាហោម មានប្រសាសន៍ថា «សូមស្នើដល់សមត្ថកិច្ចពាក់ព័ន្ធទាំងឡាយ រដ្ឋបាល ថ្នាក់ក្រោម ជាពិសេស ក្នុងយុទ្ធនាការនេះ វាអាចថា អ្នកដែលជាប់ទោស ហើយអនុវត្តទោសបានជិតចប់ ប្រហែលជាតុលាការអាចហ្នឹងដោះលែង មិនថា ប្រភេទបទល្មើសណាទេ ប៉ុន្ដែសំខាន់បទល្មើស្រាល មិនមែនជាឧក្រិដ្ឋទេ»។
សម្ដេចក្រឡាហោមបន្ដថា ត្រូវធ្វើបញ្ជីឲ្យបានជាក់លាក់ចំពោះឈ្មោះ អ្នកជាប់ទោស ដើម្បីជួយក្នុងការគ្រប់គ្រង អ្នកដែលត្រូវដោះលែង ឬអ្នកបន្ធូបន្ថយ។ សម្ដេចស្នើដល់អាជ្ញាធរមូលដ្ឋាន ត្រូវធ្វើយ៉ាងណាគ្រប់គ្រង ឲ្យបាននូវរាល់អ្នកជាប់ឃុំទាំងអស់ ដែលក្រសួងយុត្តិធម៌ សម្រេចសម្រាលបន្ធូបន្ថយទោស ហើយដោះលែង ទៅតាមមូលដ្ឋានរបស់ខ្លួន។
ពាក់ព័ន្ធនឹងចំណុចនេះ លោក កើត រិទ្ធ រដ្ឋមន្ត្រីក្រសួង យុត្តិធម៌ លើកឡើងថា ការអនុវត្តទាំងអស់នេះ ត្រូវធ្វើតាមនីតិវិធីច្បាប់ ក្នុងករណីបទល្មើសស្រាល ប៉ុន្តែត្រូវព្យាយាម គ្រប់គ្រងមុខសញ្ញាថា «គាត់បានកែប្រែខ្លួន ឬយ៉ាងណា ប្រសិនបើមិនកែប្រែខ្លួនទេ ច្បាប់ត្រូវនឹងអនុវត្តបន្តទៀត»។
សូមរំលឹកថា កាលពីថ្ងៃទី១៨ ខែឧសភា ឆ្នាំ២០២០ ក្រសួងយុត្តិធម៌ បានដាក់ឲ្យដំណើរការបើក យុទ្ធនាការដោះស្រាយ ការកកស្ទះសំណុំរឿង នៅតាមសាលាដំបូង រាជធានី-ខេត្ត៕
ដោយ ៖ អេង ប៊ូឆេង
