ភ្នំពេញ៖ លោកបណ្ឌិត ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា នឹងក្លាយជាអនុប្រធានទី១ រដ្ឋសភាជំនួសកន្លែង លោក ងួន ញ៉ិល ទទួលមរណភាព។ នេះបើតាម លោក ឡេង ប៉េងឡុង អគ្គលេខាធិការរដ្ឋានរដ្ឋសភា និងជាអ្នកនាំពាក្យរដ្ឋសភា។
លោក ឡេង ប៉េងឡុង បានឲ្យដឹងនៅថ្ងៃទី១៥ ខែវិច្ឆិកា ឆ្នាំ២០២១ថា លោក ជាម យៀប ត្រូវបានគណបក្សប្រជាជនកម្ពុជា ស្នើសុំធ្វើជាអនុប្រធានទី១រដ្ឋសភា ជំនួសកន្លែងលោក ងួន ញ៉ិលដែលបានទទួលមរណភាព កាលពីកន្លងមក ។
អ្នកនាំពាក្យបានគូសបញ្ជាក់ថា «ឯកឧត្តម ជាម យៀប ពិតជាត្រូវជំនួសកន្លែង ឯកឧត្តម ងួន ញ៉ិល ពិតមែន ។ ត្រឹមត្រូវ យើងនឹងធ្វើតាមនីតិវីធីរដ្ឋសភា ពីព្រោះថាជាសំណើ របស់គណបក្សប្រជាជនកម្ពុជា»។
លោក ឡេង ប៉េងឡុង បានឲ្យដឹងទៀតថា ការទទួលតួនាទី អនុប្រធានទី១ រដ្ឋសភា នឹងធ្វើឡើងក្នុងសម័យប្រជុំពេញអង្គរដ្ឋសភា នៅពេលខាងមុខ បន្ទាប់ពីគណៈកម្មាធិការអចិន្ត្រៃយ៍ ប្រជុំកំណត់ពេលវេលារួច។
លោកគូសបញ្ជាក់បន្ថែមថា «ជាសំណើររបស់គណបក្សប្រជាជនកម្ពុជា យើងនឹងប្រជុំអនុម័ត នៅក្នុងសម័យប្រជុំពេញអង្គ នៅក្រោយពិធីបុណ្យអុំទូក»។
ក្នុងសម័យប្រជុំពេញអង្គរដ្ឋសភា ក្នុងការអនុម័តជ្រើសរើសលោក ជាម យៀប ជាអនុប្រធានទី១រដ្ឋសភា បើតាមលោកឡេង ប៉េងឡុង ក៏នឹងលើកយកសេចក្តីព្រាងច្បាប់ថវិកាជាតិ សម្រាប់ការគ្រប់គ្រង ឆ្នាំ២០២២ផងដែរ។ លោកថា បើមិនមានប្រែប្រួលទេ សម័យពេញអង្គរដ្ឋសភា នឹងធ្វើនៅក្រោយបុណ្យអុំទូក ក្រោយគណៈកម្មាធិការអចិន្ត្រៃយ៍ នឹងបើកសម័យប្រជុំរួច កំណត់ថ្ងៃប្រជុំពេញអង្គតែម្តង ៕ ស សំណាង
