មន្ត្រីជាន់ខ្ពស់ភូមិមួយផលិតផលមួយ ជំរុញឱ្យអ្នកផលិត ត្រូវជឿជាក់ថា ផលិតផលរបស់ខ្លួន មានគុណភាព និងមានស្តង់ដាត្រឹមត្រូវ​ តាមការកំណត់

ស្វាយរៀង ៖ អគ្គលេខាធិការរង គណៈកម្មការជាតិជំរុញចលនា ភូមិមួយផលិតផលមួយ នៃទីស្តីការគណៈរដ្ឋមន្ត្រី លោក សួង ណយ បានលើកឡើងថា អ្នកផលិត ផលិតផលក្នុងស្រុកត្រូវជឿជាក់ថា ផលិតផលរបស់ខ្លួនមានគុណភាព និងមានស្តង់ដាត្រឹមត្រូវ តាមការកំណត់របស់ភូមិ១ផលិតផល១ ពិសេសត្រូវធានាថា ផលិតផលរបស់ខ្លួនទាំងអស់ ជាផលិតផលក្នុងស្រុក មិនមែនជាផលិតផល នាំចូលពីខាងក្រៅ។

ការថ្លែងលើកឡើងរបស់លោក សួង ណយបែបនេះក្នុងវេទិកា ផ្គូផ្គងរវាងអ្នកផលិត និងអ្នកទិញ នៃគម្រោងអភិវឌ្ឍន៍អាជីវកម្ម ប្រកបដោយសុច្ចរិតភាព និងការទទួលបានទីផ្សារ សម្រាប់អ្នកផលិតក្នុងស្រុក នៃខេត្តស្វាយរៀង និង M/MSEs ដែលធ្វើឡើងនៅព្រឹកថ្ងៃទី២៦ ខែសីហា ឆ្នាំ២០២២។ វេទិកានេះក៏មានការចូលរួម ពីលោក សេង សីលាអភិបាលរងខេត្តស្វាយរៀង ព្រមទាំងមន្ត្រីដែលពាក់ព័ន្ធ និងម្ចាស់អាជីវកម្ម ក្នុងខេត្តជាច្រើនរូបផងដែរ។

លោក សួង ណយ លើកឡើងថា ខេត្តស្វាយរៀង មានផលិតផលសកត្តានុពលជាច្រើនមុខ ដែលត្រូវចុះបញ្ជីជូនពលរដ្ឋ ម្ចាស់ផលិតផល ម្ចាស់សិប្បកម្ម និងសហគ្រាស។ កន្លងមកការចុះបញ្ជីជុំទី១ ខេត្តស្វាយរៀង មានផលិតផលចំនួន៩មុខ ត្រូវបានចុះបញ្ចីរួច។ ហើយការចុះបញ្ជីនេះ ជាការជំរុញឱ្យអ្នកផលិតទាំងអស់ មានទីផ្សារក្នុងការលក់ផលិតផលរបស់ខ្លួន ឱ្យកាន់តែទូលំទូលាយ។

លោកអគ្គលេខាធិការរងគណៈកម្មការជាតិ ជំរុញចលនាភូមិមួយផលិតផលមួយ ក៏បានស្នើដល់សមាជិក ក្រុមការងារភូមិមួយផលិតផលមួយ ពិសេសប្រជាពលរដ្ឋអ្នកផលិត ទាំងអ្នកបានចុះបញ្ជីរួច និងអ្នកកំពុងដាក់ពាក្យស្នើសុំចុះបញ្ជី ត្រូវបន្តចូលរួមសហការគ្នាឱ្យបានល្អ និងត្រូវមានភាពស្មោះត្រង់ ព្រមទាំងហ៊ានទទួលខុសត្រូវ ចំពោះផលិតរបស់ខ្លួន ដើម្បីធ្វើយ៉ាងណាជំរុញគុណភាព និងទីផ្សារផលិតខ្មែរឱ្យកាន់តែប្រសើរ។

ប្រជាពលរដ្ឋ ក៏ដូចជាម្ចាស់អាជីវកម្ម សិប្បកម្ម ដែលបានចូលរួមក្នុងវេទិការនេះ បានបង្ហាញអំពីការយល់ឃើញរបស់ខ្លួនថា ការចុះបញ្ជីផលិតផលរបស់ខ្លួន ក្នុងចលនាភូមិ១ផលិតផល១ ពិតជាមានសារៈសំខាន់ និងផ្តល់ផលប្រយោជច្រើន ដល់ក្រុមអ្នកផលិតដែលជាសមាជិក។ ដែលការចុះបញ្ជីនេះ បានធ្វើឱ្យផលិតផលរបស់ខ្លួន មានអ្នកស្គាល់ច្រើន មានទីផ្សារលក់ចេញ ព្រមទាំងមានការទទួលស្គាល់ ពីគុណភាពផងដែរ។

ចំណែកឯម្ចាស់អាហាដ្ឋាន ភោជនីយដ្ឋាន និងកន្លែងផ្តល់សេវាកម្សាន្តនានា ដែលបានចូលរួមក្នុងវេទិការនេះដែរ ក៏បានបង្ហាញពីការយល់ឃើញថា វេទិការនេះពិតជាផ្តល់នូវផលប្រយោជន៍ ច្រើនសម្រាប់ពួកគាត់ ដោយវេទិកានេះបាននាំពួកគាត់ ដែលជាអ្នកផ្តល់សេវាកម្មផ្នែកម្ហូបអាហារ បានជួបផ្ទាល់ជាមួយអ្នកផលិត និងផ្គត់ផ្គង់នូវផលិតផល ដែលជាតម្រូវការចាំបាច់ប្រចាំថ្ងៃ សម្រាប់អាជីវកម្មរបស់ពួកគាត់ផងដែរ។

សូមបញ្ជាក់ថា ផលិតផលទាំង ៩ មុខដែលបានចុះបញ្ជីរួចរួមមាន៖
១.ទឹកឃ្មុំព្រៃធម្មជាតិត្រពាំងពិការ ស្ថិតនៅ ក្នុងភូមិត្រពាំងពិការ ឃុំអំពិល ស្រុករមាសហែក។
២.ស្រូវស្មាច់ កំពង់រោទិ៍ ស្ថិតនៅក្នុងភូមិឬស្សីអម ឃុំខ្សែត ស្រុកកំពង់រោទិ៍
៣.បន្លែសុវត្ថិភាព ភូមិក្បាលដំរី ឃុំស្វាយយារ ស្រុកស្វាយជ្រំ
៤.អំបុកស្រួយឆ្ញាញ់ ភូមិគោកកណ្តាល ឃុំក្រោលគោ ស្រុកស្វាយជ្រំ
៥.អំបុក(ស្រីនិច)ភូមិបន្លាស្អិត ឃុំក្រោគោ ស្រុកស្វាយជ្រំ
៦.ស្ករត្នោតម៉្សៅ ភូមិទួលវិហារ ឃុំស្វាយយា ស្រុកស្វាយជ្រំ
៧.គ្រាប់ធនជាតិ-អាហារសម្រន់ ភូមិស្រះវង់ សង្កាត់ស្វាយរៀង ក្រុងស្វាយរៀង
៨.កាបូបយួរនិងមួកធ្វើអំពីអញ្ចូត ភូមិចំបក់កោង ឃុំតាសួស ស្រុកស្វាយជ្រំ
៩.ក្រម៉ាភូមិដំណាក់កន្ទូត ស្ថិតក្នុងភូមិដំណាក់កន្ទូត ឃុំស្វាយយា ស្រុកស្វាយជ្រំ៕