ព័ត៌មានជាតិ

លោកស្រី ឱ វណ្ណឌីន យកថវិកា ១០លានរៀល និងសម្ភារៈមួយចំនួន ប្រគល់ជូនអ្នកចាក់វ៉ាក់សាំងទី៣លាននាក់

ភ្នំពេញ ៖ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស នារសៀលថ្ងៃទី១៥ ខែមិថុនា ឆ្នាំ២០២១ បាននាំយកថវិកាសម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា ចំនួន១០លានរៀល និងសម្ភារៈប្រើប្រាស់មួយចំនួនទៀត ជូនអ្នកចាក់វ៉ាក់សាំងទី៣លាននាក់ គឺអ្នកស្រី ស៊ុ សំអឿន រស់នៅខេត្តកណ្ដាល។

នាឱកាសនោះ អ្នកស្រី ស៊ុន សំអឿន ក៏បានថ្លែងអំណរគុណ សម្ដេចតេជោ ហ៊ុន សែន ដែលបានផ្ដល់ថវិកា១០រៀល និងសម្ភារមួយចំនួនទៀត ជូនអ្នកស្រី។

សូមបញ្ជាក់ថា បន្ទាប់ពីការចាប់ផ្តើមចាក់វ៉ាក់សាំងកាលថ្ងៃ១០ កុម្ភៈ គឺម្ជុលទី១ បានទៅលោក ហ៊ុន ម៉ាណែត ហើយថ្ងៃ១១ មេសា បានរកឃើញមនុស្សទី១លាននាក់ចាក់វ៉ាក់សាំងបានទៅលោក ប៉ាន់ សុវណ្ណរិទ្ធិ ដោយឡែក ថ្ងៃទី១៤ ឧសភា បានរកឃើញមនុស្សទី២លាន បានទៅអ្នកស្រី ទិត ចិន្តា ជាកម្មការិនីរោងចក្រ ចំណែក ថ្ងៃទី១៤ មិថុនា ក៏បានរកឃើញមនុស្សទី៣លាន គឺអ្នកស្រី ស៊ុ សំអឿន រស់នៅខេត្តកណ្ដាល។

យោងតាមរបាយការណ៍របស់ ក្រសួងសុខាភិបាល បានឲ្យដឹងថា គិតត្រឹមថ្ងៃទី១៤ ខែមិថុនា ឆ្នាំ២០២១ ក្រសួងសុខាភិបាល និងក្រសួងការពារជាតិបានចាក់វ៉ាក់សាំងការពារ កូវីដ-១៩ ជូនមន្រ្តីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសចំនួន ៣,០០០,២៦៤នាក់។ សម្រាប់លទ្ធផលចាក់វ៉ាក់សាំងគោលដៅ១០លាននាក់ មកដល់ពេលនេះបានចំនួន៣០% ហើយ ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×