ភ្នំពេញ ៖ សាកលវិទ្យាល័យ ប៊ែលធី អន្តរជាតិ នាព្រឹកថ្ងៃទី០៨ ខែកញ្ញា ឆ្នាំ២០២២ បានរៀបចំកម្មវិធី “ការពារបញ្ចប់បរិមាធិប្បាយថ្នាក់បណ្ឌិត (PhD Dissertation) ជំនាន់ទី១” របស់បេក្ខជនបណ្ឌិតចំនួន ៣រូប ក្នុងនោះ ៖
-ទី១ បេក្ខជនបណ្ឌិត រ៉េត ច័ន្ទធន ជំនាញ រដ្ឋបាលអប់រំ និងភាពជាអ្នកដឹកនាំ ប្រធានបទ “ការអភិវឌ្ឍការធានាគុណភាពផ្ទៃក្នុង និងលទ្ធភាពការងារ”
-ទី២ បេក្ខជនបណ្ឌិត រស់ ប៉ារ៉ាឌី ជំនាញ រដ្ឋបាលអប់រំ និងភាពជាអ្នកដឹកនាំប្រធានបទ “ផលជះនៃភាពជាអ្នកដឹកនាំ ក្នុងការអប់រំ ឧត្តមសិក្សាកម្ពុជា តាមរយៈឌីជីថលលូបនីយកម្ម”
-ទី៣ បេក្ខជនបណ្ឌិត នង សុខា ជំនាញគ្រប់គ្រង ពាណិជ្ជកម្ម ប្រធានបទ “កត្តាជះឥទ្ធិពល នៃការប្រើប្រាស់សេវាធនាគារ លើទូរស័ព្ទដៃ នៅក្នុងប្រទេស កម្ពុជា” ដែលបានប្រព្រឹត្តទៅ ក្រោមអធិបតីភាព លោកបណ្ឌិត លី ឆេង តំណាងរាស្ត្រមណ្ឌលរាជធានីភ្នំពេញ និងជាប្រធាន ក្រុមប្រឹក្សាភិបាល នៃសាកលវិទ្យាល័យ ប៊ែលធី អន្តរជាតិ ព្រមទាំងមានវត្តមាន លោកបណ្ឌិត រ័ត្ន ឆាង អគ្គលេខាធិការរង ប្រធានក្រុមមន្ត្រី វាយតម្លៃគុណភាព អប់រំឧត្តមសិក្សា នៃគណៈកម្មាធិការ ទទួលស្គាល់គុណភាពអប់រំ នៃកម្ពុជា (ACC) និងលោកបណ្ឌិត ហេង គ្រេង ប្រធាននាយកដ្ឋាន ស្រាវជ្រាវវិទ្យាសាស្រ្ដ នៃអគ្គនាយកដ្ឋាន ឧត្តមសិក្សារបស់ក្រសួងអប់រំ យុវជន និងកីឡា រួមជាមួយ ថ្នាក់ដឹកនាំ បុគ្គលិក សាស្ត្រាចារ្យ និងនិស្សិត ចូលរួមប្រមាណ ៦៥០នាក់ ផងដែរ ។
តាមរបាយការណ៍ លោក លី ណាវុឌ្ឍ សាកលវិទ្យាធិការនៃសាកលវិទ្យាល័យ ប៊ែលធី អន្តរជាតិ បានឱ្យដឹងថា បច្ចុប្បន្ននេះ សាកលវិទ្យាល័យ ប៊ែលធី អន្តរជាតិ មាន ២ទីតាំង (ទីតាំងទី១-ទួលស្លែង និងទីតាំងទី២-ស្ពានអាកាសចោមចៅ)។ សាកលវិទ្យាល័យ មានបង្រៀន ៥កម្រិតសិក្សាធំៗ រួមមាន៖ ១-ថ្នាក់បំប៉នភាសាអង់គ្លេស និងកុំព្យូទ័រ ២-បរិញ្ញាបត្ររង ៣-បរិញ្ញាបត្រ ៤-បរិញ្ញាបត្រជាន់ខ្ពស់ ៥-បណ្ឌិត និងបណ្តុះបណ្តាលលើ ១២មហាវិទ្យាល័យ និង ៤២មុខជំនាញ ។
ទី១-មហាវិទ្យាល័យ គ្រប់គ្រងពាណិជ្ជកម្ម
ទី២-មហាវិទ្យាល័យ ហិរញ្ញវត្ថុ និងធនាគារ
ទី៣-មហាវិទ្យាល័យ សេដ្ឋកិច្ច
ទី៤-មហាវិទ្យាល័យ ច្បាប់
ទី៥-មហាវិទ្យាល័យ អប់រំ សិល្បៈ និងមនុស្សសាស្ត្រ
ទី៦-មហាវិទ្យាល័យ ទេសចរណ៍ និងបដិសណ្ឋារកិច្ច
ទី៧-មហាវិទ្យាល័យ ព័ត៌មានវិទ្យា និងវិទ្យាសាស្រ្ត
ទី៨-មហាវិទ្យាល័យ បច្ចេកវិទ្យាឌីជីថល និងទូរគមនាគមន៍
ទី៩-មហាវិទ្យាល័យ វិស្វកម្ម
ទី១០-មហាវិទ្យាល័យ ស្ថាបត្យកម្ម
ទី១១-មហាវិទ្យាល័យ ទំនាក់ទំនងអន្តរជាតិ
ទី១២-មហាវិទ្យាល័យ អាកាសចរស៊ីវិល
លោកសាកលវិទ្យាធិការ បានមានប្រសាសន៍ថា ដើម្បីបញ្ចប់ ថ្នាក់បណ្ឌិតជាប់ជាស្ថាពរ និស្សិតទាំងអស់ត្រូវ ៖
១-សិក្សា ១២មុខវិជ្ជា (12 Subjects) ស្មើនឹង ៣៦ក្រេឌីត
២-ស្នើសុំការឯកភាពលើ ប្រធានបទដែលត្រូវសិក្សាស្រាវជ្រាវ និងសាស្ត្រាចារ្យណែនាំ
៣-រៀបចំ និងការពារគម្រោងស្រាវជ្រាវ (Research Proposal)
៤-ត្រូវបង្ហាញ និងការពារអំពីការរីកចម្រើននៃការស្រាវជ្រាវ (Progressive Defense)
៥-ត្រូវសរសេរនិក្ខេបបទឱ្យបានយ៉ាងតិច ៥ម៉ឺនពាក្យឡើងទៅ និងការពារបញ្ចប់ដោយជោគជ័យ
(Final Defense of Research Dissertation)
៦-ជាចុងក្រោយ ត្រូវបោះពុម្ពស្នាដៃស្រាវជ្រាវ (Publication) របស់ខ្លួន។
ក្នុងឱកាសនោះដែរ លោកបណ្ឌិត លី ឆេង បានថ្លែងកោតសរសើរចំពោះ បេក្ខជនបណ្ឌិត ជំនាន់ទី១ ទាំង ៣រូប ដែលបានខិតខំប្រឹងប្រែង សិក្សាស្រាវជ្រាវ បានចប់រួចរាល់ ស្របតាមគោលការណ៍ របស់សាកលវិទ្យាល័យទាំងការសិក្សា និងការស្រាវជ្រាវ គឺមិនឱ្យលើសពី ៥ឆ្នាំ ។ លោកបណ្ឌិត ក៏បានថ្លែងអំណរគុណ ដល់សាស្ត្រាចារ្យ ណែនាំទាំងអស់ ដែលបានដឹកនាំកិច្ចការស្រាវជ្រាវនេះ តាំងពីដើមរហូតមក និងអនុវត្តតាមការណែនាំ របស់សាកលវិទ្យាល័យគឺ សាស្ត្រាចារ្យណែនាំ ១រូប អាចដឹកនាំ បេក្ខជនបណ្ឌិត បានតែ ២រូប ។
លោកបណ្ឌិត បានបន្ថែមទៀតថា ដើម្បីធានាបាននូវប្រសិទ្ធភាព និងគុណភាពអប់រំខ្ពស់ ក៏ដូចជាការការពារនិក្ខេបបទនេះ ទទួលបានជោគជ័យ សាកលវិទ្យាល័យ បានអញ្ជើញ សាស្រ្តាចារ្យបណ្ឌិត ចំនួន ៩រូប ជាគណៈកម្មការវាយតម្លៃ ការការពារបញ្ចប់នាពេលនេះ ក្នុងនោះសាស្ត្រាចារ្យជាជនជាតិ ខ្មែរ ៥រូប និង បរទេស ចំនួន ៤រូប ដែលមកពីសាកលវិទ្យាល័យដៃគូ (MOU) របស់សាកលវិទ្យាល័យ ប៊ែលធី អន្តរជាតិ រួមមាន សាកលវិទ្យាល័យ Angelo State នៃសហរដ្ឋអាមេរិក និង ITS & Smart City នៃប្រទេសកូរ៉េខាងត្បួង ជាដើម ។
ជាទីបញ្ចប់ លោកបណ្ឌិត បានអបអរសាទរ និងប្រកាសអំពីលទ្ធផល ជាប់ជាផ្លូវការ លើការវាយតម្លៃការការពារ បញ្ចប់ថ្នាក់បណ្ឌិត (PhD Dissertation) ជំនាន់ទី១ របស់បេក្ខជនបណ្ឌិតទាំង៣រូប ព្រមទាំងបានអញ្ជើញបំពាក់ Graduation Gown ទទួលស្គាល់បណ្ឌិតទាំង៣រូប របស់សាកលវិទ្យាល័យ ប៊ែលធី អន្តរជាតិ ជាប់ជាស្ថាពរចាប់ពី ពេលនេះតទៅផងដែរ ៕
