ភ្នំពេញ ៖ ប្រឡាយលូ៥ដែលគេទទួលស្គាល់ថា ជាប្រឡាយដ៏សំខាន់មួយក្នុងការរំដោះទឹក ក្នុងមូលដ្ឋាន ខណ្ឌពោធិ៍សែនជ័យ , ខណ្ឌសែនសុខ និងខណ្ឌមានជ័យ ហើយទំលាក់ទៅប្រឡាយម័ល និងបន្តចុះទៅជើងឯក គិតមកដល់ពេលនេះ ការងារស្តារយកភក់ និងសំរាមចេញប្រឡាយ ត្រូវបានបញ្ចប់១០០ភាគរយហើយ ។
ក្នុងប្រតិបត្តិការនេះ ក្រុមការងារស្តារយកភក់ ចេញពីបាតប្រឡាយ បានចំនួន២១៣៧៥ម៉ែត្រគូប , សំរាមនិងស្មៅបានចំនួន២២៥០ម៉ែត្រគូប ។ ការស្តាររួចហើយ នឹងធ្វើឲ្យចរន្តទឹកហូរយ៉ាងលឿន គ្មានការរំខាន ដោយអាចបញ្ជៀសបាននូវការលិចលង់ភូមិដ្ឋានប្រជាពលរដ្ឋ ។
លោក ដួង ចាន់សារ៉ាត់ ប្រធានអង្គភាពលូទឹក បូមទឹក នៃមន្ទីរសាធារណការ និងដឹកជញ្ជូន រាជធានីភ្នំពេញ បានឲ្យដឹងនៅថ្ងៃ២២ កក្កដាថា ដោយមានការយកចិត្តទុក្ខដាក់ និងការចង្អុលណែនាំពីលោក ឃួង ស្រេង អភិបាលរាជធានីភ្នំពេញ ក្នុងការដោះស្រាយការស្តារប្រពន្ធ័បង្ហូរទឹក ជាពិសេសប្រឡាយមេ នៅរាជធានីភ្នំពេញ មន្ទីរសាធារណការរាជធានីភ្នំពេញ ដែលមានអង្គភាពលូទឹក បូមទឹក និងស្ថានីយ៍ចម្រោះទឹកកខ្វក់ បានធ្វើសកម្មភាពស្តារប្រឡាយលូ៥ យ៉ាងសកម្ម រហូតបានចប់រួចរាល់នាថ្ងៃ២១ កក្កដា ។
លោកថា ប្រឡាយលូ៥មានប្រវែងជាង១០០០ម៉ែត្រ ទទឹងទំហំពី១៥ទៅ៣០ម៉ែត្រ ចាប់ពីប្រឡាយលូប្រាំផ្លូវវេងស្រេងដល់ស្ថានីយបូមទឹកលូ៥ ។ ការដ្ឋាននេះ បានចាប់ផ្តើមស្តារដោយប្រើប្រាស់សាឡង់ កាលពីថ្ងៃទី១៩ មិថុនា ហើយបានបញ្ចប់១០០ភាគរយហើយ កាលល្ងាចថ្ងៃ២១ កក្កដា។
លោកថា នៅព្រឹកថ្ងៃ២២ កក្កដា នេះដែរ ក្រុមការងារបានចល័តកម្លាំង និងគ្រឿងចក្រ ពីការស្តារប្រឡាយលូ៥នេះ បន្តមកបង្ហើយ ការស្តារប្រឡាយបឹងទំពុនថែមទៀត ដែលនៅសល់១០០ម៉ែត្រទៀត នឹងសម្រុកឲ្យចប់ក្នុងរយៈពេល១សប្តាហ៍ទៀត ៕
