ភ្នំពេញ ៖ លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងថា បច្ចុប្បន្នកម្ពុជា ស្ថិតនៅក្នុងស្ថានភាពចម្លងជាចង្កោមៗរាយប៉ាយតាមកន្លែងនីមួយៗ ហេីយការចាក់វ៉ាក់សាំងកូវីដ-១៩ តែមួយមុខ មិនមែនជាដំណោះស្រាយមាស សម្រាប់ទប់ទល់ជំងឺកូវីដ-១៩ឡេីយ ពោលគឺអនុវត្តន៍វិធានការការពារខ្លួន ៣ការពារ និង៣កុំជាប់ ជាប្រចាំ។
លោកស្រី ឱ វណ្ណឌីន លេីកឡេីងបែបនេះ ក្រោយពីលោក ឆេង គឹមឡុង អនុប្រធានទីពីរ នៃវិទ្យាស្ថានចក្ខុវិស័យអាស៊ី ស្តីពីជំរុញរាជរដ្ឋាភិបាល ពន្លឿនការចាក់វ៉ាក់សាំង នៅចំពោះមុខការរាតត្បាតជំងឺកូវីដ-១៩។
ជាការឆ្លេីយតប លោកស្រី ឱ វណ្ណឌីន បានសរសេរសារក្នុងគ្រុបតេឡេក្រាម នាថ្ងៃទី២៨ ខែកុម្ភៈ ឆ្នាំ២០២១ថា «សូមកុំភ្លេចថា បច្ចុប្បន្ននេះកម្ពុជា ស្ថិតនៅក្នុងស្ថានភាពចម្លងជាចង្កោមៗរាយប៉ាយតាមកន្លែងនីមួយៗ ហេីយ វ៉ាក់សាំងកូវីដ-១៩ តែមួយមុខ មិនមែនជាដំណោះស្រាយមាសសម្រាប់ទប់ទល់ឆ្លេីយតបទៅនឹងការរាតត្បាតជំងឺកូវីដ-១៩ នោះឡេីយ»។
លោកស្រីបន្ដថា ការវ៉ៃឈ្នះកូវីដ-១៩ នៅពេលនេះ មិនមែនរំពឹងលេីតែវ៉ាក់សាំងមួយមុខប៉ុណ្ណោះទេ ត្រូវមានវិធានការរួមគ្នា មានដូចជា ៣ការពារ ៣កុំ និងចាក់វ៉ាក់សាំងកូវីដ-១៩ ទេីបបង្កេីតបាននូវកងការពារដ៏រឹងមាំសម្រាប់បុគ្គល ក្នុងការការពារពីភាពធ្ងន់ធ្ងរសុខភាពដែលអាចកេីតមានឡេីងពីការវ៉ៃលុករបស់វីរុសកូវីដ-១៩ និងកាត់បន្ថយបាននូវបន្ទុកចូលសម្រាកពេទ្យផង និងកាត់បន្ថយបានជាអតិប្បរិមានូវការកេីតជំងឺនេះក្នុងសហគមន៍ផង។
លោកស្រីបន្ថែមថា ការចាក់វ៉ាក់សាំង ក៏កំពុងតែធ្វេីជាបន្តបន្ទាប់ អាស្រ័យលេីចំនួនវ៉ាក់សាំងដែលមានបច្ចុប្បន្ន គួបគ្នាជាមួយនិងការអនុវត្តវិធានការ ៣ការពារ និង ៣កុំ ដេីម្បីឆ្លេីយតបនៅក្នុងបរិបទប្រយុទ្ធនឹងជំងឺកូវីដ-១៩ នេះ។
ជាងនេះទៅទៀត អ្នកនាំពាក្យក្រសួងសុខាភិបាល ក៏បានលេីកឡេីងថា «សូមបងប្អូនប្រជាពលរដ្ឋបន្តអនុវត្តន៍វិធានការខាងលេី ទោះជាមិនទាន់ដល់វេនចាក់វ៉ាក់សាំងក៏ដោយ សូមអធ្យាស្រ័យដោយវ៉ាក់សាំងទទួលបានមានកម្រិតចំនួន ក៏មិនត្រូវរងចាំតែវ៉ាក់សាំង ហេីយភ្លេចខ្លួន ឫមិនបានអនុវត្តន៍វិធានការការពារខ្លួន ៣ការពារ និង ៣កុំ នោះឡេីយ»។
អ្នកនាំពាក្យ ក៏បានផ្ដាំផ្ញេីថា មានតែ ៣ការពារ និង ៣កុំ ដែលជួយលោកអ្នកបានរួចផុតពីការចម្លងវីរុសកូវីដ-១៩ ហេីយដល់វេនចាក់វ៉ាក់សាំង សូមស្ម័គ្រចិត្តដេីម្បីសុខភាពផ្ទាល់ខ្លួន សុខភាពក្រុមគ្រួសារខ្លួន និងសុខភាពសហគមន៍របស់ខ្លួនផងដែរ៕
