ក្រុមការងារគ្រូពេទ្យ របស់កងពលតូចលេខ៧០ និងមន្ទីរពេទ្យសូរិយា បានស្ម័គ្រចិត្ត​រួមគ្នា ចុះពិនិត្យព្យាបាល ជូនប្រជាពលរដ្ឋ ដោយឥតគិតថ្លៃ ដែលកំពុងទទួលរងការ លិចលង់ដោយជំនន់ទឹកភ្លៀង

(ភ្នំពេញ​)៖ ថ្ងៃ​ទី​២០ ខែតុលា​ ឆ្នាំ​២០២០ លោកឧត្តមសេនីយ៍ទោ ឈួរ សុខា មេបញ្ជាការ​រង​កងពល​តូចលេខ៧០ និងលោកស្រី ហុី សូរ្យាភា ជាប្រធានមន្ទីរពេទ្យសូរិយា រួម​ជាមួយ​លោក ហោ សេរីវឌ្ឍន៍ ប្រធានផ្នែកក្រៅប្រព័ន្ធ ជាសមាជិកអចិន្ត្រៃយ៍ នៃយុវជនគណបក្សប្រជាជនកម្ពុជាថ្នាក់កណ្តាល ព្រមទាំង​ក្រុមការងារបានចូលរួមសហការបញ្ជូនក្រុមគ្រូពេទ្យជំនាញ ដើម្បីចុះពិនិត្យព្យាបាលជំងឺ និងចែកថ្នាំជូនដោយឥតគិតថ្លៃ ជូនដល់ប្រជាពលរដ្ឋ នៅសង្កាត់ស្ពានថ្ម ខណ្ឌដង្កោ។ 

ការចុះពិនិត្យ និងព្យាបាលជំងឺជូនប្រជាពលរដ្ឋនាឱកាសនេះ រួមមាន៖ ជំងឺទូទៅ ជំងឺទូទៅផ្នែកកុមារ ជំងឺសើស្បែក និងព្យាបាលរបួស …។ល។

សូមជម្រាបថាការចុះពិនិត្យ និងព្យាបាលជំងឺជូនប្រជាពលរដ្ឋនេះគឺកើតចេញពីស្មារតីមនុស្សធម៌សុទ្ធសាធ ស្តែងចេញពីសេចក្តីស្រឡាញ់បងប្អូន ប្រជាពលរដ្ឋ ក្នុងនាមឈាមជ័រខ្មែរដូចគ្នា ខ្មែរស្រឡាញ់ខ្មែរ ខ្មែររួបរួមគ្នាតែមួយ អនាគតតែមួយ ពោលគឺការព្យាបាលមិនប្រកាន់បក្សពួក ពូជសាសន៍ សាសនា ឬនិន្នាការនយោបាយណាមួយឡើយ សំដៅចូលរួមកាត់បន្ថយភាពក្រីក្រ របស់ប្រជាពលរដ្ឋមួយចំណែកផងដែរ។ បញ្ហាសុខភាព គឺជាមូលដ្ឋានគ្រឹះដើម្បីឆ្ពោះទៅរកភាពជោគជ័យសុភមង្គល ជូនគ្រួសារ និងសង្គមជាតិ។