ភ្នំពេញ ៖ អ្នកបើកបរ រថយន្តតាក់ស៊ី ដែលដឹកស្រ្តី ជនជាតិចិនម្នាក់ គេចចេញពីគោលដៅ ត្រួតពិនិត្យ នៅស្រុកកំពង់សីលា ខេត្តព្រះសីហនុ ទៅកាន់រាជធានីភ្នំពេញ កាលពីរាត្រីថ្ងៃ៨ មីនា ត្រូវបានសមត្ថកិច្ច ធ្វើការឃាត់ខ្លួន និងកសាងសំណុំរឿង ចាត់ការតាមវិធានការច្បាប់ ។
កាលពីយប់ ថ្ងៃ៨ ខែមីនា អ្នកបើកបររថយន្តតាក់ស៊ី ម៉ាក Highlander ព័ណ៌ស ពាក់ស្លាកលេខ2BD-7028 បានដឹកស្រ្តីជនជាតិចិនម្នាក់ គេចចេញពីគោលដៅត្រួតពិនិត្យ នៅស្រុកកំពង់សីលា ខេត្តព្រះសីហនុ ទៅកាន់រាជធានីភ្នំពេញ ។
តាមចម្លើយសារភាព របស់អ្នកបើកបររថយន្តតាក់ស៊ីខាងលើ បានឲ្យដឹងថា កាលពីថ្ងៃ៨ មីនា ឆ្នាំ២០២១ វេលាម៉ោង១០យប់ ខ្លួនបានដឹកស្រ្តីជនជាតិចិនម្នាក់ ចេញពីក្រុងព្រះសីហនុ ទៅរាជធានីភ្នំពេញ ក្នុងតម្លៃ៣០០ដុល្លារ រហូតមកដល់គីឡូម៉ែត្រ១៥១-១៥២ ខ្លួនបានបើកជែងរថយន្តកូរ៉េ ដឹកទំនិញមួយគ្រឿង រួចឃាត់រថយន្តនោះឈប់ ដើម្បីឲ្យស្ត្រីជនជាតិចិននោះ ឡើងជិះដើម្បីបន្លំគេច ពីគោលដៅត្រួតពិនិត្យ របស់សមត្ថកិច្ចចម្រុះ ព្រំប្រទល់ស្រុកកំពង់សីលា និងស្រុកភ្នំស្រួច ដោយអ្នកបើកបរ រថយន្តតាក់ស៊ីនេះ បានសន្យាឲ្យប្រាក់ ទៅអ្នកបើករថយន្ត ដឹកទំនិញចាយខ្លះ ហើយខ្លួនបានបន្លំបើករថយន្តគេច ទៅរង់ចាំទទួលស្រ្តីជនជាតិចិន ខាងលើ នៅខាងមុខគោលដៅត្រួតពិនិត្យជាមុន។
ដោយសាររង់ចាំយូរពេក ទើបខ្លួនបានទំនាក់ទំនង ទៅខាងរថយន្តដឹក ទំនិញ ទើបដឹងថា ត្រូវបានសមត្ថកិច្ច ឃាត់ហើយ ពេលនោះដោយមាន ការភិតភ័យ ខ្លួនបានបើករថយន្ត ចោលស្ត្រីជនជាតិចិននោះ ឆ្ពោះមករាជធានីភ្នំពេញ តែម្តង និងរហូតមកដល់ថ្ងៃ៩ មីនា ត្រូវបានសមត្ថកិច្ចធ្វើការឃាត់ខ្លួន៕
![](https://dap-news.com/wp-content/uploads/2020/08/1-1.png)