ព័ត៌មានជាតិ

ក្រសួងណែនាំ​ មន្ទីរធម្មការរាជធានី-ខេត្ត ផ្សព្វផ្សាយបញ្ហាគ្រឿងញៀន ថ្ងៃបុណ្យភ្ជុំបិណ្ឌ

ភ្នំពេញ ៖ លោក ឈិត សុខុន រដ្ឋមន្ត្រីក្រសួងធម្មការ និងសាសនា បានណែនាំដល់ប្រធានមន្ទីរធម្មការ និងសាសនាគ្រប់ រាជធានី-ខេត្ត ត្រូវជំរុញឲ្យមានសកម្មភាពអប់រំផ្សព្វផ្សាយ ពីបញ្ហាគ្រឿងញៀន ក្នុងឱកាសបុណ្យកាន់បិណ្ឌ និងភ្ជុំបិណ្ឌប្រពៃណីជាតិខ្មែរ។

យោងតាមលិខិតរបស់ ក្រសួងធម្មការ នាថ្ងៃទី២០ កញ្ញា លោក ឈិត សុខុន បានថ្លែងថា ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ និងឈានមកដល់ នាពេលដ៏ខ្លីខាងមុខនេះ មន្ត្រីរាជការក៏ដូចជាប្រជាពលរដ្ឋគ្រប់រូប នឹងធ្វើដំណើរទៅកាន់ ទីវត្តអារាមជិតឆ្ងាយ ដើម្បីប្រារព្ធពិធីបុណ្យកាន់បិណ្ឌ និងភ្ជុំបិណ្ឌរយៈពេល ១៥ថ្ងៃ ចាប់ពីថ្ងៃ២២ កញ្ញា ដល់ថ្ងៃទី៦ ខែតុលា ឆ្នាំ២០២១ ខាងមុខនេះ។

ផ្ទាំងពាណិជ្ជកម្ម

លោកបញ្ជាក់ថា «ខ្ញុំសូមស្នើដល់ប្រធានមន្ទីរធម្មការ និងសាសនាគ្រប់ រាជធានី-ខេត្ត ពិនិត្យ និងជួយអន្តរាគមន៍ ទៅគ្រប់ការិយាល័យធម្មការ និងសាសនាក្រុង-ស្រុក-ខណ្ឌ ដើម្បីអន្តរាគមន៍ ទៅគ្រប់វត្ដអារាមទាំងអស់ ឱ្យយកចិត្តទុកដាក់បញ្ជ្រាបខ្លឹមសារអប់រំ ពីបញ្ហាគ្រឿងញៀន ដល់បងប្អូនប្រជាពលរដ្ឋ យើងឲ្យយល់ដឹងកាន់តែច្បាស់ និងចូលរួមកាន់តែសកម្ម ក្នុងការការពារខ្លួន ក្រុមគ្រួសារ មិត្តភក្តិ និងសហគមន៍ពី រាល់បញ្ហាដែលមាន ការពាក់ព័ន្ធនឹងគ្រឿងញៀន»។

លោករដ្ឋមន្ដ្រីបន្ដថា មន្ទីរធម្មការ និងសាសនាគ្រប់រាជធានី-ខេត្ត ជួយជំរុញឲ្យ មានសកម្មភាពអប់រំផ្សព្វផ្សាយ ពីបញ្ហាគ្រឿងញៀនឲ្យបានទូលំទូលាយ៕

To Top