ភ្នំពេញ៖ លោក ហេង សុផាន់ណារិទ្ធ ប្រធាននាយកដ្ឋាន សេវាអតិថិជន និងទំនាក់ទំនងសាធារណៈ ក្នុងឱកាសធ្វើបទបង្ហាញ ក្នុងកិច្ចប្រជុំពិភាក្សា ជាមួយក្រសួងកិច្ចការនារី តាមរយៈប្រព័ន្ធវីដេអូ (Zoom Meeting) នាព្រឹកថ្ងៃទី២០ ខែកក្កដា ឆ្នាំ២០២១នេះ បានលើកឡើងថា បេឡាជាតិរបបសន្តិសុខសង្គម (ប.ស.ស.) តែងតែយកចិត្តទុកដាក់ លើសុខុមាលភាព របស់កម្មករនិយោជិត ជាស្រ្តី ក្នុងការលើកកម្ពស់សុខភាព ពេលមានបញ្ហាសុខភាពទូទៅ ឬគ្រោះថ្នាក់ផ្សេងៗ ។
លោកបានឱ្យដឹងទៀតថា តាមរយៈការអនុវត្ត របបថែទាំសុខភាព កម្មករនិយោជិតជាស្រ្តី ដែលជាសមាជិក ប.ស.ស. នឹងទទួលបានអត្ថប្រយោជន៍ ដូចជាការពិនិត្យ និងព្យាបាល នៅពេលមានបញ្ហាសុខភាព ទទួលបានប្រាក់បំណាច់ប្រចាំថ្ងៃ ពេលអាក់ខានធ្វើការ ដោយសារជំងឺ ទទួលបានប្រាក់បំណាច់ លំហែមាតុភាព រួមទាំងទទួលបាន នូវអត្ថប្រយោជន៍ផ្សេងៗទៀត ដូចមានចែងក្នុងច្បាប់ ស្តីពីរបបសន្តិសុខសង្គម។
ជាមួយគ្នានេះដែរ កម្មករនិយោជិតជាស្រ្តី សម្រាលកូន ជាសមាជិក ប.ស.ស. ទាំងក្នុង និងក្រៅប្រព័ន្ធទាំងអស់ នឹងទទួលបានប្រាក់ឧបត្ថម្ភបន្ថែម ពីរាជរដ្ឋាភិបាលកម្ពុជា ផងដែរ ដែលក្នុងនោះរួមមាន ៖
(១). សម្រាលបានកូន ១ ទទួលបានប្រាក់ឧបត្ថម្ភបន្ថែម ពីរាជរដ្ឋាភិបាល ចំនួន ៤០ម៉ឺនរៀល
(២). សម្រាលបានកូនភ្លោះ ២ ទទួលបានប្រាក់ឧបត្ថម្ភបន្ថែម ពីរាជរដ្ឋាភិបាលចំនួន ៨០ម៉ឺនរៀល
(៣). សម្រាលបានកូនភ្លោះ ៣ ទទួលបានប្រាក់ឧបត្ថម្ភបន្ថែម ពីរាជរដ្ឋាភិបាលចំនួន ១លាន ២សែនរៀល និងទទួលបានប្រាក់ ឧបត្ថម្ភបន្ថែម ពីសម្តេចតេជោ ៥លានរៀលទៀតផង។
ដែលទាំងនេះ គឺជាការយកចិត្តទុកដាក់ខ្ពស់ ពីសំណាក់រាជរដ្ឋាភិបាលកម្ពុជា ដែលមានសម្តេច អគ្គមហាសេនាបតីតេជោ ហ៊ុន សែន ជាប្រមុខដឹកនាំ ដែលសម្តេចតែងតែ គិតគូរខ្ពស់បំផុត អំពីសុខុមាលភាព និងជីវភាពរស់នៅ របស់ប្រជាពលរដ្ឋ ពិសេសបងប្អូនកម្មករនិយោជិត។
សូមបញ្ជាក់ថា កិច្ចប្រជុំខាងលើនេះ ត្រូវបានរៀបចំឡើង ដោយក្រសួងកិច្ចការនារី និងអង្គការ APHEDA ដោយផ្តោតសំខាន់ លើការបង្កើនកិច្ចសហការ រវាងដៃគូពាក់ព័ន្ធក្នុងការរួមចំណែក ដោះស្រាយ និងគិតគូអំពីបញ្ហា និងតម្រូវការរបស់កម្មករជាស្រ្តី ក្នុងការទទួលបាន ការងារសមរម្យ៕
