ព័ត៌មានជាតិ

រាជរដ្ឋាភិបាល បញ្ចេញកញ្ចប់ថវិកា ដើម្បីលើកកម្ពស់សមត្ថភាព គ្រប់គ្រងសំរាម និងអនាម័យ ជូនប្រជាពលរដ្ឋ

ភ្នំពេញ៖ លោក កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន បានឲ្យដឹងថា រាជរដ្ឋាភិបាលបញ្ចេញ កញ្ចប់ថវិការបស់ខ្លួន ដើម្បីលើកកម្ពស់សមត្ថភាព គ្រប់គ្រងសំរាម និងអនាម័យជូនប្រជាពលរដ្ឋ និងធ្វើឲ្យសុខមាលភាពសាធារណៈ និងបរិស្ថានកាន់តែមាន ភាពប្រសើរឡើង។

ក្នុងប្រជុំពិនិត្យមើលវឌ្ឍនភាព នៃការអនុវត្តអនុគម្រោង សាងសង់ទីលានចាក់សំរាម នៅខេត្តព្រះសីហនុ លើផ្ទៃដី១៧,៣៣ហិកតា គ្រោងចំណាយទឹកប្រាក់ ចំនួន ៥.៣១៣.៤៦៣ ដុល្លារក្របខណ្ឌថវិកាជាតិ កាលពីថ្ងៃទី២១ ខែកក្កដា ឆ្នាំ២០២០ លោក កឹម បូរី បានគូសបញ្ជាក់អំពីសារសំខាន់នៃការ តាមដាននិងវាយតម្លៃផែនការ សកម្មភាពឲ្យបានគ្រប់ជ្រុងជ្រោយ ដើម្បីសម្រេចគោលដៅ តាមការគ្រោងទុក និងបានណែនាំឲ្យសមាជិក សមាជិកានៃគណៈកម្មការគ្រប់គ្រង ការងារអនុគម្រោងសាងសង់ ទីលានចាក់សំរាម បង្កើនកិច្ចសហការឱ្យបានជិតស្និទ្ធ ពីគ្រប់ភាគីពាក់ព័ន្ធទាំងអស់ ទាំងផ្នែកហិរញ្ញវត្ថុ និង បច្ចេកទេស ដើម្បីធានាឱ្យគម្រោងដំណើរការ ទៅប្រកបដោយភាពរលូន។

លោក បានថ្លែងថា «រាជរដ្ឋាភិបាលបានសម្រេច បញ្ចេញកញ្ចប់ថវិការបស់ ខ្លួនដើម្បីលើកកម្ពស់ សមត្ថភាពគ្រប់គ្រងសំរាម និងអនាម័យជូនប្រជាពលរដ្ឋ និងធ្វើឱ្យសុខមាលភាព សាធារណៈ និងបរិស្ថានកាន់តែមានភាពប្រសើរឡើង ឆ្លើយតបទៅនឹងការរីកចម្រើន យ៉ាងឆាប់រហ័ស នៅក្នុងខេត្តព្រះសីហនុ»។

លោកកោតសរសើរដល់ គណៈកម្មការគ្រប់គ្រងការងារអនុ គម្រោងសាងសង់ទីលានចាក់សំរាម ដែលបានខិតខំប្រឹងប្រែង បំពេញភារកិច្ចរបស់ខ្លួនប្រកបដោយ ស្មារតីទទួលខុសត្រូវខ្ពស់ និងស្នើឱ្យធ្វើរបាយការណ៍វឌ្ឍនភាព គម្រោងប្រចាំខែឱ្យបានទៀងទាត់ផងដែរ។

សូមជម្រាបថា កិច្ចប្រជុំនេះធ្វើឡើងក្នុងគោលបំណង ពិនិត្យមើលវឌ្ឍនភាពគម្រោងសាងសង់ ទីលានចាក់សំរាមក្នុងខេត្ត ព្រះសីហនុដែលអនុវត្តដោយក្រុមហ៊ុន ហេង សម្បត្តិ អាហរ័ណ នីហរ័ណ ក្នុងទំហំទឹកប្រាក់ចំនួន ៥.៣១៣.៤៦៣ ដុល្លារសហអាមេរិក ជាថវិកាជាតិសម្រាប់ឆ្នាំ២០២០ មានរយៈពេលសាងសង់ ១៧ខែ គិតចាប់ពីថ្ងៃទី០១ ខែកក្កដា ឆ្នាំ២០២០ លើផ្ទៃដី ១៧,៣៣ហិកតា លើផ្ទៃដីសរុប ៥១ ហិកតាដែល រដ្ឋបាលខេត្តព្រះសីហនុផ្តល់ជូន ឋិតនៅភូមិអូតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ និងមានចម្ងាយប្រមាណ ៣គីឡូម៉ែត្រ ពីផ្លូវជាតិលេខ៤។

គម្រោងទីលានចាក់សំរាមថ្មីនេះ សាងសង់ឡើងដើម្បីបំពេញ តម្រូវការរយៈពេល ៥ឆ្នាំដំបូង មានសមត្ថភាពអាចផ្ទុកសំរាមបានចំនួន ៨៨៤.០៨៨ ម៉ែត្រគីប មានរណ្ដៅចំនួនបួន រណ្ដៅនីមួយៗមាន ទទឹងគិតជាមធ្យម១៣០ ម៉ែត្រ និងបណ្ដោយ១៥០ម៉ែត្រ ជម្រៅចាប់ពី២-៤ម៉ែត្រ មានប្រព័ន្ធរំដោះទឹកភ្លៀង ចាប់ពីបាតរណ្ដៅ ប្រព័ន្ធប្រមូលទឹកកខ្វក់ពីរណ្ដៅចាក់សំរាម បំពង់បញ្ចេញឧស្ម័នពុលផងដែរ ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top