ភ្នំពេញ ៖ អគ្គនាយកដ្ឋានពន្ធនាគារ បានឲ្យដឹងថា គិតត្រឹមខែធ្នូ ឆ្នាំ២០២១ ជនជាប់ឃុំសរុប មានចំនួន៣៨.០៧០នាក់ ក្នុងនោះ ជនជាប់ឃុំជាប់ចោទពីបទល្មើសគ្រឿងញៀនស្មើនឹង ៥៤.៤៤%។
យោងតាមរបាយការណ៍បង្ហាញ ក្នុងសន្និបាតផ្សព្វផ្សាយទិសដៅការងារឆ្នាំ២០២២ របស់ក្រសួងមហាផ្ទៃ លទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ និងផែនការសកម្មភាព ឆ្នាំ២០២២ របស់អគ្គនាយកដ្ឋានពន្ធនាគារ នាព្រឹកថ្ងៃទី២៥ ខែមីនា ឆ្នាំ២០២១ បានបញ្ជាក់ថា «គិតត្រឹមខែធ្នូ ឆ្នាំ២០២១ ជនជាប់ឃុំសរុប ៣៨.០៧០នាក់ ក្នុងនោះស្តី្រ ២.៣៦៧នាក់ ជនជាប់ឃុំចោទពីបទល្មើសគ្រឿងញៀនស្មើនឹង ៥៤.៤៤%, ជនជាប់ឃុំជនបរទេស ចំនួន ១.៦១២នាក់ និងអនីតិ ជន ១.៤២២នាក់។ ជនត្រូវចោទ ចំនួន ៦.៩៥៥នាក់, ជនជាប់ចោទ ៣.៥៥០នាក់ ពិរុទ្ធជន ១៥.៥៧៣នាក់ និងទណ្ឌិត ១១.៩៩២នាក់»។
ប្រភពដដែលបន្ដថា ជនជាប់ឃុំមានការកើនឡើងយ៉ាងកំហុកចាប់ពីឆ្នាំ២០១៧ បន្ទាប់ពីរាជរដ្ឋាភិបាល ដាក់ចេញផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ និងធ្វើការរឹតបន្តឹងការអនុវត្តច្បាប់ ទើបតែនៅឆ្នាំ២០២១នេះ ជនជាប់ឃុំបានថយចុះប្រមាណជាង ១២០០នាក់ ស្មើនឹង ៣.១៧% បើធៀបនឹង ខែធ្នូ ឆ្នាំ២០២០។
ដើម្បីឆ្លើយតបតាមបទដ្ឋានជនជាប់ឃុំឃាំងដែលធានាសន្តិសុខ សុវត្ថិភាព សុខភាព និងមនុស្សធម៌ រាជរដ្ឋាភិបាល ក្រសួងមហាផ្ទៃ បានយកចិត្តទុដាក់ដោះស្រាយ ជារួមបច្ចុប្បន្ននៅតាមមណ្ឌលអប់រំកែប្រែនិងពន្ធនាគាររាជធានី-ខេត្ត មានអគារឃុំឃាំងចំនួន ១៧៣អគារ ស្មើនឹង ១,០១៤បន្ទប់ មានផ្ទៃក្រឡា សរុប ៥៤.០៨១ម៉ែត្រក្រឡា (បូករួមការពង្រីកផ្ទៃក្រឡាអគារ ធ្វើឡៅតឿ និងអគារកែច្នៃ) ដែលធ្វើឲ្យផ្ទៃក្រឡាសម្រាប់ជនជាប់ឃុំដេកប្រសើរជាងមុន ៕
