ភ្នំពេញ ៖ សម្ដេចក្រឡាហោម ស ខេង ប្រធានស្ដីទី គណបក្សប្រជាជនកម្ពុជា និងជាប្រធានក្រុមការងារ គណបក្សប្រជាជនកម្ពុជា ចុះមូលដ្ឋានខេត្តបាត់ដំបង និង ព្រៃវែង បានថ្លែងថា មេឃុំ មេប៉ុស្តិ៍ មេភូមិ អនុភូមិ និងប៉ុស្តិ៍សុខភាព បំពេញភារកិច្ចល្អជូនប្រជាពលរដ្ឋនោះ គណបក្សប្រជាជនកម្ពុជា នឹងទទួលបានការគាំទ្រ ពីប្រជាពលរដ្ឋជាក់ជាពុំខាន ។
ក្នុងពិធីជួបសំណេះសំណាល និងដឹកនាំយុទ្ធនាការឃោសនា បោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នៅស្រុកកំរៀង ខេត្តបាត់ដំបង នាថ្ងៃទី២២ ខែឧសភា ឆ្នាំ២០២២ សម្ដេច ស ខេង បានថ្លែងថា ក្រុមប្រឹក្សាឃុំ បានខិតខំរក្សាសន្តិសុខ សណ្ដាប់ធ្នាប់ សាធារណៈនៅគ្រប់ឃុំ តាមរយៈសកម្មភាព ប្រឆាំងបទល្មើសនានា និងបានខិតខំបំពេញតួនាទី តាមច្បាប់កំណត់ ដើម្បីអភិវឌ្ឍន៍មូលដ្ឋាន ដូចជាការកសាងហេដ្ឋា រចនាសម្ព័ន្ធនានាជាដើម ។
សម្ដេច ស ខេង បានថ្លែងថា “មេឃុំ ចៅសង្កាត់ មេប៉ុស្តិ៍រដ្ឋបាលឃុំ សង្កាត់ ស្មៀនឃុំ សង្កាត់ មេភូមិ អនុភូមិ និងប៉ុសិ៍សុខភាព ប្រសិនបើតួអង្គទាំង៥ បំពេញភារកិច្ចបានល្អ ជូនប្រជាពលរដ្ឋនោះ គណបក្សប្រជាជនកម្ពុជា និងទទួលបានគាំទ្រ ពីប្រជាពលរដ្ឋជាក់ជាពុំខានឡើយ” ។
សម្ដេច ក៏បានណែនាំឱ្យក្រុមការងារទាំងអស់ ផ្ដល់គាំទ្រដល់តួអង្គទាំង៥នេះ បំពេញភារកិច្ចឱ្យបានល្អ ដើម្បីផលប្រយោជន៍ជាតិ និងប្រជាជននៅមូលដ្ឋាន ។
ឆ្លៀតឱកាស នោះ សម្ដេច ស ខេង បានគូសបញ្ជាក់ថា គុណតម្លៃ នៃសន្តិភាពគឺមិនអាចមានអ្វីប្រៀបផ្ទឹមបាននោះទេ ដ្បិតកត្តានេះជាឱកាសមាស ឱកាសប្រាក់នៃការធ្វើសកម្មភាព គ្រប់បែបយ៉ាងដើម្បីបុព្វហេតុ នៃការអភិវឌ្ឍសេដ្ឋកិច្ច និងសង្គម។
សម្ដេច បញ្ជាក់ថា បច្ចុប្បន្ន ទន្ទឹមនឹងការរក្សាបានសុខសន្តិភាព កម្ពុជាក៏អាចរក្សា បាននូវសាមគ្គីភាពជាតិ ឯកភាពទឹកដី ដែលមកដល់ពេលនេះ មិនមានកម្លាំងឧទ្ទាមក្រៅច្បាប់ប្រឆាំង នឹងរាជរដ្ឋាភិបាល ដែលកើតចេញ ពីការបោះឆ្នោតនោះឡើយ៕
