ព័ត៌មានជាតិ

សម្ដេច ស ខេង បញ្ជារដ្ឋបាលរាជធានី-ខេត្ត ត្រៀមទុកជាមុននូវយុវជន មានសមត្ថភាព ធ្វើជាអភិបាលស្រុក ឬអភិបាលរងខេត្ត (Video)

ភ្នំពេញ ៖ ក្នុងរយៈពេលប៉ុន្មានថ្ងៃមកនេះ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានចុះប្រកាសតំណែង អភិបាលខេត្តថ្មីៗជាប់ៗគ្នា ។ សម្រាប់ការប្រកាសតំណែងលោក ជាវ តាយជាអភិបាលខេត្តពោធិ៍សាត់ថ្មី សម្តេចបានណែនាំដល់រដ្ឋបាលរាជធានី-ខេត្ត ទាំងអស់ ត្រូវត្រៀមទុកជាមុន នូវយុវជនដែលមានសមត្ថភាពខ្ពស់ ដើម្បីធ្វើជាអភិបាលស្រុក ឬអភិបាលរងខេត្ត ព្រោះខេត្តមួយចំនួន ធ្វើបានជោគជ័យដោយសារការជ្រើសរើសមន្រ្តីវ័យក្មេង ។

ក្នុងពិធីប្រកាសចូលកាន់មុខតំណែង អភិបាលខេត្តពោធិ៍សាត់ថ្មី នាថ្ងៃទី១៤ ខែតុលា ឆ្នាំ២០២១ នៅរដ្ឋបាលខេត្តពោធិ៍សាត់ សម្ដេច ស ខេង បានបញ្ជាក់ថា រដ្ឋបាលរាជធានី-ខេត្ត ត្រូវរៀបចំទុកជាមុន នូវយុវជនដែលមានសមត្ថភាព និងមានលទ្ធភាព ក្នុងការបម្រើការងារនៅក្រុង-ស្រុក-ខណ្ឌ និងខេត្ត។

សម្ដេចមានប្រសាសន៍ថា «ដូច្នេះកុំឲ្យខ្វះប្រភពហ្នឹង ព្រោះថា ឥឡូវនឹងការចាត់ចែងមន្ដ្រីហ្នឹង យើងបានប្រគល់ឲ្យរដ្ឋបាលថ្នាក់ក្រោមជាតិ ហើយព្រះរាជក្រឹត្យ បានទម្លាក់មកឲ្យរដ្ឋបាលខេត្តទទួលខុសត្រូវ ហើយរដ្ឋបាលខេត្ត ត្រូវយកចិត្តទុកដាក់គិតអំពីបញ្ហានេះ ជៀសវាងថា ដល់ពេលទៅរកមនុស្ស ដើម្បីដាក់ធ្វើតំណែងនេះ ធ្វើតំណែងនោះ នៅថ្នាក់ស្រុកក្ដី នៅថ្នាក់ខេត្តក្ដី យើងពិបាក ដោយយើងមិនបានគិតទុកជាមុន ហើយមានខេត្តខ្លះ ធ្វើបានល្អ ហើយខេត្តមានខ្លះទៀតក៏មានបញ្ហា ក្នុងការរើសមន្ដ្រី»។

សម្ដេចរៀបរាប់ថា បច្ចុប្បន្នមានខេត្តមួយចំនួន បានគិតគូរពីចម្ងាយ ហើយបានបញ្ជូនមន្ដ្រីជាយុវជន ដែលបានរៀនសូត្រចប់បរិញ្ញាបត្រ ចុះទៅធ្វើការងារនៅមូលដ្ឋាន ដូចជា ៖ នៅថ្នាក់ស្រុក នៅតាមការរិយាល័យ ថ្នាក់ស្រុក ជាដើម ។ សម្ដេចថា ក្រោយមកទៀត រដ្ឋបាលខេត្តបានស្រង់មន្ដ្រីទាំងនោះមកវិញ ដើម្បីតែងតាំងជាអភិបាលរងស្រុក រហូតដល់ធ្វើជាអភិបាលរងខេត្ត ឬអភិបាលខេត្ត។

សម្ដេច ក៏បានស្នើរដ្ឋបាលរាជធានី-ខេត្ត ទាំងអស់ ត្រូវពិនិត្យមើល និងជោគវាសនាទៅថ្ងៃអនាគត ប្រទេសជាតិ ព្រមទាំងបើកឱកាសយុវជន បានសិក្សារៀនសូត្រ នៅថ្នាក់បរិញ្ញាបត្រ អនុបណ្ឌិត ឬបណ្ឌិត ដើម្បីយកចំណេះដឹងទាំងនោះមកធ្វើការនៅថ្នាក់ក្រោមជាតិ ព្រោះពេលបច្ចុប្បន្នយុវជនមានចំណេះដឹង សមត្ថភាព និងបទពិសោធន៍ច្រើន។

ជាងនេះទៅទៀត សម្ដេច ស ខេង បានរំលឹកថា កាលជំនាន់មុនពិបាករកអ្នកមានសមត្ថភាពឈរឈ្មោះធ្វើមេឃុំ-ចៅសង្កាត់។ ប៉ុន្ដែមកដល់ពេលបច្ចុប្បន្ន មានអ្នកមានសមត្ថភាពឈរឈ្មោះធ្វើ មេឃុំ-ចៅសង្កាត់ ច្រើន ដោយសារពួកគាត់មានចំណេះដឹង និងសមត្ថភាព តាមរយៈការបញ្ចប់សិក្សាថ្នាក់បរិញ្ញាបត្រ ៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top