ភ្នំពេញ ៖ លោក គង់ វិបុល អគ្គនាយក នៃអគ្គនាយកដ្ឋានពន្ធដារ បានជំរុញអ្នកវិនិយោគចិននៅកម្ពុជា ទាំងសហគ្រាសជាអ្នកជាប់ពន្ធធំ ពន្ធមធ្យម និងពន្ធតូច ចូលរួមបំពេញកាតព្វកិច្ចសារពើពន្ធ និងមកចុះបញ្ជីពន្ធដារ ស្របតាមច្បាប់ និងបទប្បញ្ញត្តិ ស្ដីពីពន្ធដារជាធរមាន។ នេះយោងតាម សេចក្ដីប្រកាសព័ត៌មាន របស់អគ្គនាយកដ្ឋានពន្ធដារ។
ក្នុងកិច្ចប្រជុំក្រុមការងារភាពជាដៃគូ អគ្គនាយកដ្ឋានពន្ធដារ-សភាពាណិជ្ជកម្មចិន (កម្ពុជា) នាថ្ងៃទី៩ មិថុនា លោក គង់ វិបុល បានលើកឡើងពីកិច្ចសហប្រតិបត្តិការល្អ រវាងអគ្គនាយកដ្ឋានពន្ធដារ និងសភាពាណិជ្ជកម្មចិន (កម្ពុជា) នាពេលកន្លងមក ក្នុងនោះកង្វល់ និងបញ្ហាផ្សេងៗ ដែលក្រុមហ៊ុនចិនបានជួបប្រទះ តែងតែត្រូវបានយកមកពិភាក្សា និងយកចិត្តទុកដាក់ដោះស្រាយ។
លោកបញ្ជាក់ថា «សូមជំរុញ និងលើកទឹកចិត្តចំពោះវិនិយោគិនចិនទាំងឡាយ ទាំងសហគ្រាសជាអ្នកជាប់ពន្ធធំ ពន្ធមធ្យម និងពន្ធតូច ក្នុងការចូលរួមបំពេញកាតព្វកិច្ចសារពើពន្ធ ដោយឡែកអ្នកដែលមិនទាន់បានមកចុះបញ្ជីពន្ធដារ សូមមកចូលរួមចុះបញ្ជីពន្ធដារ និងបំពេញកាតព្វកិច្ចសារពើពន្ធស្របតាមច្បាប់ និងបទប្បញ្ញត្តិ ស្ដីពីពន្ធដារជាធរមាន»។
នាឱកាសនោះ អគ្គនាយកដ្ឋានពន្ធដារ និងសភាពាណិជ្ជកម្មចិន (កម្ពុជា) បានសាទរ និងបន្តកិច្ចសហប្រតិបត្តិការល្អជាមួយគ្នា ក្នុងការចែករំលែកព័ត៌មាន បន្តពង្រឹងការកិច្ចសហការភាពជាដៃគូ និងផ្តល់សេវាពន្ធដារ ឱ្យកាន់ប្រសើរឡើងថែមទៀត ក្នុងគោលដៅកាត់បន្ថយជាអតិបរមា នូវបញ្ហាប្រឈមនានា។
គួរបញ្ជាក់ផងដែរថា ក្រុមការងារភាពជាដៃគូ អគ្គនាយកដ្ឋានពន្ធដារ-សភាពាណិជ្ជកម្មចិន (កម្ពុជា) បានបង្កើតឡើង នៅថ្ងៃទី២៩ ខែសីហា ឆ្នាំ២០១៩ ហើយវេទិកាពន្ធដារ និងសភាពាណិជ្ជកម្មចិន ជាបន្តបន្ទាប់ បានដើរតួនាទីយ៉ាងសំខាន់ ក្នុងការជំរុញការវិនិយោគ និងអនុលោមភាពសារពើពន្ធ ស្របពេលដែលការវិនិយោគផ្ទាល់ ពីប្រទេសចិនគិតចាប់ពីឆ្នាំ១៩៩៤ ដែលមកទល់នឹងបច្ចុប្បន្ន បានឈរនៅលំដាប់លើគេ ក្នុងចំណោមការវិនិយោគផ្ទាល់ពីបរទេស ក្នុងនោះ បានវិនិយោគលើវិស័យសំខាន់ៗ មានជាអាទិ៍៖ វិស័យកសិកម្ម និងកសិ-ឧស្សាហកម្ម, វិស័យឧស្សាហកម្ម និងកម្មន្តសាល, សំណង់, វិស័យទេសចរណ៍, វិស័យសេវាកម្ម និងហេដ្ឋារចនាសម្ព័ន្ធ៕
