ភ្នំពេញ ៖ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ត្រី ក្រសួងសាធារណការ និងដឹកជញ្ជូន បានស្នើធនាគារពិភពលោក បន្តតាមដានសកម្មភាព របស់ខ្លួនទាក់ទង នឹងគម្រោងទប់ស្កាត់ការ ដឹកជញ្ជូនលើសទម្ងន់ ដែលអនុវត្តតាំងពីរយៈពេល១៥ឆ្នាំកន្លងទៅ ។
ក្នុងជំនួបពិភាក្សាការងារជាមួយ លោកស្រី Mariam Sharman នាយិកាធនាគារពិភពលោក ប្រចាំកម្ពុជា, ឡាវ និងមីយ៉ាន់ម៉ា នាថ្ងៃទី១៦ ខែវិច្ឆិកា ឆ្នាំ២០២១ នៅទីស្តីការក្រសួង លោក ស៊ុន ចាន់ថុល បានលើកឡើង ពីការរៀបចំគោល នយោបាយ និងការគាំទ្រពេញ លេញសម្រាប់រថយន្តដើរ ដោយថាមពលអគ្គិសនី(EVs) និងការធានាឱ្យមានហេដ្ឋារចនាសម្ព័ន្ធទាំងមូល សម្រាប់EVsនៅកម្ពុជា ជាពិសេសស្ថានីយ៍សាកអាគុយ កន្លែងផ្តល់សេវា គ្រឿងបន្លាស់ បុគ្គលិកទទួល ការបណ្តុះបណ្តាល និងសេវាពាក់ព័ន្ធផ្សេងទៀត ដើម្បីទាក់ទាញចំណាប់អារម្មណ៍ប្រជាពលរដ្ឋកម្ពុជា ឱ្យមកពិចារណាលើរថយន្តដើរដោយថាមពលកកើតឡើងវិញ ជំនួសឱ្យរថយន្តដើរដោយឥន្ធនៈ។
លោក បានស្នើឱ្យធនាគារពិភពលោក ពិនិត្យលើជំនួយបច្ចេកទេសលើគម្រោងមួយ ចំនួនរួមមាន៖ ការកសាងសមត្ថភាពមន្ត្រីក្រសួងសាធារណការ និងដឹកជញ្ជូន កិច្ចសហប្រតិបត្តិការជាមួយ រវាងធនាគារពិភពលោក និងក្រសួងលើការសិក្សា ដល់ទីកន្លែង ដើម្បីកំណត់ទំហំថវិកាឱ្យបាន ជាក់លាក់សំដៅសាងសង់ ផ្លូវឱ្យបានរឹងមាំ និងផែនការមេទាក់ទងទឹកកខ្វក់ទូទាំងប្រទេស និង បានស្នើឱ្យ ធនាគារពិភពលោក បញ្ជូនអ្នកជំនាញ ការរបស់ខ្លួនមកសិក្សា ឱ្យបានច្បាស់លាស់ដើម្បីឈានទៅ បង្កើតផែនការ មេចម្រោះទឹកកខ្វក់នេះ។
លោក បានបញ្ជាក់ថា «ស្នើឱ្យធនាគារពិភពលោក បន្តតាមដានសកម្មភាព របស់ខ្លួនផងដែរទាក់ទង នឹងគម្រោងទប់ស្កាត់ការ ដឹកជញ្ជូនលើសទម្ងន់ ដែលបានអនុវត្តតាំងពីរយៈពេល១៥ឆ្នាំកន្លងទៅ ជាពិសេស ពិនិត្យនិងប្រៀបធៀបភាពខុសគ្នា នៃលក្ខណៈបច្ចេកវិទ្យាកន្លងទៅ និងបច្ចេកវិទ្យាបច្ចុប្បន្ន ដើម្បីចូលរួមបង្ការ ទប់ស្កាត់ការដឹកជញ្ជូន លើសទម្ងន់កម្រិតកំណត់ ដែលបណ្តាលឱ្យផ្លូវឆាប់ខូចមុនអាយុ កាល និងបានស្នើឱ្យធនាធនាគារពិភពលោក ពង្រឹងនិងពង្រីកកិច្ច សហប្រតិបត្តិការ និងភាពជាដៃគូជិត ស្និទ្ធទៅថ្ងៃខាងមុខបន្តទៀត នៅក្នុងការអភិវឌ្ឍ ហេដ្ឋារចនាសម្ព័ន្ធកម្ពុជា ឱ្យកាន់តែមានការរីកចម្រើន បន្ថែមទៀត»។
ជាមួយគ្នានោះផងដែរ លោកស្រីនាយិកា បានថ្លែងការកោតសរសើរ ដល់ក្រសួង ដែលបានសហការល្អជាមួយធនាគារ ពិភពលោកទាក់ទងនឹងទាក់ទង នឹងការអនុវត្តគម្រោងRAMP II ដែលរួមមាន៖ គម្រោងធ្វើឱ្យប្រសើរឡើងផ្លូវជាតិ លេខ៣ គម្រោងធ្វើឱ្យប្រសើរឡើង ផ្លូវជាតិលេខ៤ និងផ្លូវជាតិលេខ៧ និងបានលើកឡើងផងដែរទាក់ទងនឹងការគ្រប់គ្រងទឹកកខ្វក់ ការដឹកជញ្ជូនបៃតង ដោយប្រើថាមពលក កើតឡើងវិញនៅទីក្រុងសៀមរាប ច្រករបៀងសេដ្ឋកិច្ចសំខាន់ៗ និងការតភ្ជាប់តំបន់ផងដែរ៕
