ភ្នំពេញ: សាលាដំបូងរាជធានីភ្នំពេញ កាលពីទី១៧ខែ មករា ឆ្នាំ ២០២២ បានបើកសវនាការ ជំនុំជម្រះ កុមារីជាប់ចោទម្នាក់ ពាក់ព័ន្ធនឹងករណី ជួញដួរស្រ្តី ខ្មែរ ដើម្បីទៅ រៀបការប្តី នៅចិន ប្រព្រឹត្តកាលពីអំឡុងឆ្នាំ ២០២០។
លោកកី ម៉ាណេរ៉ា ជាប្រធានចៅក្រមប្រឹក្សាជំនុំជម្រះ សាលាដំបូងរាជធានីភ្នំពេញ បានថ្លែងអោយដឹងនៅក្នុងសវនាការថា ជនជាប់ចោទរួបនេះ មានឈ្មោះ ភស់ សុខហេង ភេទ ស្រី អាយុ១៦ ឆ្នាំ មានទីលំនៅខណ្ឌព្រែកព្នៅ រាជធានីភ្នំពេញ។
លោកចៅក្រមបានថ្លែងថា ជនជាប់ចោទត្រូវបានជាប់ចោទ ពីបទ«ការនាំយកចេញ ដោយមិនស្របច្បាប់ សម្រាប់នាំឆ្លងដែន » តាមមាត្រ១១ នៃច្បាប់ស្តីពីការបង្រ្កាបអំពើជួញដូរមនុស្ស នឹងអំពើអាជីវកម្មផ្លូវភេទ។
ជនជាប់ចោទត្រូវបានចាប់ឃាត់ខ្លួន កាលពីថ្ងៃ ទី ២១ ខែ មីនា ឆ្នាំ ២០២១ តាមបណ្តឹងរបស់កុមារីរងគ្រោះម្នាក់ អាយុ ១៦ ឆ្នាំ ដែលត្រូវបានជួញដូរ ទៅរៀបការប្តី នៅប្រទេសចិន កាលពីឆ្នាំ ២០២០។
នាពេលសវនាការ កាលពីព្រឹកថ្ងៃច័ន្ទ
កុមារីជាប់ចោទឈ្មោះ សុហេង បានឆ្លើយសារភាព នឹងទទួលស្គាល់កំហុស។
ក៏ប៉ុន្តែនាងបាននិយាយ នាងក៏ជាជនរងគ្រោះផងដែរ និង ត្រូវបានចាញ់បោក ស្ត្រីខ្មែរម្នាក់ឈ្មោះ «ចាន់» ដែលគេចខ្លួន អោយប្រព្រឹត្តបទល្មើស ខាងលើនេះ។
កុមារីជាប់ចោទ បានសំណូមពរដល់ចៅក្រមប្រឹក្សាជំនុំជម្រះ នៃ សាលាដំបូងរាជធានីភ្នំពេញ មេត្តាលើកលែងបទប្រកាន់និង ដោះលែងរូបនាង ពីពន្ធនាគារ ដើម្បីបានជួបជុំនឹងឪពុកម្តាយរបស់នាងវិញ។
សាលាដំបូងរាជធានីភ្នំពេញ នឹងប្រកាសសាលក្រម សំណុំរឿងក្តីនេះ នៅថ្ងៃទី៨ ខែ កុម្ភះ ឆ្នាំ ២០២២ ។
ដោយ គា លីហ្សា
