ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអំពាវនាវដល់ប្រជាពលរដ្ឋខ្មែរ មុនសម្រេចចិត្តទៅធ្វើការងារនៅប្រទេសថៃ ឬប្រទេសផ្សេងៗទៀត ត្រូវសួរព័ត៌មានអាជ្ញាធរក្នុងមូលដ្ឋាន ឲ្យច្បាស់លាស់ជាមុនសិន ដើម្បីជៀសវាងការចាញ់បោកមេខ្យល់ ព្រោះកន្លងទៅ មានពលរដ្ឋខ្មែរ ចាញ់បោកមេខ្យល់ជាច្រើននាក់។
ក្នុងពិធីសម្ពោធដាក់ឲ្យប្រើប្រាស់នូវសមិទ្ធផលនានា នៅខេត្តបាត់ដំបង នាថ្ងៃទី២៣ ខែមីនា ឆ្នាំ២០២២ សម្ដេច ស ខេង បានសង្កេតឃើញថា នាពេលកន្លងមកមានករណីជួញដូរមនុស្ស មានការលួងលោមនាំទៅក្រៅប្រទេស។ សម្ដេច ក៏បានរំលឹកថា កន្លងទៅ មានស្ដ្រីខ្មែរម្នាក់ បានចាញ់បោកគេដោយរៀប គូស្រករនៅប្រទេសកូរ៉េ ក្រោយមក សមត្ថកិច្ចកម្ពុជា សហការជាមួយក្រសួងមហាផ្ទៃកូរ៉េ បានអន្ដរាគមន៍ស្ដ្រីខ្មែរម្នាក់នោះ មកកម្ពុជាវិញ។
សម្ដេច មានប្រសាសន៍ថា «សូមកុំជឿគេផ្តេសផ្ដាស កាលណាគេមកសួរយើងថា ធ្វើការនេះ ធ្វើការនោះ ហើយធ្វើការនៅថៃស្រួលណាស់ មានប្រាក់ចំណេញ យើងត្រូវសួរព័ត៌មានឲ្យច្បាស់សិន បើយើងមិនដឹងទេ អាជ្ញាធរយើងនៅហ្នឹងកន្លែង ត្រូវសួរនាំសិន»។
លើសពីនេះ សម្ដេច ស ខេង ក៏បានលើកឡើងទៀតថា នាពេលកន្លងទៅ ក៏មានប្រជាពលរដ្ឋខ្មែរ ចាញ់បោកមេខ្យល់យ៉ាងច្រើន ដោយមេខ្យល់ទាំងនោះ ធ្វើការលួងលោមឲ្យទៅ ធ្វើការងារនៅក្រៅប្រទេស ដូច្នេះ ត្រូវមានការប្រុងប្រយ័ត្នចំពោះបញ្ហាទាំងនេះ៕
