កំពង់ចាម៖ នៅថ្ងៃទី២៦ ខែមីនា ឆ្នាំ២០២១ នេះ នៅសាលាខេត្តកំពង់ចាម មានសប្បុរសជនបានបន្តនាំអំណោយជាសម្ភារៈ និងថវិកា ផ្ដល់ជូនគណៈកម្មការប្រយុទ្ធប្រឆាំងជំងឺកូវីដ-១៩ ខេត្តកំពង់ចាម ដើម្បីចូលរួមក្នុងយុទ្ធនាការប្រឆាំងជំងឺកូវីដ-១៩ ខណៈពេលដែលជំងឺនេះ កំពុងរីករាលដាលចូលក្នុងសហគមន៍ ដែលមានឈ្មោះថា ព្រឹត្តិការណ៍សហគមន៍ ២០ កុម្ភៈ ។
សូមបញ្ជាក់ថា សប្បុរសជនដែលបាននាំ អំណោយផ្ដល់ជូនប្រធានគណៈកម្មការប្រយុទ្ធប្រឆាំងជំងឺកូវីដ-១៩ ខេត្តកំពង់ចាមលោក អ៊ុន ចាន់ដា មានចំនួន ៨ ក្រុម អំណោយនាពេលនោះមានដូចជា ថវិកាចំនួន ១.៦០០ ដុល្លារសហរដ្ឋអាមេរិក និងលុយរៀលចំនួន ៤ លាន ៥ សែនរៀល , មីចំនួន១២០កេស , អាលកុល ២៥០ លីត្រ , ទឹកបរិសុទ្ធ ៣០ កេស និង ២០០យួ , ម៉ាសចំនួន ១០.០០០ ម៉ាស, និងម៉ាស៊ីនវាស់កំដៅ បាញ់អាល់កុល ចំនួន៤ គ្រឿងផងដែរ ។
ស្ថិតក្នុងឱកាសនោះ លោកអ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការប្រឆាំងជំងឺកូវីដ-១៩ ខេត្ត បានថ្លែងអំណរគុណយ៉ាងជ្រាលជ្រៅ ដល់សប្បុរសជនទាំងអស់ ដែលបានឯកភាពគ្នា នាំអំណោយដ៏ថ្លៃថ្លា ជាថវិកានិងសម្ភារៈ យកមកផ្ដល់ជូនគណៈកម្មការ ដើម្បីចូលរួមចំណែក ក្នុងការប្រយុទ្ធប្រឆាំងការឆ្លងរាលដាលជំងឺកូវីដ-១៩ នៅពេលនេះ ។
