ភ្នំពេញ៖ តុលាការកំពូលកាលពីព្រឹក ថ្ងៃទី៣១ ខែឧសភា ឆ្នាំ២០២២នេះ បានប្រកាសសាលដីកា និងសម្រេចដោះលែង ជនជាប់ចោទឈ្មោះ លោកឧកញ៉ា ប៉ែន នួន ពីមន្ទីរពន្ធនាគារ ជាបណ្ដោះអាសន្ន ជាប់ពាក់ព័ន្ធនឹងបទល្មើស ឆបោក និង រំលោភទំនុកចិត្ត ប្រព្រឹត្តនៅ ភូមិព្រៃពាយ និង ភូមិដុំផ្តៅ ឃុំត្រពាំងភ្លាំង ស្រុកឈូក ខេត្តកំពត កាលពីឆ្នាំ២០២១។
លោក យូរ ឧត្តរា ជាប្រធានចៅក្រមប្រឹក្សាជំនុំជម្រះ នៃ តុលាការកំពូល បានថ្លែងអោយដឹងថា នៅក្នុងសំណុំរឿងក្តីព្រហ្មទណ្ឌនេះ ជនជាប់ចោទ ឈ្មោះ ប៉ែន នួន ភេទប្រុស អាយុ ៤៧ ឆ្នាំ មានងារជាឧកញ៉ាម្នាក់ និង មានមុខរបរ ជាពាណិជ្ជករ មានទីលំនៅ នៅសង្កាត់ចោមចៅទី៣ ខណ្ឌពោធិសែនជ័យ រាជធានីភ្នំពេញ ត្រូវបានជាប់ចោទ ពីបទ ” ឆបោក និង រំលោភទំនុកចិត្ត ” តាមបញ្ញត្តិមាត្រា ៣៧៧ មាត្រា ៣៧៨ និង មាត្រា ៣៩១ និង ៣៩២ នៃក្រមព្រហ្មទណ្ឌ។
លោកចៅក្រមបានថ្លែងថា ជនជាប់ចោទ ប៉ែន នួន ត្រូវបានប្តឹងដោយ ឈ្មោះ ស៊ីន ប៊ុល ភេទប្រុស អាយុ ៣៩ឆ្នាំ ត្រូវជាភាគីដើមបណ្ដឹង មានទីលំនៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ ។
ជនជាប់ចោទ ឈ្មោះ ប៉ែន នួន ត្រូវបានសមត្ថកិច្ចនគរបាលចាប់ឃាត់ខ្លួន តាមដីកាបង្គាប់ឱ្យនាំរបស់ចៅក្រមស៊ើបសួរ កាលពីថ្ងៃ២ ខែកក្កដា ឆ្នាំ២០២១ នៅខេត្តកំពត និងត្រូវបានឃុំនៅក្នុងពន្ធនាគារខេត្តកំពត ៕
ដោយ: លីហ្សា
