ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា និងជាប្រធានអាស៊ាន បានថ្លែងឲ្យដឹងថា ស្ដ្រី គឺជាស្នូលនៃគ្រួសារ និងសហគមន៍ «បើស្ដ្រីរឹងមាំ គ្រួសារ និងសហគមន៍អាស៊ាន ក៏រឹងមាំដូចគ្នាដែរ»។
នាឱកាសអញ្ជើញបិទកិច្ចប្រជុំកំពូលស្ដ្រីអាស៊ាន លើក ទី២ ក្រោមប្រធានបទ «ការកសាងអនាគតប្រកប ដោយចីរភាព បរិយាបន្ន និងកាន់តែរឹងមាំ ៖ បំផុសសហគ្រិនភាពរបស់ស្ដ្រីនៅក្នុងអាស៊ាន» នារសៀលថ្ងៃទី១២ ខែតុលា ឆ្នាំ២០២២ សម្ដេចតេជោ ថ្លែងថា «ដោយស្ត្រី គឺជាស្នូលនៃគ្រួសារ និងសហគមន៍ បើស្រ្តីរឹងមាំ គ្រួសារ និងសហគមន៍អាស៊ានរបស់យើង ក៏រឹងមាំដូចគ្នាដែរ។ ក្នុងន័យនេះ ការលើកកម្ពស់សហគ្រិនភាពរបស់ស្ត្រី គឺជាកិច្ចការមួយដ៏សំខាន់ដែលអាចផ្តល់ និងបង្កើនឱកាសដល់ស្រ្តីក្នុងការចូលរួមនៅក្នុងសកម្មភាពសេដ្ឋកិច្ច ដើម្បីលើកកម្ពស់ជីវភាពរបស់ខ្លួន និងគ្រួសារ ក៏ដូចជាការចូលរួមក្នុងការអភិវឌ្ឍ និងការធ្វើសមាហរណកម្ម សង្គម-សេដ្ឋកិច្ចអាស៊ានរបស់យើងឲ្យកាន់តែមានភាពប្រសើរឡើង»។
សម្ដេចតេជោបន្ដថា ដើម្បីឲ្យស្ត្រីអាចចូលរួម ក្នុងសកម្មភាពសង្គម-សេដ្ឋកិច្ច បានពេញលេញ និងទូលំទូលាយ ការពង្រឹងសមត្ថភាព និងភាពអង់អាច ផ្នែកសេដ្ឋកិច្ចរបស់ស្ត្រី គឺជាកត្តាចាំបាច់ និងមិនអាចខ្វះបាន ។ ក្នុងន័យនេះ រដ្ឋាភិបាល នៃបណ្ដាប្រទេស អាស៊ាន ទាំងអស់ មានកាតព្វកិច្ចធានា ឲ្យបានសមភាពសម្រាប់ស្រ្តី ក្នុងការទទួលបានការ អប់រំ ការបណ្ដុះបណ្តាលជំនាញវិជ្ជាជីវៈ, ភាពជាម្ចាស់លើការ គ្រប់គ្រងធនធានហិរញ្ញវត្ថុ, សិទ្ធិចូលរួមក្នុងការសម្រេចចិត្ត និងភាពជាអ្នកដឹកនាំ ដើម្បីឲ្យស្រ្តីគ្រប់រូបមានឱកាសពេញលេញ ទាំងក្នុងទិដ្ឋភាពសង្គម-សេដ្ឋកិច្ច, ពាណិជ្ជកម្ម និងទិដ្ឋភាពនយោបាយ ។
ឆ្លៀតឱកាសនោះ សម្ដេចនាយករដ្ឋមន្ដ្រី ជឿជាក់យ៉ាងមុតមាំថា កិច្ចប្រជុំកំពូលស្រ្តីអាស៊ានលើកទី២ នាថ្ងៃនេះ នឹងបន្តក្លាយជាវេទិកាសម្រាប់ការបំផុស និងជំរុញទឹកចិត្តដល់ស្ត្រីនៅក្នុងតំបន់អាស៊ាន ។ សម្ដេចក៏លើក ទឹកចិត្តឲ្យអាស៊ាន បន្តរៀបចំកិច្ចប្រជុំកំពូលនេះ នៅឆ្នាំបន្តបន្ទាប់ទៀត ដើម្បីជាសក្ខីភាព នៃការប្ដេជ្ញាចិត្តរបស់ថ្នាក់ដឹក នៃបណ្តាប្រទេសអាស៊ាន នៅក្នុងបុព្វហេតុ នៃការសម្រេចឲ្យបាននូវសមភាពយេនឌ័រនៅក្នុងប្រទេស និងក្នុងតំបន់ ។
ជាពិសេស សម្ដេច មានជំនឿយ៉ាងមុតមាំថា សេចក្តីថ្លែងការណ៍ ស្ដីពី «ការកសាងអនាគត ប្រកបដោយចីរភាព បរិយាបន្ន និងកាន់តែរឹងមាំ៖ ការបំផុសសហគ្រិនភាពរបស់ស្ត្រីនៅក្នុងអាស៊ាន» ដែលបានពិភាក្សានាថ្ងៃនេះ នឹងទទួលបានការគាំទ្រ និងការអនុម័តលើ នៅក្នុងកិច្ចប្រជុំកំពូលអាស៊ាន លើកទី៤០ និងទី៤១ នៅក្នុងខែវិច្ឆិកា ឆ្នាំ២០២២ខាងមុខ ៕
