ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានផ្តាំផ្ញើដល់មន្រ្តីជាន់ខ្ពស់កម្ពុជាថា កុំទុកចិត្តអង្គរក្ស និងតែកុងឡានរឿងកូវីដ-១៩ ព្រោះ សម្តេចផ្ទាល់ធ្លាប់បានជួបប្រទះ២ ដងហើយ រឿងអង្គរក្សកើតកូវីដ-១៩ ហើយសម្ដេចក៏អំពាវនា ដល់ប្រជាពលរដ្ឋ បន្ដចាក់វ៉ាក់សាំងដូសជំរុញ និងដូសទី៤ ដើម្បីទប់ស្កាត់ជំងឺកូវីដ-១៩ ។
ក្នុងពិធីសម្ពោធដាក់ប្រើប្រាស់ស្ពាន ៧កន្លែង ស្ថិតនៅក្នុងខេត្តក្រចេះ និងព្រៃវែង នៅព្រឹកថ្ងៃទី១៦ ខែកុម្ភៈ ឆ្នាំ២០២២ សម្តេចតេជោ ហ៊ុន សែន បានប្រាប់ថ្នាក់ដឹកនាំនៅកម្ពុជាទាំងអស់ថា កុំទុកចិត្តអង្គរក្ស និងតែកុងឡាន ព្រោះសម្តេចបានជួបបទពិសោធន៍ ២លើករួចមក ដោយសារអង្គរក្ស និងអ្នកលើកម្ហូបឲ្យសម្ដេចកើតកូវីដ-១៩ ។
សម្ដេចតេជោ មានប្រសាសន៍ថា «ខ្ញុំ សូមផ្ដាំផ្ញើមេដឹកនាំទាំងអស់ កុំទុកចិត្តពេកជាមួយកុងឡាន និងអង្គរក្ស ។ សូម្បីតែផ្ទះខ្ញុំ ជួប២ដង រួចទៅហើយ»។
ពាក់ព័ន្ធករណីនេះ សម្ដេចតេជោ ក៏បានដាក់បទបញ្ជាថា បើអង្គរក្សណាលួចចេញពីផ្ទះសម្ដេច គឺមិនអនុញ្ញាតឲ្យត្រឡប់មកវិញឡើយ ។ ដោយហេតុថា បើកាលណាគ្មានវិន័យហើយ កិច្ចការពារខ្លួនសម្ដេច គឺមិនជាប់ឡើយ ដូច្នេះគ្រប់ៗត្រូវចូលរួមទប់ស្កាត់កូវីដ-១៩ទាំងអស់គ្នា។
ជាមួយគ្នានេះដែរ សម្ដេចតេជោ ក៏បានណែនាំដល់ក្រុមគ្រូពេទ្យ អាជ្ញាធរ និងប្រជាពលរដ្ឋ ត្រូវបន្ដការខិតខំបន្ថែមទៀត ក្នុងការប្រយុទ្ធប្រឆាំងជំងឺកូវីដ-១៩ ។ សម្ដេចថា ដែលតា និងអាហ្វាលនាពេលបច្ចុប្បន្នស្ទើរតែអស់ពីកម្ពុជា នៅឡើយតែអូមីក្រុង។ បញ្ហាកូវីដ-១៩ សម្ដេច ក៏បានលុបចោលការជួបជុំ ចំនួន ២កម្មវិធីផងដែរ។
សម្ដេចតេជោ បានអំពាវនាវដល់ប្រជាពលរដ្ឋគ្រប់រូប ត្រូវបន្ដចូលរួមចាក់វ៉ាក់សាំងកូវីដ-១៩ នូវដូសជំរុញ និងដូសទី៤ ឲ្យបានគ្រប់ៗគ្នា។ សម្ដេច ក៏បានដាក់តឿនដល់ក្រុមគ្រូពេទ្យ ត្រូវពន្លឿននៃការចាក់វ៉ាក់សាំង ផងដែរ។
សម្ដេចតេជោ បញ្ជាក់ថា «សូមកុំរំពឹងទៅលើវ៉ាក់សាំងដូសទី២ ខ្លាំងពេក ត្រូវបង្កើនប្រសិទ្ធភាពនូវដូសទី៣។ ខ្ញុំ ពេលពិនិត្យឈាមដូសទី៣ នៅសល់៧០០ ទើបចូលដូសទី៤ ប៉ុន្ដែ វ៉ាក់សាំង ទោះបីប៉ុន្មានដូសក៏ដោយទប់អត់ជាប់ទេ ត្រូវតែអនុវត្តវិធានការ ៣ការពារ ៣កុំ»៕
