ភ្នំពេញ ៖ ពាក់ព័ន្ធទៅនឹងការឡើងថ្លៃយ៉ាងខ្លាំង ទៅលើតម្លៃប្រេងឥន្ទនៈនៅកម្ពុជា សម្តេចតេជោ ហ៊ុន សែន នាយករដ្ឋមន្ត្រី បានទទូចស្នើសុំ ឲ្យពលរដ្ឋទាំងអស់ យោគយល់ និងត្រូវដឹងអំពីបញ្ហា កំពុងកើតមានឡើង នៅលើសកលលោក ដោយកុំចាំតែជេរសម្តេច ព្រោះទោះបីជាយ៉ាងណា សម្តេចនៅតែបញ្ជាក់ថា ដំណោះស្រាយនៅតែមាន ។
ក្នុងពិធីសម្ពោធដាក់ឲ្យប្រើប្រាស់ «ភូមិកុមារ SOS» នៅខេត្តព្រៃវែង នាថ្ងៃទី១៧ ខែមីនា ឆ្នាំ២០២២ សម្ដេចតេជោ បានមានប្រសាសន៍ថា “សាំងឡើងថ្លៃសូមកុំជេរ ហ៊ុន សែន អី រឿងនេះ វាជារឿង សភាពការណ៍អន្តរជាតិ ដែលបានកើតឡើង សង្គ្រាមរវាងរុស្ស៊ី និងអ៊ុយក្រែន វាបានបង្កើតជាបញ្ហា សម្រាប់សេដ្ឋកិច្ចសកលហើយ ។ អតិផរណា នៅសហរដ្ឋអាមេរិក គេថាមិនធ្លាប់មាន ក្នុងរយៈពេល៤០ឆ្នាំ ។ នៅអឺរ៉ុប ក៏កំពុងទទួលរងផលប៉ះពាល់” ។
សម្តេចមានប្រសាសន៍បន្តថា “ឥឡូវគេនាំគ្នាឈប់ទិញប្រេងពីរុស្ស៊ី អានេះ ជាភ័ព្វសំណាង របស់សហរដ្ឋអេមេរិក ដែលអាមេរិក ដាក់ទណ្ឌកម្មគ្រប់ផ្នែក ក៏ប៉ុន្តែនៅទិញប្រេងពីរុស្ស៊ី ប៉ុន្តែទៅដល់កាលដែលខឹង វេណេហ្ស៊ូអេឡា ឈប់ទិញប្រេង ពីវេណេហ្ស៊ូអេឡា ដើម្បីដាក់ទណ្ឌកម្មទៅលើវេណេហ្ស៊ូអេឡា ដល់ឥឡូវ ត្រូវដាក់ទណ្ឌកម្មលើរុស្ស៊ី អាមេរិកត្រូវទៅចរចា ទិញប្រេង ពីវេណេហ្ស៊ូអេឡា ដើម្បីបញ្ឈប់ទិញប្រេង ពីរុស្ស៊ីម្តង” ។
សម្តេចក៏បានចោទជាសំនួរដែលថា ចុះបើវេណេហ្ស៊ូអេឡា មិនព្រមលក់ប្រេង ឲ្យសហរដ្ឋអាមេរិកទៅវិញនោះ តើស្ថានភាព នឹងកាន់តែយ៉ាប់យឺនយ៉ាងណាទៅ? ។
សម្តេចតេជោ នាយករដ្ឋមន្ត្រីបានបញ្ជាក់ច្បាស់ៗថា ប្រេងសាំង នឹងមានការឡើងថ្លៃបន្ថែមទៀត ប៉ុន្តែដំណោះស្រាយ នៅតែអាចមានផងដែរ តាមរយៈការកាត់បន្ថយធ្វើដំណើរ និងកាត់បន្ថយមធ្យោបាយ ធ្វើដំណើរ ជាដើម ។
សម្តេចតេជោ មានប្រសាសន៍ថា “រអ៊ូនៅតែរអ៊ូ អាដើរនៅតែដើរ ស្ទះឡានពេញតែផ្លូវ ប៉ុន្តែធ្វើម្តេចអាហ្នឹងជាតម្រូវការ ខ្ញុំអត់ទៅរារាំងបានទេ” ។
គួរឲ្យដឹងផងដែរថា ក្រសួងពាណិជ្ជកម្ម បានប្រកាសពីតម្លៃប្រេងសាំង ចាប់ពីថ្ងៃទី១៦-៣១ ខែមីនា ឆ្នាំ២០២២ ដោយសាំងធម្មតាឡើង និងប្រេងម៉ាស៊ូត មានតម្លៃ៥៣០០រៀលដូចគ្នា ខណៈដែលប្រេងសាំងធម្មតាឡើង៥០០រៀល និងម៉ាស៊ូត ឡើងជាងមុន៨០០រៀល ៕
