ព័ត៌មានជាតិ

បច្ចុប្បន្នតម្លៃត្រីកើនឡើង ក្រោយក្រសួងចាត់វិធានការ ផ្អាកនាំចូលប្រភេទត្រីមួយចំនួន

ភ្នំពេញ៖ លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា បច្ចុប្បន្នតម្លៃត្រីមានការកើនឡើងល្អប្រសើរ ដោយសារក្រសួងចាត់វិធានការ ផ្អាកនាំចូលប្រភេទត្រីមួយចំនួន ដែល ប្រជាកសិករអាចចិញ្ចឹមបាន។

ក្នុងឱកាសចុះពិនិត្យកសិដ្ឋាន ចិញ្ចឹមត្រីរបស់លោក ផាន់ ភិរម្យ ក្នុងភូមិសង្កើប ឃុំសំបូរ ស្រុកបាធាយ ខេត្តកំពង់ចាម នៅថ្ងៃទី២៣ ខែមករា ឆ្នាំ២០២១ លោក វេង សាខុន បានបញ្ជាក់ថា «សូមកោតសរសើរ និងវាយតម្លៃខ្ពស់ចំពោះការ ខិតខំប្រឹងប្រែងរបស់លោក ភិរម្យ ប្រកាន់ យករបរចិញ្ចឹមត្រីពោ ត្រីប្រា និងត្រីឆ្តោ ដើម្បីចូលរួមចំណែកបំពេញ សេចក្តីត្រូវការទីផ្សារក្នុងស្រុក ដែលចេះតែមានការកើនឡើងជាលំដាប់។ បច្ចុប្បន្ន តម្លៃត្រីគ្រប់ប្រភេទមាន ការកើនឡើងល្អប្រសើរ ដោយសារក្រសួង បានចាត់វិធានការផ្អាកការនាំចូល ប្រភេទត្រីមួយចំនួនដែល ប្រជាកសិករអាចចិញ្ចឹមបាន ហើយបាននិងកំពុងប្រមូល ចាប់ត្រីយកទៅផ្គត់ផ្គង់ឲ្យទីផ្សារ» ។

ឆ្លៀតយកឱកាសនេះ លោករដ្ឋមន្ត្រីកសិកម្ម បានអំពាវនាវ គាំទ្រ និងលើកទឹកចិត្តឱ្យវារីវប្បករកម្ពុជាត្រូវបន្តរក្សា និងខិតខំពង្រឹង ពង្រីកមុខរបរនេះបន្ថែមទាន់ ឱកាសមាសមកដល់ ដោយត្រូវសហការជាមួយ រដ្ឋបាលជលផល អនុវត្តបច្ចេកទេសឲ្យបានត្រឹមត្រូវ ចងក្រងបណ្តុំផលិត ចូលជាសមាជិកសមាគមវារីវប្បករកម្ពុជា បើអាចរៀបចំកន្លែងប្រមូលទិញ និងលក់ចែក ចាយត្រី និងផលត្រីរបស់សមាជិក ធ្វើយ៉ាងនេះដើម្បីទទួលបានព័ត៌មានទីផ្សារ បរិមាណផ្គត់ផ្គង់ និងតម្រូវការទីផ្សារ និងឈានទៅបង្កើតកន្លែងកែច្នៃផលត្រី ដើម្បីបង្កើនតម្លៃបន្ថែម បង្កើតការងារ និងជាពិសេសកាត់ បន្ថយហានីភ័យដោយសារ បរិមាណផលិតលើសពីតម្រូវការ។

លោកបន្ថែមថា ក្រសួងដែលមានរដ្ឋបាលជលផល ជាសេនាធិការនឹងនៅរង់ចាំ ផ្តល់កិច្ចសហការទាំងបច្ចេកទេស និងច្បាប់ដើម្បីទទួលបានប្រយោជន៍រួម គឺនិរន្តរភាពនៃការផ្គត់ផ្គង់ សមស្របតាមតម្រូវការ និងឈានទៅធ្វើការនាំចេញ ស្របតាមស្តង់ដាទីផ្សារបញ្ជា ទិញនាពេលអនាគត ៕

To Top