ភ្នំពេញ៖ បន្ទាប់ពីបានបើកកិច្ចប្រជុំត្រួតពិនិត្យ ពិភាក្សា និងកែសម្រួល លើសេចក្តីព្រាងអនុក្រឹត្យស្តីពី ការរៀបចំ និងការប្រព្រឹត្តទៅ របស់ក្រុមប្រឹក្សាវេជ្ជសាស្ត្រ នៃបេឡាជាតិសន្តិសុខសង្គម លើកទី១ របស់ខ្លួន កាលពីថ្ងៃទី២៨ ខែឧសភា ឆ្នាំ២០២១ កន្លងទៅ ក្រុមប្រឹក្សាអ្នកច្បាប់ នៃទីស្តីការគណៈរដ្ឋមន្រ្តី នាព្រឹកថ្ងៃចន្ទ ទី២ ខែមិថុនា ឆ្នាំ២០២១ នេះ បានបន្តប្រជុំត្រួតពិនិត្យពិភាក្សា កែសម្រួល និងបានអនុម័តសម្រេច ទាំងស្រុង លើសេចក្តីព្រាងអនុក្រឹត្យស្តីពី ការរៀបចំ និងការប្រព្រឹត្តទៅ របស់ក្រុមប្រឹក្សាវេជ្ជសាស្ត្រ នៃ ប.ស.ស. តាមរយៈប្រព័ន្ធវីដេអូ (Video Conference)។
អនុក្រឹត្យនេះ មានវិសាលភាព ទៅលើការលើកកម្ពស់គុណភាព ប្រសិទ្ធភាព នៃការផ្តល់សេវារបស់មូលដ្ឋានសុខាភិបាល ដែលបានចុះកិច្ចព្រមព្រៀង ជាមួយ ប.ស.ស. និងដើម្បីកំណត់ អំពីការបាត់បង់សមត្ថភាពការងារ ស្ថានភាពទុព្វលភាព របស់សមាជិក ប.ស.ស. ឱ្យមានលក្ខណៈច្បាស់លាស់ ត្រឹមត្រូវ និងមានលក្ខណៈល្អប្រសើរឡើង ធ្វើយ៉ាងណាឱ្យការអនុវត្តនេះ ស្របតាមគោលការណ៍នានា របស់រាជរដ្ឋាភិបាល ក្រោមការដឹកនាំ ប្រកបដោយគតិបណ្ឌិត និងឈ្លាសវៃបំផុត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ធានាបាននូវសុខុមាលភាព និងជីវភាពរស់នៅ របស់ប្រជាពលរដ្ឋ ពិសេសបងប្អូន កម្មករនិយោជិត ប្រកបដោយចីរភាព ។
គួរបញ្ជាក់ថា៖ កិច្ចប្រជុំលើកទី២នេះ មានការអញ្ជើញចូលរួមពី ក្រុមប្រឹក្សាអ្នកច្បាប់ នៃទីស្តីការគណៈរដ្ឋមន្រ្តី ថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ រួមទាំងថ្នាក់ដឹកនាំ និងក្រុមការងារបច្ចេកទេសជំនាញ នៃ ប.ស.ស. មួយចំនួនផងដែរ ដែលប្រព្រឹត្តទៅ នៅទីស្តីការគណៈរដ្ឋមន្រ្តី៕
