នយោបាយ

កិច្ចប្រជុំកំពូល ASEM ជាឱកាសសម្រាប់ថ្នាក់ដឹកនាំ បញ្ជាក់ពីការចូលរួម​ ដោះស្រាយបញ្ហាតំបន់ និងសកលលោក

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានថ្លែងថា កិច្ចប្រជុំកំពូល អាស៊ី-អឺរ៉ុប លើកទី១៣ (ASEM-13) ដែលកម្ពុជា ធ្វើជាម្ចាសផ្ទះនាពេលនេះ គឺជាឱកាសសម្រាប់ថ្នាក់ដឹកនាំ ASEM បញ្ជាក់សារជាថ្មី អំពីការចូលរួមដោះស្រាយបញ្ហាតំបន់ និងសកលលោក ដែលជាក្ដីបារម្ភរួមគ្នា ។

កម្ពុជា បាននិងកំពុងធ្វើជាម្ចាស់ផ្ទះ ដឹកនាំកិច្ចប្រជុំកំពូល អាស៊ី-អឺរ៉ុប លើកទី១៣ (ASEM13) ចាប់ពីថ្ងៃទី២៥-២៦ ខែវិច្ឆិកា ឆ្នាំ២០២១ តាមរយៈប្រព័ន្ធវីដេអូ ពីវិមានសនិ្តភាព រាជធានីភ្នំពេញ ។

ក្នុងកិច្ចប្រជុំកំពូលអាស៊ី-អឺរ៉ុប លើកទី១៣ ក្រោមមូលបទ «ការពង្រឹងពហុភាគីនិយម ដើម្បីកំណើនរួម» នារសៀលថ្ងៃទី២៥ វិច្ឆិកា នេះ សម្ដេចតេជោ ហ៊ុន សែន បានឲ្យដឹងថា ASEM កំពុងបន្តដំណើរឆ្ពោះទៅកាន់ទសវត្សរ៍បន្ទាប់នៃអត្ថិភាពរបស់ខ្លួន យើងទាំងអស់គ្នាមានការ ទទួលខុសត្រូវរួម ក្នុងការធានាថា ASEM នៅបន្តជាវេទិកាអន្តរតំបន់ដ៏សំខាន់ និងរឹងមាំមួយ ដែលអាចនាំមកនូវ អត្ថប្រយោជន៍យ៉ាងធំធេងដល់ប្រជាជន របស់ខ្លួន ព្រមទាំងអាចចូល រួមចំណែកកាន់តែទូលំទូលាយថែមទៀត ដល់ការធានា និងរក្សានូវសន្តិភាព ស្ថិរភាព វិបុលភាព និងការអភិវឌ្ឍ របស់ពិភពលោក។

សម្ដេចតេជោ បានបញ្ជាក់ថា «កិច្ចប្រជុំកំពូល SEM នាថ្ងៃនេះ គឺជាឱកាសដ៏ទាន់ពេលមួយ សម្រាប់ថ្នាក់ដឹកនាំ ASEM បញ្ជាក់សារជាថ្មី អំពីសារសំខាន់នៃភាពជាដៃគូ និងកិច្ចសហប្រតិបត្តិការអាស៊ី-អឺរ៉ុប ក្នុងការចូលរួមដោះស្រាយបញ្ហាតំបន់ និងសកល ដែលជាក្តីបារម្ភរួមគ្នា»។

សម្ដេចតេជោ បានបន្ដថា ចាប់តាំង ពីបានចូលរួមនៅ ក្នុងដំណើរការ ASEM នៅឆ្នាំ ២០០៤ កម្ពុជា តែងតែយកចិត្តទុកដាក់ ចំពោះដំណើរការ នៃកិច្ចប្រជុំកំពូលនេះ ។ ការរក្សាសន្ទុះ នៃដំណើរ ការ ASEM ពិតជាមានសារ សំខាន់កាន់តែខ្លាំងឡើង នៅក្នុងបរិបទ នៃការរស់នៅជាមួយជំងឺកូវីដ-១៩ នាបច្ចុប្បន្ននេះ ។

សូមបញ្ជាក់ថា កិច្ចប្រជុំកំពូលអាស៊ី-អឺរ៉ុប លើកទី១៣ នាពេលនេះ ក្នុងគោលបំណងសំខាន់ៗ ដូចជា ៖ ធ្វើឲ្យកាន់តែស៊ីជម្រៅ នៃការតភ្ជាប់អន្តរតំបន់ ដើម្បីការអភិវឌ្ឍប្រកបដោយចីរភាព បរិយាប័ន្ន និងកំណើនរួមគ្នា, លើកស្ទួយភាពជា ដៃគូអន្តរតំបន់ ដើម្បីអភិបាលកិច្ចសកល, លើកកម្ពស់ប្រសិទ្ធភាព នៃប្រព័ន្ធពហុភាគី ផ្អែកលើវិធានច្បាប់, ទាញអត្ថប្រយោជន៍ពីនវានុវត្តន៍ ការតភ្ជាប់ឌីជីថល និងបដិវត្តន៍ ឧស្សាហកម្ម៤.០, ពង្រឹងភាពលេចធ្លោ និងភាពពាក់ព័ន្ធរបស់ ASEM និងដោះស្រាយបញ្ហាពហុវិស័យនានា ជាអាទិ៍ ការប្រែប្រួលអាកាសធាតុ ភាពក្រីក្រ ការលើកកម្ពស់សិទ្ធិអំណាចស្ត្រី ព្រមទាំងបញ្ហាប្រឈមឆ្លងដែនផ្សេងៗទៀត៕

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top
×