ភ្នំពេញ: តុលាការកំពូលកាលពីថ្ងៃទី ២០ ខែ មេសា ឆ្នាំ ២០២២ នេះ បានបើកសវនាការជំនុំជម្រះ លើកបណ្តឹងសារទុក្ខ បុរសជាប់ចោទម្នាក់ ជាប់ពាក់ព័ន្ធនឹងបទល្មើស ឃាតកម្មគិតទុកជាមុន ដោយបាញ់សម្លាប់ បុរសជនរងគ្រោះម្នាក់ ជាថៅកែសិប្បកម្មទឹកសុទ្ធ ប្រព្រឹត្តនៅភូមិត្រពាំងជ្រៃ ឃុំខ្លុងពពក ស្រុកទឹកផុស ខេត្តកំពង់ឆ្នាំង កាលពីអំឡុងឆ្នាំ ២០១៨។
លោកស្រី គិម សត្ថាវី ជាប្រធានចៅក្រមជំនុំជម្រះនៃ តុលាការកំពូល បានអោយដឹងថា ជនជាប់ចោទ រូបនេះ មាន ឈ្មោះ អោម ឆន(ឆោម ឆន) ភេទប្រុស អាយុ ៥៨ឆ្នាំ មុខរបរកសិករ ( ជាអតីតយោធា) មានទីលំនៅ ខេត្តកំពង់ឆ្នាំង។
ចំណែកឯ ជនរងគ្រោះ ឈ្មោះ ប៊ិន ហឿន ភេទ ប្រុស អាយុ៦១ឆ្នាំ ជាថៅកែសិប្បកម្មទឹកសុទ្ឋ មានទីលំនៅភូមិត្រពាំងជ្រៃ ឃុំខ្លុងពពក ស្រុកទឹកផុស។
នៅក្នុងសំណុំរឿងក្តីនេះ សាលាដំបូងខេត្តកំពង់ឆ្នាំងកាលពីថ្ងៃ ទី ៣០ ខែ ឧសភា ឆ្នាំ ២០១៨ បានសម្រេចផ្តន្ទាទោស ឈ្មោះ អោម ឆន ដាក់ពន្ធនាគារ កំណត់ អស់មួយជីវិត និង បង្គាប់ឱ្យ គាត់ត្រូវសងជម្ងឺចិត្តចំនួន ៣០ លានរៀល ទៅគ្រួសារជនរងគ្រោះ ក្រោមការចោទប្រកាន់ ពីបទ ” ឃាតកម្មគិតទុកជាមុន ” តាមមាត្រា ២០០ នៃក្រមព្រហ្មទណ្ឌ ។
ជនជាប់ចោទ ប្តឹងរឧទ្ទរណ៍ តែ សាលាឧទ្ធរណ៍បានតម្កល់ទណ្ឌកម្មរបស់គាត់រក្សាទុកការដដែល ។ គាត់ ក៏បានបន្តប្តឹងសារទុក្ខ មកកាន់តុលាការកំពូលទៀត។
ជនជាប់ចោទឈ្មោះ អោម ឆន ត្រូវបានសមត្ថកិច្ចនគរបាលព្រហ្មទណ្ឌកម្រិតធ្ងន់ខេត្តកំពង់ឆ្នាំង ចាប់ខ្លួន កាលពីថ្ងៃទី ថ្ងៃទី១៧ ខែឧសភា ឆ្នាំ២០១៨ ភូមិត្រពាំងជ្រៃ ឃុំខ្លុងពពក ស្រុកទឹកផុស ខេត្ត កំពង់ឆ្នាំង ។
តុលាការកំពូលនឹងប្រកាសដីកា លើសំណុំរឿងក្តីនេះ នៅព្រឹកថ្ងៃទី ៤ ខែ ឧសភា ឆ្នាំ ២០២២ ខាងមុខនេះ ៕
ដោយ : លីហ្សា
