ស្វាយរៀង ៖ លោកម៉ែន វិបុល ប្រធានគណៈកម្មាធិការគណបក្សខេត្ត នៅព្រឹកថ្ងៃទី២២ ខែតុលា ឆ្នាំ២០២២នេះ បានអញ្ជើញប្រកាសលោកហែម ស៊ីណា ជាប្រធានគណៈកម្មាធិការគណបក្ស ស្រុករំដួល ជំនួសលោកសុ ខារ៉ាមដែលទទួលភារកិច្ចថ្មី។
លោកម៉ែន វិបុល ក៏បានថ្លែងនូវការកោតសរសើរ ដល់ក្រុមការងារក៏ដូចជាប្រធានគណបក្ស ស្រុកចាស់ ដែលបានខិតខំអនុវត្តន៍កម្មវិធីនយោបាយ របស់គណបក្សនិងបានពង្រឹងការសាមគ្គីភាពផ្ទៃក្នុង បានល្អប្រសើរ និងបានអភិវឌ្ឍមូលដ្ឋាន ឲ្យមានការរីកចម្រើន គួរឲ្យកត់សម្គាល់ផងដែរ។
លោកម៉ែន វិបុល បានណែនាំឲ្យប្រធានគណបក្សស្រុកថ្មី ដែលប្រកាសនៅថ្ងៃនេះ ត្រូវតែខិតខំប្រឹងប្រែងដឹកនាំ កសាងស្រុក ឲ្យមានការរីកចម្រើនថ្មីៗ បន្ថែមទៀត ពិសេសត្រូវអនុវត្តន៍ឲ្យបានខ្ជាប់ខ្ជួន នូវលក្ខន្តិកៈ របស់គណបក្សប្រជាជន និងកម្មវិធីគោលនយោបាយ គោលការណ៍ទាំងឡាយរបស់គណបក្ស ដែលថ្នាក់កណ្តាល និងថ្នាក់ខេត្ត បានដាក់ចុះឲ្យបានត្រឹមត្រូវ និងម៉ឺងម៉ាត់។
លោកបានបញ្ជាក់ទៀតថា ត្រូវបង្កើន និងពង្រឹងការសាមគ្គីភាព ឯកភាពផ្ទៃក្នុងបក្សឲ្យបានរឹងមាំ ដោយឈរលើមាគ៌ា មហាជនរបស់បក្សទាំងខាងនយោបាយ សតិអារម្មណ៍ និងការចាត់តាំង ដោយឈរលើគោលការណ៍ «សមូហភាពដឹកនាំ បុគ្គលទទួលខុសត្រូវ» ដើម្បីឈានឆ្ពោះទៅដណ្តើមជ័យជម្នះ គ្រប់កាលបោះឆ្នោតជាបន្តបន្ទាប់នៅអាណត្តិក្រោយៗ ជាពិសេសសូមផ្តោតសំខាន់លើការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣នៅពេលខាងមុខឱ្យបានខ្លាំងក្លាបន្ថែមទៀតធ្វើយ៉ាងណាបង្កើនសមាជិកបោះឆ្នោតជូនគណបក្សប្រជាជនឲ្យមានសំឡេងកើនឡើងជាបន្តបន្ទាប់ទៀត។
ជាមួយគ្នានេះ លោកអភិបាលខេត្តស្វាយរៀង បានសង្កត់ធ្ងន់ថា គ្មានគណបក្សណាអាចផ្តួលរំលំគណបក្សប្រជាជនកម្ពុជាបានទេ គឺមានតែមន្ត្រីគណបក្សប្រជាជនកម្ពុជា ដែលអាចផ្តួលរំលំគណបក្សប្រជាជនកម្ពុជាខ្លួនឯងបាន ដោយផ្តើមចេញពីការបែកបាក់សាមគ្គីគ្នានេះឯង។ ដូច្នេះមិនត្រូវឱ្យមានជាដាច់ខាត ត្រូវសាមគ្គីគ្នាឯកភាពផ្ទៃក្នុង រួមគ្នាធ្វើការងារដើម្បីគណបក្សប្រជាជនកម្ពុជា និងត្រូវបន្តចុះមូលដ្ឋានជាប្រចាំគ្រប់ទីកន្លែង មិនមែនទាល់តែដល់រដូវបោះឆ្នោតទើបនាំគ្នាចុះមូលដ្ឋាននោះទេ។ មិនតែប៉ុណ្ណោះត្រូវសហការ និងមានទំនាក់ទំនងល្អជាប់ជានិច្ចជាមួយសមាជិក សមាជិការគណបក្សនៅមូលដ្ឋាន ដើម្បីចូលរួមដោះស្រាយនូវរាល់បញ្ហាផ្សេងៗ តាមសំណូមពររបស់ពលរដ្ឋឲ្យបានទាន់ពេលវេលា និងចំគោលដៅ។
លោកអភិបាលខេត្តបានបញ្ជាក់ថា ការបង្ក្រាបល្បែងស៊ីសងនៅក្នុងខេត្តស្វាយរៀងបានចំនួន ៥២៣ ទីតាំង ហើយបានធ្វើកិច្ចសន្យានៅតាមហាងកាហ្វេ គុយទាវទាំង៥២៣ទីតាំងនេះឲ្យបញ្ឈប់លេងល្បែងជាបន្ទាន់ ស្របតាមប្រសាសន៍ដូចជាបទបញ្ជាដ៏ម៉ឺងម៉ាត់របស់សម្ដេចតេជោ ហ៑ុន សែនជានាយករដ្ឋមន្ត្រី ឲ្យសមត្ថកិច្ច ក៏ដូចជាអាជ្ញាធរគ្រប់ជាន់ថ្នាក់បង្ក្រាបល្បែងស៊ីសងអោយខានតែបាន។ព្រមជាមួយគ្នានេះ អាជ្ញាធរក៏ដូចជាសមត្ថកិច្ចក៏បានចុះណែនាំដល់បណ្ដាកាស៊ីណូទាំងអស់នៅក្នុងខេត្តស្វាយរៀង មិនត្រូវអនុញ្ញាតឲ្យជនជាតិខ្មែរ ចូលលេងល្បែងនោះឡើយ បើមានករណីជនជាតិខ្មែរចូលលេងល្បែងក្នុងកាស៊ីណូ អ្នកគ្រប់គ្រងកាស៊ីណូទាំងនោះនិងត្រូវប្រឈមមុខចំពោះមុខច្បាប់៕
