ព័ត៌មានជាតិ

រាជរដ្ឋាភិបាល បញ្ចូលអង្គការជំនួយនៃក្តីសង្ឃឹម សម្រាប់សហគមន៍ (សាលាកុមារអូទីសិម) ជាគ្រឹះស្ថានសាធារណៈ

ភ្នំពេញ៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានសម្រេចបញ្ចូលសាលា អង្គការជំនួយនៃក្តីសង្ឃឹមសម្រាប់សហគមន៍ (សាលាកុមារអូទីសិម) ជាគ្រឹះស្ថានសាធារណៈ ដោយរួមទាំងបញ្ចូលគ្រូ និង បុគ្គលិកអប់រំទីនោះ ២៦នាក់ជាបុគ្គលិករដ្ឋផងដែរ។ នេះបើយោងតាមលិខិត របស់ទីស្តីការគណៈរដ្ឋមន្រ្តី ដែលចុះហត្ថលេខាដោយលោក អ៊ីន វីរៈជាតិ ជារដ្ឋលេខាធិការទីស្តីការ។

លិខិតបញ្ជាក់ថា “រាជរដ្ឋាភិបាលយល់ព្រមជាគោលការណ៍ បញ្ចូលសាលាអង្គការជំនួយនៃ ក្តីសង្ឃឹមសម្រាប់សហគមន៍ ជាគ្រឹះស្ថានសិក្សាសាធារណៈ ចាប់ពីឆ្នាំសិក្សា២០២០-២០២១ និងផ្តល់ការឧបត្ថម្ភថវិកាដំណើរការសាលារៀន” ។

បើតាមសេចក្តីសម្រេចរបស់ក្រសួងអប់រំ យុវជន និងកីឡាវិញ សាលាអង្គការជំនួយនៃក្តីសង្ឃឹម សម្រាប់សហគមន៍ក្លាយជា គ្រឹះស្ថានសិក្សាសាធារណៈនេះ បានដាក់ឈ្មោះថា វិទ្យាល័យអប់រំពិសេសក្រុងតាខ្មៅ មានទីតាំងស្ថិតនៅភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល។

វិទ្យាល័យអប់រំពិសេសក្រុងតាខ្មៅ ត្រូវដឹកនាំដោយនាយកមួយរូប និងនាយករងមួយ ឬច្រើនរូបជាជំនួយការតាមការចាំបាច់ ព្រមទាំងបុគ្គលិកផ្សេងទៀត ស្របតាមលិខិតបទដ្ឋានគតិយុត្ត ប្រើប្រាស់ក្របខណ្ឌបុគ្គលិកម្រាប់អប់រំពិសេស។ ក្នុងនោះនាយក-នាយករងមានសិទ្ធិទទួលប្រាក់បំណាច់ មុខងារតាមគោលការណ៍កំណត់របស់រដ្ឋ ។

លោក ចាន់ សារិន ប្រធានអង្គការជំនួយនៃក្តីសង្ឃឹមសម្រាប់សហគមន៍ (CIDAN) និងជាប្រធានដឹកនាំបណ្ដាញជន ពិការខ្សោយសតិបញ្ញា និងអូទីសិម (Autism) ធ្លាប់បានប្រាប់សារព័ត៌មាន ក្នុងស្រុកនាពេលកន្លងមកថា ទោះបីជាកម្ពុជាគ្មានតួលេខច្បាស់លាស់ ពីអត្រាកុមារអូទីសិមក្ដី ប៉ុន្តែលោកប៉ាន់ប្រមាណថា កុមារកើតជំងឺនេះអាចមានចន្លោះពី ៥ពាន់ទៅ១ម៉ឺននាក់។ លោកថា នៅកម្ពុជាអង្គការធ្វើការលើ បញ្ហាអូទីហ្សឹមនេះមានជាង ១០ស្ថាប័ន តែមានអង្គការ ២-៣ប៉ុណ្ណោះដែលសកម្មលើបញ្ហានេះ។

សូមបញ្ជាក់ថា ការស្រាវជ្រាវជាច្រើនបង្ហាញពីជំងឺអូទីសិម អាចកើតមានឡើងចំពោះទារក នៅពេលចាប់កំណើតក្នុងផ្ទៃម្ដាយ។ ភាគច្រើនកុមារកើតជំងឺនេះ បង្ហាញរោគសញ្ញានៅពេលអាយុចន្លោះពី៣ខែ ទៅ២ឆ្នាំ។ គេអាចកត់សំគាល់កុមារកើតជំងឺអូទីសិម ដោយសារកុមារនោះចូលចិត្តនៅម្នាក់ឯង មិនចាប់អារម្មណ៍ចំពោះអ្នកនៅជុំវិញខ្លួន អាយុដល់ ២ឆ្នាំហើយមិនទាន់ចេះនិយាយ និងពេលខឹងម្តងៗ មិនចង់ឲ្យគេលួងលោមជាដើម។

ជំងឺអូទីសិមជាប្រភេទពិការភាពម្យ៉ាងកើត មានចំពោះកុមារដែលនាំឲ្យប៉ះពាល់ ទៅលើការលូតលាស់រាងកាយ សតិបញ្ញាស្មារតី ប៉ះពាល់ទៅលើផ្នែកទំនាក់ទំនងសង្គម និងការស្ដែងចេញនូវអាកប្បកិរិយារបស់កុមារ។ កុមារអូទីសិមពិបាកក្នុងការប្រាស្រ័យ ទាក់ទងជាមួយអ្នកដទៃដូចជា ឪពុកម្ដាយ បងប្អូន និងកុមារដទៃ ដោយបង្ហាញកាយវិការ ចរិតឫកពារ ខុសប្លែកពីមនុស្សធម្មតា ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top