លោក ហ៊ុន ម៉ានី អស់សំណើចជាមួយអ្នកវិភាគ ថាលោក និងលោក ហ៊ុន ម៉ាណែត កំពុងប្រជែងគ្នា យកតំណែងនាយករដ្ឋមន្ត្រី

ភ្នំពេញ៖ លោក ហ៊ុន ម៉ានី កូនប្រុសពៅសម្ដេចតេជោ ហ៊ុន សែន បានបង្ហញក្ដីអស់សំណើច ជាមួយក្រុមអ្នកវិភាគដែលថា លោក និងលោក ហ៊ុន ម៉ាណែត បាននិងកំពុងដណ្តើម យកប្រជាប្រិយភាពគ្នា ក្នុងការប្រជែងធ្វើជានាយករដ្ឋមន្រ្តីកម្ពុជា នាពេលអនាគត ។

ការថ្លែងរបស់លោក ហ៊ុន ម៉ានី បែបនេះធ្វើឡើងបន្ទាប់ពី មានអ្នកវិភាគមួយចំនួន ក៏ដូចជាសារព័ត៌មាន «The Cambodia Dialy Khmer» បានផ្សាយថា លោក ហ៊ុន ម៉ាណែត និង ហ៊ុន ម៉ានី បាននិងកំពុងដណ្តើមយក ប្រជាប្រិយភាពគ្នា ក្នុងការប្រជែងធ្វើជានាយករដ្ឋមន្រ្តីកម្ពុជា នាពេលអនាគត ។

តាមរយៈបណ្ដាញសង្គមហ្វេសប៊ុក នាថ្ងៃទី៣១ សីហា លោក ហ៊ុន ម៉ានី បានបញ្ជាក់ថា «កន្លងមក ខ្ញុំសង្កេតថាឃើញ មានការបកស្រាយ និងបទវិភាគជាបន្តបន្ទាប់ស្តីពីខ្ញុំ និងបងណែត ដែលការវិភាគទាំងនោះ មានចេតនាអុជអាល និងញុះញង់ ហើយជួនពេលខ្លះ ក៏ជាការវិភាគដែលគួរឲ្យ អស់សំណើចទៅទៀតផង» ។

លោកបញ្ជាក់បន្ថែមថា «ដូចអ្វីដែលពុក បានលើកឡើង (បងប្អូនគេស្គាល់គ្នាច្បាស់) ក្នុងពិធីបើកការដ្ឋាន សាងសង់ស្ពានអាកាសថ្មី ខ្ញុំសូមជម្រាបថា ខ្ញុំ និងបងណែត និងក្រុមគ្រួសារយើងទាំងអស់គ្នា យល់ច្បាស់ណាស់ពីចរិត នៃការបកស្រាយ និងបទវិភាគ ក្នុងចេតនាបំបែកបំបាក់ទាំងនោះ ហើយយើងអរគុណទៅវិញទេ ដែលការវិភាគទាំងនោះ បានក្លាយទៅជាមូលដ្ឋាន សាមគ្គីភាពផ្ទៃក្នុងបន្ថែមទៀត សម្រាប់ក្រុមគ្រួសាររបស់យើង» ។

លោក ហ៊ុន ម៉ានី បន្ថែមថា ដូចអ្វីដែលលោកធ្លាប់បានបកស្រាយជាសាធារណៈ និងជាបន្តបន្ទាប់កន្លងមក គឺលោកគាំទ្រយ៉ាងពេញទំហឹង ចំពោះបេក្ខភាពលោក ហ៊ុន ម៉ាណែត ជាបេក្ខជនអនាគតនាយករដ្ឋមន្រ្តី បន្តពីសម្តេចតេជោ ហើយការគាំទ្រនេះ មិនត្រឹមតែស្តែងចេញពីការលើកឡើង របស់លោកជាហូរហែប៉ុណ្ណោះទេ ក៏ស្ដែងចេញតាមទង្វើទាំងឡាយ ដែលលោកបាន និងកំពុងធ្វើនាពេលកន្លងមក។

លោកគូសបញ្ជាក់ថា លើសពីក្នុងក្របខណ្ឌក្រុមគ្រួសារ ថ្នាក់ដឹកនាំ សមាជិក សមាជិកានៃគណបក្សប្រជាជនកម្ពុជាទាំងអស់ នាពេលកន្លងមក និងជាបន្តបន្ទាប់ ក៏បានបង្ហាញការគាំទ្រ ចំពោះបេក្ខភាព របស់លោក ហ៊ុន ម៉ាណែត ដែលផ្ទុយទៅវិញ ការបកស្រាយអុចអាលទាំងឡាយ គ្រាន់តែជាអ្វីបង្ហាញឲ្យឃើញកាន់តែច្បាស់ ពីភាពភិតភ័យរបស់ក្រុមអ្នកវិភាគទាំងនោះ ចំពោះកម្លាំងសាមគ្គីភាព ដ៏រឹងមាំនៃថ្នាក់ដឹកនាំ សមាជិក សមាជិកានៃបក្សប៉ុណ្ណោះ៕