ភ្នំពេញ៖ សម្ដេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានលើកឡើងថា ប្រទេសកម្ពុជា ដែលជាប្រទេសសល់ពីផេះផង់ នៃសង្គ្រាម បច្ចុប្បន្ន បានប្រែក្លាយជាប្រទេស មានសន្តិភាពពេញលេញ និងការអភិវឌ្ឍលើគ្រប់វិស័យ ។
តាមរយៈបណ្ដាញ ទំនាក់ទំនងសង្គមហ្វេសប៊ុក នៅព្រឹកថ្ងៃទី២៤ ខែមករា ឆ្នាំ២០២១នេះ សម្ដេចពិជ័យសេនា ទៀ បាញ់ បានសរសេរយ៉ាងដូចច្នេះថា «កម្ពុជាដែលជាប្រទេស សល់ពីផេះផង់នៃសង្គ្រាម ប្រជាជនរក តែអង្ករច្រកឆ្នាំងគ្មាន ហើយត្រូវរស់នៅ ដោយការភ័យខ្លាចគ្មាន ស្រាកស្រាន្តនោះ បានប្រែក្លាយជាប្រទេស មានសន្តិភាពពេញលេញ និងការអភិវឌ្ឍលើគ្រប់វិស័យ ក្រោមការដឹកនាំ ប្រកបដោយកិត្តិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា»។
សម្ដេចបន្តថា ក្រោមម្លប់នៃសន្តិភាព និងការអភិវឌ្ឍ កម្ពុជាមិនត្រឹមតែបានធ្វើឱ្យជីវភាព រស់នៅរបស់ពលរដ្ឋខ្លួន មានភាពសម្បូរសប្បាយ ប្រសើរឡើងប៉ុណ្ណោះទេ កម្ពុជាក៏មានលទ្ធភាព ចូលរួមក្នុងបេសកកម្ម ដើម្បីមនុស្សជាតិ ជាច្រើនទៀត រួមមាន ការចូលរួមបេសកកម្ម រក្សាសន្តិភាព ជាមួយអង្គការសហប្រជាជាតិ និងជួយប្រទេសជាមិត្ត ដើម្បីប្រយុទ្ធប្រឆាំង នឹងការចម្លងមេរោគកូវីដ-១៩ ៕
