ភ្នំពេញ ៖ ក្រសួងសាធារណការ និងដឹកជញ្ជូន បានឲ្យដឹងថា គម្រោងសាងសង់កំពង់ផែ ទេសចរណ៍ខេត្តកំពត សម្រេចវឌ្ឍនភាព ការងារសាងសង់បាន ៩៣,៤១% គ្រោងនឹងបញ្ចប់ ការសាងសង់ជាស្ថាពរ នៅថ្ងៃទី៣០ ខែមិថុនា ឆ្នាំ២០២២ខាងមុខ ។
ក្នុងឱកាសចុះពិនិត្យវឌ្ឍនភាព ការងារសាងសង់កំពង់ផែទេសចរណ៍ អន្តរជាតិប្រចាំខេត្តកំពត នាថ្ងៃទី២៩ មីនា លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និង ដឹកជញ្ជូន បានថ្លែងថា គម្រោងសាងសង់កំពង់ផែទេសចរណ៍អន្តរជាតិប្រចាំខេត្តកំពត មានទីតាំងស្ថិតនៅស្រុកទឹកឈូ កំពុងសាងសង់នៅលើផ្ទៃដីទំហំ ៤ហិកតា មានជម្រៅ៤,៥ម៉ែត្រ ជាហិរញ្ញប្បទាន របស់ធនាគារអភិវឌ្ឍន៍អាស៊ី ប្រមាណជិត ១០លានដុល្លារ។
លោកបញ្ជាក់ថា «កំពង់ផែនេះមានបណ្តោយ៣០០ម៉ែត្រ និងមានសមត្ថភាពអាចផ្ទុកនាវាដឹកអ្នកដំណើរបានពី៣០០ ទៅ៤០០នាក់ គិតត្រឹមថ្ងៃទី២២ ខែមីនា ឆ្នាំ២០២២ វឌ្ឍនភាពការងារសាងសង់ សម្រេចបាន៩៣,៤១ %ហើយគ្រោងនឹងបញ្ចប់ការសាងសង់ជាស្ថាពរនៅថ្ងៃទី៣០ ខែមិថុនា ឆ្នាំ ២០២២ខាងមុខនេះ»។
សូមបញ្ជាក់ថា ក្រោយពីបញ្ចប់ការសាងសង់ជាស្ថាពរ កំពង់ផែទេសចរណ៍អន្តរជាតិ នេះនឹងក្លាយជាច្រកទ្វារដ៏សំខាន់ សម្រាប់ទទួលភ្ញៀវទេសចរណ៍ជាតិ និងអន្តរជាតិធ្វើដំណើរកម្សាន្តតាមផ្លូវទឹក ជាពិសេស ទេសចរណ៍មកពីប្រទេសថៃ និង វៀតណាមចូលមកកាន់កម្ពុជា ជាកំពង់ផែ សម្រាប់អ្នកដំណើរមិនមែន ជាកំពង់ផែទំនិញឡើយ ។
ជាងនេះទៅទៀត កំពង់ផែនេះ ចូលរួមចំណែកអភិវឌ្ឍន៍ វិស័យទេសចរណ៍នៅខេត្តកំពត ជួយបង្កើត ឱកាសការងារ បង្កើនប្រាក់ចំណូល និងលើកកម្ពស់ ជីវភាពរស់នៅ របស់ប្រជាពលរដ្ឋ ។ កំពង់ផែនេះ ជាផ្នែកមួយ គម្រោងអភិវឌ្ឍន៍ ហេដ្ឋារចនាសម្ព័ន្ធទេសចរណ៍ សម្រាប់កំណើនប្រកបដោយបរិយាបន្ន ក្នុងមហាអនុតំបន់មេគង្គ ។ កំពង់ផែនេះ ជាច្រកទ្វារអន្តរជាតិផ្លូវ សមុទ្រយ៉ាងសំខាន់ តភ្ជាប់ការដឹកជញ្ជូន ភ្ញៀវទេសចរ ទៅកាន់បណ្តាកោះនានា នៅភាគខាងត្បូង និងតភ្ជាប់ ខេត្តកំពត នៃប្រទេសកម្ពុជា ទៅកាន់ពិភពលោក៕
