បរទេស៖ទីភ្នាក់ងារចិនស៊ិនហួ ចេញផ្សាយនៅថ្ងៃនេះ បានឲ្យដឹងថា នាយករដ្ឋមន្ត្រី ស្រីលង្កា លោក Ranil Wickremesinghe បានចេញមកធ្វើការបញ្ជាក់អំពី ភាពជោគជ័យ នៅក្នុងកិច្ចពិភាក្សា
គ្នារវាងស្រីលង្កា ជាមួយនឹងមូលនិធិរូបិយវត្ថុ អន្តរជាតិ IMFដើម្បីស្វែងរកជំនួយ ផ្នែកសេដ្ឋកិច្ច។
លោក Wickremesinghe បានបញ្ជាក់បែបនេះថា៖ កិច្ចពិភាក្សា ដែលមានភាពវិជ្ជមាន និងផ្លែផ្កាត្រូវបានធ្វើឡើង ហើយជឿជាក់ថា ការគាំទ្រទាំងគោលនយោបាយ និងសេដ្ឋកិច្ចជាពិសេស ការកែទំរង់ នឹងត្រូវធ្វើឡើង ក្នុងពេលឆាប់ៗនេះ។
ទោះបីជាយ៉ាងណាក្តី លោកនាយករដ្ឋមន្ត្រី បានបញ្ជាក់ដែរថាស្រីលង្កា ចាំបាច់ត្រូវតែរៀបចំ ឯកសារនិងផែនការសង់បំណុល ឲ្យបានត្រឹមត្រូវទៅកាន់ IMF ជាមុនសិនក្នុងការចុះហត្ថលេខា អនុម័តទទួលយក។
គួរឲ្យដឹងដែរថាស្រីលង្កា នៅពេលបច្ចុប្បន្ននេះ កំពុងបន្តស្វែងរកជំនួយនិងកំចីពី IMF ផងនិងពីបណ្តាប្រទេសដែលជាមិត្តផង ដើម្បីជួយដល់កិច្ចការងារ ស្តារសេដ្ឋកិច្ចឡើងវិញ ខណៈដែលកំពុងជួបទៅនឹង វិបត្តិយ៉ាងធ្ងន់ធ្ងរ ហើយក្នុងនោះវាបានបង្ក ទៅជាបញ្ហាជាច្រើន នៅក្នុងប្រទេសដូចជាអតិផរណា បញ្ហាគ្មានថាមពលប្រើប្រាស់ កង្វះខាតម្ហូបអាហារ សាំង និងវត្ថុប្រើប្រាស់ចាំបាច់ ប្រចាំថ្ងៃជាច្រើនទៀត ផងដែរ៕
ប្រែសម្រួល៖ស៊ុនលី
