ភ្នំពេញ ៖ រដ្ឋាភិបាលជប៉ុន នាថ្ងៃទី១១ ខែមីនា ឆ្នាំ២០២២ បានឯកភាពផ្តល់ថវិកា ចំនួន ៨១៧,៧៥៦ ដុល្លារអាមេរិក ដល់អង្គភាពទទួលជំនួយចំនួន២ ក្រោមគ្រោងការជំនួយ ហិរញ្ញប្បទាន ឥតសំណង សម្រាប់គម្រោងអង្គការ ក្រៅរដ្ឋាភិបាលជប៉ុន ។
ក្នុងនោះ ថវិកាចំនួន ១២០,៤៦១ ដុល្លារអាមេរិក ត្រូវបានផ្តល់ទៅអង្គការ មិនរកប្រាក់ចំណេញ Nature Center Risen ដើម្បីអនុវត្ត «គម្រោងការសម្រេច ឲ្យបាននូវបរិស្ថានរស់នៅ ប្រកបដោយចីរភាព របស់ប្រជាពលរដ្ឋកម្ពុជា តាមរយៈការលើកកម្ពស់ និងអប់រំការយល់ដឹង អំពីបញ្ហាបរិស្ថាន (ឆ្នាំទី២)»។
ដោយឡែក ថវិកាចំនួន ៦៩៧,២៩៥ ដុល្លារអាមេរិក ត្រូវបានផ្តល់ទៅអង្គការ Save the Children Japan (SCJ) ដើម្បីអនុវត្ត «គម្រោងលុបបំបាត់ អំពើហិង្សាលើកុមារ នៅតាមសាលារៀនក្នុងខេត្តកំពង់ចាម ប្រទេសកម្ពុជា (ឆ្នាំទី១)»។
នាឱកាសនោះដែរ លោក មិកាមិ ម៉ាសាហ៊ីរ៉ូ ឯកអគ្គរាជទូត ជប៉ុន ប្រចាំកម្ពុជា និងអ្នកតំណាងមកពីអង្គការទាំងពីរ បានចុះហត្ថលេខាលើ កិច្ចសន្យាផ្តល់ជំនួយឥត សំណង នេះ ហើយ លោកទូត ក៏បានថ្លែងអំណរគុណចំពោះអង្គការទាំងពីរ ដែលបានចូលរួម ក្នុងគំនិតផ្តួចផ្តើម របស់រដ្ឋាភិបាលជប៉ុន។
លោកទូត បានបន្ដថា ខណៈដែលគម្រោងជំនួយអភិវឌ្ឍន៍ផ្លូវការខ្នាតធំ ដូចជា គម្រោងកំពង់ផែក្រុងព្រះសីហនុ គម្រោងផ្លូវជាតិលេខ៥ និងកម្ចីហិរញ្ញប្បទានចំនួន ២០ពាន់លានយេន សម្រាប់ការប្រយុទ្ធប្រឆាំងនឹងជំងឺកូវីដ១៩ ជារឿយៗត្រូវបានផ្តោតសំខាន់នៅលើប្រព័ន្ធផ្សព្វផ្សាយ វានៅតែជាអាទិភាពមួយសម្រាប់រដ្ឋាភិបាលជប៉ុន ក្នុងការធ្វើការ ជាមួយអាជ្ញាធរមូលដ្ឋាន និងអង្គការក្រៅរដ្ឋាភិបាលជប៉ុន ដើម្បីចូលរួមចំណែក ក្នុងការកែលម្អគុណភាពជីវិត នៅក្នុងបណ្តាខេត្តនានា ។
លោកទូត បានបញ្ជាក់ថា «យើងជឿជាក់ថា ជំនួយឥតសំណងទាំង នេះ នឹងជួយពង្រឹងគុណភាព ជីវិតរបស់ប្រជាជន ដែលរស់នៅក្នុងទីតាំង គម្រោងនីមួយៗ»៕
