ស្វាយរៀង ៖ កម្លាំងផ្នែកប្រឆាំងគ្រឿងញៀន ក្រុងស្វាយរៀង សហការជាមួយកម្លាំង ជំនាញការិយាល័យ ប្រឆាំង គ្រឿងញៀនខេត្ត បានបង្រ្កាបករណីជួញដូរគ្រឿងញៀន ឃាត់ខ្លួនជនសង្ស័យបានចំនួន ២ នាក់រួមនិងវត្ថុតាង ថ្នាំញៀនមួយចំនួន។
សមត្ថកិច្ចបានឲ្យដឹងថា កាលពីវេលាម៉ោង៦និង៣០នាទីថ្ងៃទី២៤ខែសីហាឆ្នាំ២០២០ កម្លាំងជំនាញបានបង្ក្រាប ករណីជួញដូរគ្រឿងញៀន នៅត្រង់ចំណុចភូមិរោងបន្លែ សង្កាត់ស្វាយរៀង ក្រុងស្វាយរៀង ធ្វើការឃាត់ខ្លួនជនសង្ស័យចំនួន ១នាក់ ធ្វើការឆែកឆេរលើដងខ្លួន នៅកន្លែងកើតហេតុ រកឃើញនិងដកហូតសម្ភារវត្ថុតាង ៖ម្ស៉ៅក្រាមពណ៌ស សង្ស័យជាថ្នាំញៀនចំនួន ១២កញ្ចប់-ទូរស័ព្ទចំនួន ១ គ្រឿង ។ រួចនាំមកកាន់ការិយាល័យជំនាញខេត្ត ធ្វើការសាកសួរនិងធ្វើតេស្តទឹកនោម រកសារធាតុញៀនលទ្ធផលវិជ្ជមាន។
សមត្ថកិច្ចបានបន្តថា ជនសង្ស័យមានឈ្មោះ ភ័ណ ឡាពីន ភេទប្រុស អាយុ ២៦ ឆ្នាំមុខរបរមិនពិតប្រាកដ ស្រុកកំណើតភូមិត្រពាំងថ្នា ឃុំរាជមន្ទីរ ស្រុកកំពង់រោទិ៍ ខេត្តស្វាយរៀង បច្ចុប្បន្នស្នាក់បណ្តោះអាសន្ន ភូមិរោងបន្លែ សង្កាត់ស្វាយរៀង ក្រុងស្វាយរៀង ខេត្តស្វាយរៀង ។ ជនសង្ស័យឈ្មោះ ភ័ណ ឡាពីន បានឆ្លើយសារភាពថា ថ្នាំញៀនដែលខ្លួនលក់ ចែកចាយបន្ត គឺខ្លួនទិញពីឈ្មោះ ស៊ុ ប៊ុនធឿន ស្នាក់នៅបន្ទប់ជួលលេខ៧ ស្ថិតក្នុងភូមិស្វាយរៀង សង្កាត់ស្វាយរៀង ក្រុងស្វាយរៀង ខេត្តស្វាយរៀង។
សមត្ថកិច្ចបានបន្ថែមថា ក្រោយពីបានចម្លើយសារភាព របស់ជនសង្ស័យ សមត្ថកិច្ចចុះស្រាវជ្រាវ ដល់បន្ទប់ជួលលេខ៧ ឃាត់ខ្លួនជនសង្ស័យ ១ នាក់បន្ថែមទៀត នៅវេលាម៉ោង១៧និង៥០នាទី ដោយក្នុងកិច្ចប្រតិបត្តិការនេះ មានការសម្របសម្រួលពីលោកឈីវ អ៊ិចគង់ ព្រះរាជអាជ្ញារង អមសាលាដំបូងខេត្ត និងអាជ្ញាធរមូលដ្ឋាន បានធ្វើការឆែកឆេរផ្ទះខាងលើ លទ្ធផលនៃការឆែកឆេររកឃើញ និងដក ហូតសម្ភារវត្ថុតាង ម្ស៉ៅក្រាមពណ៌សា សង្ស័យជាថ្នាំញៀនចំនួន១៦កញ្ចប់ និងម្ស៉ៅក្រមពណ៌លឿង សង្ស័យជាថ្នាំញៀនចំនួន ១ កញ្ចប់ជញ្ជីងថ្លឹងថ្នាំញៀន ១គ្រឿងនិងម៉ូតូ១គ្រឿងទូរស័ព្ទចំនួន ៣ គ្រឿង។
បច្ចុប្បន្នសមត្ថកិច្ចជំនាញ ធ្វើការឃាត់ខ្លួននិងកសាងសំណុំ រឿងតាមនីតិវិធីច្បាប់ ៕
