ភ្នំពេញ ៖ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យ ក្រសួងបរិស្ថាន បានឆ្លើយតបទៅភាគី អាមេរិកវិញថា បទល្មើសធនធានធម្មជាតិ ទ្រង់ទ្រាយធំ ក្នុងតំបន់ដែន ជម្រកសត្វព្រៃ ព្រៃឡង់ និងតំបន់ការពារធម្មជាតិ ផ្សេងទៀត លែងកើតមានទៀត ហើយ គឺមានតែបទល្មើស ទ្រង់ទ្រាយតូចៗប៉ុណ្ណោះ ។
ការលើកឡើងរបស់ លោក នេត្រ ភក្ដ្រា ក្រោយពីស្ថានទូតអាមេរិកប្រចាំកម្ពុជា នាថ្ងៃទី១៧ ខែមិថុនា ឆ្នាំ២០២១ បានចេញសេចក្ដីថ្លែងការណ៍ថា អាមេរិកសម្រេចផ្ដាច់ ជំនួយពីកម្ពុជា ដោយសារការកាប់ឈើខុសច្បាប់ នៅតែបន្តមាន ក្នុងនិងជុំវិញដែន ជម្រក សត្វព្រៃ នៅព្រៃឡង់ ហើយអាជ្ញាធរមិនបានកាត់ទោស សមល្មម ចំពោះបទល្មើសសត្វព្រៃ ។ ទោះបីផ្តាច់ជំនួយលើផ្នែកនេះ តែអាមេរិក នៅតែអះអាងថា នឹងបន្តជួយលើផ្នែកផ្សេងទៀត ជាមួយរាជរដ្ឋាភិបាលកម្ពុជា និងជាមួយផ្នែកឯកជន ។
តាមរយៈសារតេឡេក្រាមនាថ្ងៃទី១៧ មិថុនា នេះ លោក នេត្រ ភក្ដ្រា បានថ្លែង ការអរគុណចំពោះ អាមរិកដែលបានចូលរួម ចំណែកជាមួយកម្ពុជា ក្នុងការផ្តល់ជំនួយបច្ចេកទេស នាពេលកន្លងមក ក្នុងកិច្ចការពារ និងអភិរក្សធនធានធម្មជាតិ នៅតំបន់ព្រៃឡង់ ។ ភាគីទាំងពីរ ក៏បានឯកភាពគ្នាបង្វែរជំនួយ មកលើកិច្ចសហប្រតិបត្តិការផ្សេងទៀត ដែលបន្តបម្រើឲ្យឧត្តមប្រយោជន៍ របស់ប្រជាជនកម្ពុជា។
លោកបញ្ជាក់ថា «ក្រសួងបរិស្ថាន សូមគូសបញ្ជាក់ថា បទល្មើសធនធានធម្មជាតិទ្រង់ទ្រាយធំ នៅក្នុងតំបន់ដែនជម្រកសត្វព្រៃព្រៃឡង់ និងនៅតំបន់ការពារធម្មជាតិផ្សេងទៀតលែងកើតមានទៀតហើយ តែនៅមានបទល្មើសទ្រុងទ្រាយតូចៗកើតឡើង។ នេះគឺជាក្តីព្រួយបារម្ភដែលនៅសេសសល់តិចតួច ដែលក្រសួងបរិស្ថាន និងសមត្ថកិច្ចពាក់ព័ន្ធបាននិងកំពុងបន្តអនុវត្តច្បាប់ដោយការទទួលខុសត្រូវ»។
លោកបន្ថែមថា ការបញ្ចប់គម្រោងព្រៃឡង់បៃតង ដែលជាកិច្ច សហប្រតិបត្តិការរវាង កម្ពុជា និងសហរដ្ឋមេរិក នៅតំបន់ដែនជម្រក សត្វព្រៃព្រៃឡង់ នៅពេលនេះ បានបង្ហាញថា ក្រសួងបរិស្ថាន ជាសេនាធិការ នៃរាជរដ្ឋាភិបាល និងមន្ត្រីរបស់ខ្លួនមានការទទួលខុសត្រូវ និងមានភាពរឹងមាំគ្រប់គ្រាន់ ក្នុងភាពជាម្ចាស់ ក្នុងការបំពេញតួនាទី និងភារកិច្ចរបស់ខ្លួនលើការការពារ និងអភិរក្សធនធានធម្មជាតិ ដោយឈរនៅលើមូលដ្ឋានច្បាប់ជាធរមាន។
លោកថា ក្រសួងបរិស្ថាននឹង បន្តបេសកកម្មរបស់ខ្លួនប្រកប ដោយការទទួលខុសត្រូវខ្ពស់ និងវិជ្ជាជីវៈ ក្នុងការគ្រប់គ្រង និងអភិរក្សតំបន់ដែនជម្រក សត្វព្រៃព្រៃឡង់ ក៏ដូចជាតំបន់ការពារធម្មជាតិ នៅកម្ពុជា សម្រាប់មនុស្សជំនាន់ទៅមុខទៀត។
ជាមួយគ្នានេះដែរ លោក នេត្រ ភក្ដ្រា ក៏បានលើកឡើងទៀតថា ដោយសារតែការការពារ និងអភិរក្ស មានភាពល្អប្រសើរ កម្ពុជាបានទទួលជោគជ័យ លើការលក់ឥណទាន កាបូននៅលើទីផ្សារ ស្ម័គ្រចិត្តអន្តរជាតិ ស្ថានភាពជីវភាពពលរដ្ឋនៅ តាមសហគមន៍តំបន់ការពារធម្មជាតិ ចាប់ផ្តើមមានភាពល្អ ប្រសើរផ្សារ ភ្ជាប់នឹងទេសចរណ៍ធម្មជាតិ និងជម្រើសថ្មី ក្នុងមុខរបររបស់ខ្លួន ៕
